• 19/01/2020 8:56 31

USA yongeye gufungura Ambasade muri Somalia

Nyuma y’imyaka 27 Leta zunze ubumwe za Amerika zongeye gufungura Ambasade muri Somalia, kuri uyu wa Kabiri, Donald Yamamoto ni we wagizwe Ambasaderi wayo. Amerika ifite amateka akomeye muri Somalia.

Ambasaderi Donald Yamamoto niwe ugiye guhagararira USA muri Somalia

Ibiro bya Perezida wa USA byavuze ko gufungura Ambasade byerekana intambwe Somalia imaze gutera mu kugarura umutekano ku butaka bwayo.

Muri 2015 John Kerry wari Umunyamabanga wa USA ushinzwe ububanyi n’amahanga yasuye Somalia avuga ko igihe kigeze ngo igihugu cye kirebe uko cyagaruka i Mogadishu.

Ambasade ya USA muri Somalia yafunze imiryango muri Mutarama 1991 ubwo igihugu cyari kimaze kujya mu ntambara bamwe bashinja America kuyigiramo uruhare.

Muri 2013 USA yatangaje ko yemera ko Somalia iyobowe neza kandi ifite Guverinoma ishingiye ku mategeko n’ubushake bw’abaturage.

Umuvugizi w’Ibiro bya Perezida wa USA yagize ati: “Iki gikorwa cy’amateka kirerekana ko Somalia iri mu nzira nziza yo kugarura amahoro arambye mu baturage. Twemera ko iki gihugu gifite Guverinoma ihamye, muri 2013 twahise dutangira inzira yo kureba uko twakongera kugirana umubano na cyo.”

Yavuze ko Somalia ubu ifite Demukarasi kandi bazakomeza gukorana na yo kugira ngo ikomereze muri iyo nzira.

Somalia na USA byari bisanzwe bibana binyuze muri Ambasade ya USA iri Nairobi, Kenya.

Amerika ishaka ijambo no gushyira ijisho henshi ku isi, ikabona Somalia nk’ahantu heza kuko iri mu ihembe rya Africa ku nyanja y’Abahinde.

Aha ni ahahoze hakorera Ambasade ya US i Mogadishu mbere y'uko ifunga mu 1991
Aha ni ahahoze hakorera Ambasade ya US i Mogadishu mbere y’uko ifunga mu 1991

US yavuye nabi muri Somalia

Mu ntambara yo kurwanira ubutegetsi  yari ihari kuva mu 1991, Amerika yabyinjiyemo Perezida Georges H. W. Bush yemera ingabo zo kujya guca intege abahiritse Mohamed Siad Barre.

Hariyo imitwe myinshi yitwaje intwaro ariko ikomeye yari iyobowe na Ali Mahdi Muhammad  na  Muhammed Farah Aydid.

Kubera ubukene bukomeye abaturage barimo butewe n’uko ubuhinzi, ubworozi n’ubucuruzi bitashobokaga, UN yashyize igitutu ku bakuru ba ziriya nyeshyamba cyane cyane Farah Aydid, nyuma aza kwemera ko hoherezwa imfashanyo.

Icyo gihe abaturage miliyoni 4.5 bari bakeneye ibiribwa byihutirwa ariko byari bigoye kubibagezaho kubera umutekano muke no gushimuta abazana imfashanyo.

Mu mpera za 1992 Perezida George H.W. Bush yatanze igitekerezo muri UN asaba ko ingabo ze zagaba igitero muri Somalia cyo gukura bariya barwanyi ku izima.

Taliki 09 Ukuboza, 1992 abasirikare 25 000 ba USA batangiye kugera muri Somalia.

Ingabo za US byarazigoye kuko barwanaga n’abantu benshi kandi batazi, nta mihanda, nta n’ibibuga by’indege, kenshi izi ngabo bazitegaga ibico.

Perezida Bill Clinton wasimbuye Bush amaze kubona ko nta musaruro biri gutanga yategetse ko ingabo ze zigabanywa. Muri Kamena, 1993 hasigayeyo abasirikare 1 200.

Bidatinze ibintu byabaye bibi kurushaho ubwo abasirikare ba UN bagera kuri 24 bakomokaga muri Pakistani bicwaga n’abarwanyi ba Farah Aydid.

Mu byumweru bibiri byakurikiyeho ingabo za USA zifatanyije n’iza UN zagabye igitero ku birindiro by’abarwanyi ba Aydid ariko kirangira badashoboye kumufata.

Mu mpera za Kanama, 1993 abasirikare kabuhariwe ba USA 400 boherejwe muri Somalia bahawe amabwiriza yihariye yo gufata Farah Aydid. Byageze mu Ukwakira bataramufata ariko baramaze gufata bamwe mu byegera bye.

Nyuma gato baje kubona amakuru ko Aydid n’abakuru b’inyeshyamba ze bafite inama bari bukorere muri Hotel yitwa Olympic Hotel i Mogadishu.

Ingabo za USA zakoze gahunda yo kugaba igitero simusiga kirimo abasirikare kabuhariwe bagize umutwe witwa Delta Force.

Aba basirikare baje na kajugujugu, hasi hari abandi barinze agace gakikije aho iriya nama yarimo ikorerwa.

Bahuye n’uruva gusenya

Imwe muri kajugujugu ya bariya ba comando yaje kuraswa igeze hafi ya Hotel Olympic.

Ingabo za USA zari ku butaka zahise zihutira kuza gutabara bamwe mu basirikare bari muri iyo kajugujugu ariko zihura n’amasasu y’abarwanyi ba Aydid bari bahishe hafi aho kandi ari benshi.

Mu kanya gato indi kajugujugu y’ingabo za USA na yo yarahanuwe.  Abarwanyi ba Aydid bahise biyumvamo intsinzi bajya  mu mihanda ari benshi bashakisha ingabo za USA zari nke ugereranyije na bo.

Urugamba rwamaze amasaha 17. Abanyamateka bo muri USA bavuga ko igihugu cyabo cyatakaje abasirikare 18 hakomereka abandi 84. Gusa ni imibare y’uruhande rumwe.

Ku ruhande rw’abarwanyi ba Aydid bavuga ko hapfuye bake kuko bari biteguye urugamba kandi bazi aho rubera kurusha ingabo za USA.

Ingabo za Amerika zahuye n’akaga gakomeye, ndetse bisigara mu mateka y’ingabo zabo kuko hari izo bafashe bakazikurura mu mihanda i Mogadishu bavuga ko batsinze America.

Hollywood yabikinnyemo filimi nyinshi zimwe zivuga ukuri ku byabaye n’izindi zigaragaza ko Amerika yatsinze.

Nyuma gato ya ruriya rugamba Perezida Bill Clinton yategetse ko ingabo zose za US ziri muri Somalia zitaha UN na yo ibigenza ityo no ku bakozi bayo, Somalia bayirekera ibyayo baragenda. None ubu baragarutse.

UM– USEKE.RW

0 Igitekerezo

  • hhhhh iyi nkuru mwayikoze neza rwose. Reka twizere ko bitazabagendekera nka mbere. Western countries bashaka guhatira abantu bose kubaho nkabo, nk’uko babishaka, bagasahura imitungo y’isi yose ku ngufu. Niyo mpamvu intambara zitazarangira.

Subiza

Your email address will not be published. Required fields are marked *