• 11/12/2019 10:07 04

Ushinzwe umutekano mu mudugudu ‘aravugwaho gukubita’ umukecuru

Karongi- Rubengera: Suzana Mukakimenyi uvuga ko yashatse umugabo muri 1968 avuga ko yakubiswe n’ushinzwe umutekano mu mudugudu atuyemo wa Kabeza, Akagali ka Kibirizi, Umurenge Rubengera. Amafoto Umuseke wafashe y’uyu mukecuru kuri uyu wa Gatandatu umusanze iwe yerekana ingingo ze zirimo ukuguru n’ukuboko zabyimbye.

Suzana Mukakigeri avuga ko yahohotewe n'ushinzwe kumurindira umutekano
Suzana Mukakigeri avuga ko yahohotewe n’ushinzwe kumurindira umutekano

Mukakimenyi avuga ko imvano yo gukubitwa kwe yatangiye mu cyumweru gishize ubwo bamuregeraga ko umushumba we yiba, icyo gihe hakaba hari habaye inama rusange y’abatuye Umudugudu wa Kabeza.

Icyo gihe ngo ubuyobozi bw’Umudugudu bwafashe umwanzuro wo guca uwo mushumba mu mudugudu wabo.

Avuga ko yagiye kubaza uko inka izabaho kandi umushumba we bamuciye mu mudugudu nta cyaha cyamuhamye, ushinzwe umutekano ngo amusubiza ko inka yahawe nimunanira bazayiha undi we bakamuha ihene.

Nyuma yo kumva icyo gisubizo uyu mukecuru nticyamushimishije nawe abwira uyu muyobozi ku mudugudu ati: ‘Iyo hene bazayihe So!

Ku wa Kane w’iki  Cyumweru nibwo ngo uyu ushinzwe umutekano witwa Shadrack Bimenyimana yateze Mukakimenyi bahuriye mu nzira muri metero nke kugira ngo agere iwe aramukubita cyane.

Inka Susan Mukakimenyi atunze yayihawe na FARG nk’umukecuru warokotse Jenoside yakorewe Abatutsi utishoboye.

Umwe mu baturage bari mu nama yavugiwemo biriya bivugwa ko byatumye Bimenyimana asaba ko Mukakimenyi yahabwa ihene niba adashoboye inka, witwa Innocent Ntakirutimana yabwiye Umuseke ko atari akwiye kuvuga biriya.

Ati: “Ntabwo byari bikwiye kubwira umukecuru w’incike ngo bazamwambure inka bamuhe ihene.”

Umunyamakuru w’Umuseke yahamagaye Shadrack  Bimenyimana ngo atubwire icyo avuga ku byo umukecuru Mukakimenyi amushinja, amaze kumva ibyo dushaka ko adusubizaho ahita afunga telephone ye, ntiyongera kwitaba.

Muri iki cyumweru inama nyunguranabitekerezo yahuje inzego zitandukanye n’abagize Sena y’u Rwanda yagaragaje ko kubera impamvu zinyuranye zirimo kudakemura neza ibibazo bituma abaturage ubu nta kizere bafitiye inzego z’ibanze.

Susan Mukakigeri avuga ko yahohotewe n’ushinzwe kumurindira umutekano

Sylvain NGOBOKA
UM– USEKE.RW/Karongi

9 Ibitekerezo

  • Ariko izi mbwa uziko zimenyera,nta soni ukubahuka umukecuru?ariko uziko hari abataye umuco,ubwose nkuwo akaba umuyobozi ate?nahite ahanwa kandi avanweho,ni gute bashyiraho bene aba batabanje kureba imyitwarire yabo?bakagombye guperereza imyitwarire y umuntu mbere y uko bamushyiraho.bavaneho uwo mugome vuba na bwangu ejo utumva yanamwishe ,ikintu gitinyuka gukubita umukecuru no nta mu mutwe kigira no kwica cya kwica.

    • Kurwana ubwabyo ni ikimenyetso cy’uburere buke. Gukubita umuntu ukuze nk’uyu byo bikaba amahano. Ni ubunyamusozi. Mumuhane hisunzwe amategeko kandi mushake undi muyobozi wubaha abaturage.

      • My muco nyarwanda harimo kubaha abayobozi nubwo baba bakiri bato kuri twe. Gutuka umuyobozi nta cyaha yagukoreye nabwo ubwabyo ni uguta umuco. Ntabwo umuntu ashobora kwitwaza ko akuze ngo atuke umuyobozi w’umwana kuri we. Rwose dukwiye kureka amarañgamutima tugasesengura ibibazo bihari dukurikije amategeko. N’ubwo uriya mukecuru yahuye n’ibibazo byaranze amateka y’abanyarwanda ntabwo yakagombye kubyitwaza NGO akore ibyo yishakiye kugera naho atuka umuyobozi.

