• 27/01/2020 1:09 51

Yiyise chef wa REG abaka amafrw ngo abahe umuriro kuko Perezida yenda kubasura

Sosiyete y’Igihugu ishinzwe ingufu (REG/Rwanda Energy Group) uyu munsi yatahuye umuturuge wiyitiriye kuba ari umuyobozi muri iyi sosiyete watse amafaranga abaturage bo mu kagari ka Nyabugogo, umurenge wa Kigali mu karere ka Nyarugenge abizeza kubagezaho umuriro w’amashyanyarazi ngo kuko umukuru w’igihugu yenda kubasura atazasanga badacana.

Basanze bamaze gushinga amapoto abiri

Habatuma Daniel umwe mu baturage 10 bari bagiye guhabwa umuriro na Nkurunziza wiyitiriye kuba umukozi wa REG, avuga ko muri kariya gace gaherereye ahahawe izina rya Norvege bamaze igihe barasabye iyi sosiyete kuza kubagezaho umuriro w’amashanyarazi bagategereza bagaheba.

Muri iki cyumweru bumvise inkuru bo bafataga ko ari nziza ko noneho aya mashanyarazi bategereje igihe kinini bagiye kuyahabwa.

Ati “Barampamagaye barambwira ngo abandi bose bazanye ibyangombwa byabo badepoje ngo banacukuye aho bashinga amapoto ngo noneho wa muriro bagiye kuwuduha.”

Na we yahise azana ibyangombwa bye kugira ngo adacikwa n’aya mahirwe, asanga bacukuye iriya myobo yo gushyiramo amapoto bahita babaka 9000 Frw yo kwishyura abayicukuye.

Avuga ko ejo hashize uriya mugabo wiyita ko ari umuyobozi muri REG yazindukiye hariya agahamagara abaturage ababwira ko ibikoresho bimwe byahageze [insinga zari zahageze] ibindi nk’amapoto bikaba biri mu nzira.

Uriya wiyitaga Chef wa REG wavugaga ko agiye kubanza guha umuriro abantu 10, ngo yababwiraga ko namara kubashyiriraho za mubazi [Cash Power] bazahita bamuha ibihumbi 200 Frw.

Habatuma Daniel ati “Ubwo abantu 10 twaravugaga tuti reka dushake ibihumbi mukumyabiri makumyabiri buri muntu atuzanire cash Power namara kuyashyiraho ducana tumwishyure yigendere.”

Uyu muturage avuga ko uriya wiyitaga umukozi wa REG yabizezaga ko uyu munsi barara bacanye, avuga ko yaje abizeza ibitangaza.

Ati “Yaje avuga ko hari promotion [ubwasisi] yaje yo guha umuriro abaturage batuye hafi ya ziriya nzu [inyubako nziza zubatse muri kariya gace] atubwira ko Perezida agiye kuza inaha ngo badashaka ibibazo by’uko nta muriro dufite,…Yarabitubwiye tugira ikizere turishima.”

Habatuma Daniel na we watawe muri yombi ngo akorweho iperereza, avuga ko uriya mugabo bari banamuhaye ibihumbi 50 Frw byo kwikoreza amapoto abiri.

Nshimiyimana Jacques wafatiwe mu cyuho ari mu mirimo yo guha amashanyarazi bariya baturage, avuga ko asanzwe ari umutekenisiye mu by’amashanyarazi akaba yari yahamagawe n’uriya wiyitaga umukozi wa REG ngo amuhe ikiraka cyo kuza gukora ibikorwa byo kugeza amashanyarazi muri ziya ngo agahita aza gusuzuma uko ikiraka giteye.

Avuga ko akihagera akabonana n’uriya wari umuhaye ikiraka ngo bari babonanye bwa mbere, yahise agenda amubwira ko hari ibikoresho yibagiwe.

 

Uyu wiyitaga Chef wa REG ngo yigeze gukoramo ikiraka…

Umuyobozi w’Ishami rya REG mu karere ka Nyarugenge, Martin Mutsindashyaka avuga ko amakuru y’ubu butekamutwe bayamenye uyu munsi ko hari uwiyitiriye ko ari umukozi wa REG uri gukora ibikorwa byo guha amashanyarazi abaturage bo muri kariya gace.

Ati “Ndangira ngo mbatangariza ko mu ishami rya REG nta murimo n’umwe ukorerwamo ishami ritabizi, n’iyo baba ari bagenzi bacu ba EUCL cyangwa EDCL baraza bakatubwira, branch manager na technical engineer tugahagurukana tukajya kureba aho hantu.”

Avuga ko uriya Nkurunziza wiyise umukozi wa REG yigeze kuba umwe mu banyabiraka iyi sosiyete ijya iha akazi k’igihe runaka.

Ati “Icyo nabashije kumenya ni uko yagiye abyuriraho akiyitirira ko ari umukuru wa REG.”

Ngo yari afite amakuru ko bariya baturage bandikiye REG bayisaba kubagezaho umuriro, byose akabyiririraho akaza kubatekera umutwe.

Avuga ko ibikorwa nk’ibi byangiza ibikorwa Remezo bya REG kuko abantu nka bariya bakoresha ibikorwa bitujuje ubuziranenge bigatuma hagaragara ibibazo mu mashanyarazi birimo gucikagurika no kubura.

Avuga kandi ko abiyitirira abakozi ba REG bagenda baka amafaranga abaturage kandi bizwi ko ubu basigaye bahabwa amashanyarazi ku buntu bakagenda bishyura ibikorwa byakozwe kumuriro bagenda bagura.

Inzego z’umutekano zaherekeje ubuyobozi bwa REG ahariho habera kiriya gikorwa ntizabashije gufata uriya Nkurunziza gusa ngo zirakomeza kumushakisha.

Martin Mutsindashyaka wo muri REG Nyarugenge avuga ko ibikorwa nka biriya byangiza ibindi bikorwa remezo
Insinga bariho bakoresha

Martin NIYONKURU
UMUSEKE.RW

1 Igitekerezo

  • Kwambura abaturage yitwaje uruzinduko rwa HE!! Muzarya n’akataribwa sha!
    Gusa nenze imikorere ya REG! Aho umuntu abiyitirira akambura abaturage bigeze hariya!
    Kandi wumvise ko bemera ko bajya bakorana n’uwo munyamitwe!

Subiza

Your email address will not be published. Required fields are marked *