• 12/12/2019 3:06 20

Utunyugunyugu n’amazi make mu gishanga cya Rwinkwavu byahombeje abahinzi

Kayonza: Abaturage bo mu murenge wa Mwiri na Rwinkwavu bishyize hamwe bahinga umuceri, ubu bavuga ko bahombye umusaruro ungana na kimwe cya kabiri cy’uwo bari bategereje mu gihe k’ihinga cyashize kubera utunyugunyugu twibasiye imyaka no kuba amazi bakoresha buhira umuceri abageraho ari make.

Uyu ni Hatangimana Theoneste nubwo ngo barumbije mbere ubwo bahingaga umuceri ubu bafite ikizere ko bazabona umusaruro mwiza

Theoneste Hatangimana akorera muri Koperative Indatwa y’abahinga umuceri muri iriya mirenge ibiri y’Akarere ka Kayonza, bakorera mu gishanga cya Rwinkwavu. Arangije ishuri ngo yahisemo gukora aka kazi k’ubuhinzi aho gutegereza ko Leta izamuha akazi.

Igishanga cyabo cyarimo uturima dutatanye, bahinga amateke, ibijumba, imyumbati n’ibindi ariko biyemeza guhuza ubutaka bahinga umuceri.

Muri uyu mwaka ariko ngo byarabagoye cyane kuko imiyoboro igeza amazi mu mirima ntiyahageza neza kubera ko ari make.

Uyu avuga ko abashinzwe kuhira imirima ari babiri kandi ngo bakora mbere ya saa sita kuko bahembwa amafaranga make (20 000Frw) ngo bajya kwikorera akandi kazi.

Ati “Ni bwo bwa mbere ku ruhande rwacu twahinze umuceri ariko twarahombye kubera ikibazo cy’ubukoko (utunyugunyugu) n’ikibazo cyo kutabona amazi neza, ariko urebye umuceri dufite ubu utandukanye n’uw’ubushize dufite ikizere ko tuzeza neza.”

Hatangimana avuga ko guhinga umuceri babifiteho inzozi yo kuzaba abakire abaze ko kuri Are 20 ashobora kwezaho Toni y’umuceri yabara mu mafaranga akaba 290 000Frw, yakuramo ayo asabwa yose akumva ko azasagura amafaranga menshi.

Ati “Twaretse guhinga ibyo twahingaga mbere, tujya muri Koperative tubanza guhinga ibigori ariko na byo tukabona ntibiduha amafaranga cyane, ukabona niba muri Are 20 uri kweza imifuka ine y’ibigori (Kg 400) ukabona amafaranga ntuyabona neza, ariko ubu wahinga umuceri waba wahuye n’ibihe byiza, amazi yabonetse neza, ifumbire yabonetse ugakurikiza neza inama za Agronome, ukeza nibura Toni y’umuceri.”

Mugabowindekwe ahinga umuceri akanatubura imbuto yawo, mu gihe k’ihinga gishize yahombye asaga ibihumbi 700Frw

Mugabowindekwe Yeremiya ni uwo mu mudugudu w’Akayebe, mu kagari ka Gihinga mu murenge wa Rwinkwavu, avuga ko yahombye byinshi.

Ati “Nari nahinze Are 180 nagombaga gusarura Toni 10 cyangwa Toni umunani  z’umuceri none nasaruye Toni 1,86. Nari nashoye miliyoni imwe n’ibihumbi 100Frw none amafaranga menshi nshobora kubona ni ibihumbi 400. Urumva ko igihombo ari kinini cyane.”

Abaturage basaba ko ikiguzi batanga ku mazi kigera ku Frw 10 000 kuri paricel imwe y’umuceri (m40/m50) buri mwaka n’umusoro w’Akarere wa Frw 16 000 byagabanywa kubera ko ngo biri mu bizamura ibihombo abahinzi bagira.