  • Uyu muyobozi akwiye gukurikiranwa byihuse

  • None se ko umushumba ibyaha byari bibuze, bamuhoye iki? Bamutesheje akazi, babangamira umukecuru, nkaho bamushajishije neza, baramushyira ku nkeke. Abantu bageze muri iriya myaka, akantu gato karabahungabanya, cyane ko noneho bari banamubwiye ko bazamunyaga kandi bivuzwe n’uwakamurengeye. Biragaragara ko uyu muyobozi adakorera abaturage . Ikibazo cyose kiri ku muturage, umuyobozi agomba gushaka inzira zose kugirango gikemuke mu mahoro. None we yahisemo kumukubita . Ibyo ni ibyakera ntazongere n’ahandi azajya hose. Buriya kandi azahita abihakana , azavuga ko atigeze anamukoza urwara. ABAYOBOZI BARAGWIRA.

  • Uyu bamufunge. Gukubita, gukomeretsa, ingengabitekerezo ya Genocide, kwangisha abaturage ubuyobozi, ikigarasha,…

  • Mbega umuyobozi! Aba nibo tujya twumva ngo yakubise cyangwa yishe se, nyina, uwo bavukana, gufata ibibondo ku ngufu…… Ubu koko umubyeyi w’iyi myaka ko afatwa nk’umwana, umuntu noneho w’umuyobozi ati ndagukubita kuko wankangaye? Mfite amatsiko y’imyaka iyi ngirwa muyobozi ifite! Umuco waratakaye bigeze aha nta kubaha ababyeyi? Ese umubyeyi ungana nyogokuru wawe yakubwira nabi yibeshye bwo umwihoreye byagutwara iki? Iyi no 0 tolerance bumva nabi?????????? 0 tolerance ni ukurwanya ibibi si ukwerekana ko ukomeye ukuvuze wese umumena nk’utararezwe! Mwa bana mwe ntimukadukoze isoni. Burya gucisha make, kwihangana no kubabarirana ni byo byubaka umuryango, ni byo bigira umuntu igihangange kurusha ndakwasa sha niyo byaba nyuma y’urupfu rwe, gusekwa, ………. Urugero ni Umwana w’Imana wabambwe ku musaraba akicwa ariko akababarira abamwishe.

  • Uyu mutegetsi yabicyemuye nabi, yari kwisunga amategeko uriya mukecuru akabanza agashinjwa koneshereza abaturanyi ndetse akanishyura ibyangijwe. yiri inka akishyura, iyo imodoka yawe igonze umuntu ntabwo hishyura chauffeur wari uyitwaye ahubwo hishyura nyiri imodoka naho guca umuntu mu gihugu cye ni indwara yatwokamye kuva mu ngoma za cyami none dore igihugu kibaye ubukombe tutarabireka. Ariko kandi uyu mukecuru nawe ntiyagombye kubahuka umuyobozi we ngo amusubize gutyo, niba yari amubwiye koazahabwa ihene birumvikana neza kuko bigaragara ko adashoboye kuyorora niba ahitamo kuyijyana mu myaka y’abandi, yagombye korora itungo ashoboye. Kubihuza no kuba yaracitse ku icumu ni ubugoryi, ntibyakanabaye urwitwazo, wasanga haubwo yoneshereza abndi abyitwaaje, kuko birazwi ko abantu bose bategeswe kororera mu kiraro.

  • Ubundi burigihe ntawushobora gusubiza neza mugihe cyose yumvise ikibazo nabi, kuba umukecuru yaramubajije uko inka igiye kubaho nyuma yokwirukana umushumba udahamwa nicyaha, ntaho byari bihuriye nokumusubiza ko niba inka imunaniye bazayimunyaga bakamuha ihene. gukubita umuntu ugeze muzabukuru kuriya ntahobyabaye n’amahano mumahame mbwirizamuco nyarwanda, ariko bambi nawe siwe ahubwo nubushobozi buke mugukoresha inyurabwenge nokurebakure yifitemo. Gusa uwomubyeyi akeneye kurenganurwa kuko singoma yogukubitwa nabaribwa nimbaraga bayobowe nibitekerezo byabo bigufi.

Subiza

Your email address will not be published. Required fields are marked *