• 21/01/2020 3:52 15

‘Young Life Rwanda’ bamurika imideri mu biruhuko bagatoza urubyiruko umuco

Urubyiruko rufite impano yo kumurika imideri rubarizwa mu muryango ‘Young Life Rwanda’ rutangaza ko hari byinshi bifuza kugeraho nyamara bakazitirwa no kuba ibyo bakora bitaramenyekana.

Bamurika imideri itandukanye yiganjemo idozwe mu bitenge

Mu kiganiro na Umuseke, uru rubyiruko rwatangaje ko bafite inzozi nyinshi zirimo no kuba ibyamamare mpuzamahanga mu kumurika imideri, bakaba baramuritse imideri mu Iserukiramuco ngarukamwaka ritegurwa n’uyumuryango wabo ryabaye mu mpera z’icyumweru dusoje.

Iri Serukiramuco bamuritsemo imideri rimaze imyaka itandatu riba by’umwihariko ngo rikorwa abanyeshuri bari mu biruhuko. Intego yaryo ngo ni uguhiriza hamwe abana bari mu biruhuko bakagaragaza impano bafite ariko bakanakangurirwa gukurikira inzira y’agakiza, bakibutswa kuva mu nzira mbi zibaganisha mu kunywa ibiyobyabwenge, ubusambanyi n’izindi ngeso mbi.

Abamuritse imideri bavuga ko ari amatsinda atandukanye aba arushanwa. Ishema Gilbert utuye i Nyamirambo yabwiye Umuseke ko bamurika imideri muri iri serukiramuco baturutse ahantu hatandukanye mu mujyi wa Kigali, i Nyamirambo, i Kanombe, Kacyiru na Remera.

Ati “Turi amatsinda ane, iyo habaye iserukiramuco twese twihuriza hamwe bitewe n’aho duturuka ubundi tukarushanwa. Muri twe harimo abahanga imideri n’abamurika imideri.”

Shumbusho Takia na we uri muri aba bamurika imideri, avuga ko bahura n’imbogamizi zirimo kubura ubushobozi no kwemererwa kumurika imideri mu bitaramo bikomeye mu Rwanda.

Yagize ati “Nta mahirwe tubona yo kumurika imideri mu bitaramo bikomeye, ahanini biterwa n’uko nta burambe dufite kandi n’amatsinda tubarizwamo ntaramenyekana.”

Impano zo ngo barazifite icyo bakeneye ni ukuba bahabwa umwanya bakerekana icyo bashoboye.

Si abakuze gusa bamurika imideri muri aya matsinda kuko n’abana bahabwa umwanya bakerekana ubushobozi bifite, kikaba ari kimwe mu byerekana ikizere cy’ejo hazaza mu mwuga wo kumurika imideri mu Rwanda.

Abakiri bato bamurika imideri muri iri serukiramuco ritegurwa na Young Life Rwanda
Bafite impano zijyanye no kumurika imideli ariko ngo mu Rwanda ntibaragirirwa ikizere mu bitaramo bikomeye 
Barifuza kumurika imideri mu bitaramo bikomeye mu Rwanda

Robert KAYIHURA
UM– USEKE.RW

Subiza

Your email address will not be published. Required fields are marked *