Kuri Mugabowindekwe ngo ikiguzi cy’amazi cyakabaye Frw 1000 kuri parcel y’umuceri, abaturage na bo bagakora umuganda wo kuyitunganya.  Kuri Parcel imwe umuhinzi ngo ashobora gusaruraho Kg 400, uw’intangarugero muri kiriya gishanga yasaruyeho Kg 800.

Amazi ajya mu gishanga cya Rwinkwavu ngo ni make cyane ndetse barayibana. Urugomero ruvaho aya mazi ruri ahitwa Rwakigeri hagati y’imirenge ya Kabarondo na Murama, amazi akora urugendo rwa Km 30 kugira ngo agere ku bahinzi ngo niyo mpamvu agera hariya yacitse intege. Abaturage bakifuza ko hubatswe ikigega hafi yabo byajya bibafasha kubona amazi afite ingufu.

Ngabonziza Hussein ni Agronome w’Akarere ka Kayonza, ubwo aba baturage bavugaga ibibazo byabo ku wa kabiri w’iki cyumweru yari ahari, avuga ko bagiye gukora ubuvugizi kuri bimwe. Ku kibazo cy’amazi make mu gishanga cya Rwinkwavu yavuze ko batekereza uko bakora undi muyobora wavana amazi hafi kuruta kuyakura kure.

Kwizera Emmanuel ukurikirana ubuzima bwa buri munsi bwa kiriya gishanga avuga ko gikora ku mirenge ya Mwiri, Rwinkwavu na Gahini y’Akarere ka Kayonza, ngo Ha 1000 nizo zitunganyije zihingwa ariko izigera kuri Ha 700 ni zo zihingwaho umuceri izindi Ha 300 zihingwaho ibigori, ibishyimbo na soya kuko hatageramo amazi neza. Avuga ko harimo gutunganywa izindi Ha 460.

Uretse ikibazo cy’amazi make kinatuma igishanga kitabyazwa umusaruro 100% ngo gihingwemo umuceri, ngo hari ikibazo cy’umuguzi w’umuceri witwa Izimana Indaustry Ltc (Ex-Kayonza Rice) ngo bagiye bishyura nabi abahinzi bituma Babura uburyo bwo guhinga nanone.

Appolinaire Mupiganyi Umunyamabanga Nshingwabikorwa wa Transparency Rwanda ishinzwe kurwanya ruswa n’arengane, avuga ko binyuze mu mushinga Imabaraga ukorera muri Kayonza na Nyanza, abahinzi bagira uruhare mu mihigo y’Akarere, bagatanga ibitekerezo mu bibakorerwa bitewe no kubazamurira ubushobozi mu myumvire.

Mupiganyi avuga ko ari intambwe ikomeye kuba abahinzi batagipfukiranwa, bakagaragaza ibyo babona bitagenda n’uko byakosorwa kugira ngo ubuhinzi bwabo bugende neza.

Ibibazo by’Ahinzi byageze ku muyobozi wari uhagarariye Banki y’Isi, Umuyobozi muri Minisiteri y’Ubuhinzi n’Ubworozi ushinzwe igenamigambi ndetse no ku muyobozi ukora mu ishami rishinzwe gutanga serivise nziza no kwimakaza imiyoborere muri RGB.

Appolinaire Mupiganyi asanga ari intambwe ishimishije kuba abahinzi bagira ijambo mu mihigo y’Akarere
Ibibazo by’aba baturage byumviswe n’inzego zinyuranye harimo na Banki y’Isi
Abaturage bavuga ko badafite amazi ahagije yo kuhira umuceri wabo bikabateza ibihombo
Ubuso bwose bw’igishanga cya Rwinkwavu bwakabaye buhinzweho umuceri ariko ngo hari Ha 300 zidafite amazi ahagije zihingwaho indi myaka

Amafoto@HATANGIMANA

HATANGIMANA Ange Eric
UMUSEKE.RW

Subiza

Your email address will not be published. Required fields are marked *