• 19/01/2020 10:00 04

Urubyiruko rwifuza guhabwa serivisi zo kuboneza urubyaro kuva ku bangavu b’imyaka 15

Bamwe mu rubyiruko bagaragaje ko hakurwaho inzitizi ku guhabwa serivisi zo kuboneza urubyaro mu bangavu, kuko usanga iyo batewe inda bakiri bato bibagiraho ingaruka zishobora gutuma basazana imibereho mibi.

Dr Kagaba avuga ko haragaragaye ingingo zimwe na zimwe mu mategeko zibangamira abna ku kubona serivisi zo kuboneza urubyaro, bityo ko yavugururwa

Nyuma y’inama y’iminsi ibiri yateguwe ku bufatanye n’inzego zirimo Health Development Initiative (DHI), Imbuto Foundation, Minisiteri y’Ubuzima binyuze mu kigo cya RBC, bamwe mu rubyiruko bagiye baterwa inda zitateguwe bagaragaje ko habayeho koroherezwa, kuri bo mu bijyanye no kubona ziriya serivisi byabafasha igihe bahuye n’ibishuko bagakora imibonano mpuzabitsina.

Bavuga ko kuboneza imbyaro byabarinda kwiheba no kumva abaye igicibwa kuko yatewe inda.

Mushimiyimana yabyaye akiri muto avuga ko kuri ubu umwana w’umukobwa yugarijwe na byinshi bimukururira kuba yashukwa byoroshye, agasambanywa.

Avuga ko uburyo bwo kuboneza urubyaro mu bakiri bato bwagabanya inda zitateganyijwe ziterwa abangavu.

Ati “Birakwiye ko serivisi zo kuboneza urubyaro zagezwa no mu bangavu kuko iyo atwaye inda usanga n’ababyeyi bamutererana akisanga ari kuruhana n’umwana.”

Ibi abihuza n’abandi batifuje ko amazina yabo atangazwa, bavuga ko nta mpungenge ikwiye kubaho kuko usanga akenshi umwangavu utewe inda ahita ava mu ishuri ndetse n’ababa barabateye inda ntibabafashe kwita kuri uwo mwana.

Abona ko serivisi yo kuboneza urubyaro ku myaka 15 y’ubukure ku bangavu yagira icyo ifasha mu kurwanya inda zitateganyijwe.

Umuyobozi Umuryango ugamije guteza imbere ubuzima (Health Development Initiative, DHI) Dr. Kagaba Aphrodis avuga ko hari zimwe mu ngingo z’amategeko zikwiye kuvugururwa, imbogamizi zigaragara mu gutanga serivisi zo kuboneza urubyaro ku bana zikavaho.

Ati: “Umwana wese ufite imyaka 15 ashobora kwifatira umwanzuro kuri serivisi z’imyororokere. Imbogamizi zirimo n’uko mu mategeko bivugwa ko niba ukeneye serivisi zo gukumira inda kimwe n’izo kwivuza zose umwangavu asabwa ko n’umubyeyi we aba ahari.”

Avuga ko no mu Bigo Nderabuzima hakwiye gushyirwamo ahantu ingimbi n’abangavu bajya bisanzurira bakagaragaza ibyifuzo byabo, ndetse hakaba ari n’ahantu uwagize icyo atinya kuvuga yajya asanga abaganga bashinzwe kumwumva kandi bakamufasha kubona serivisi asabye.

Ikindi cyagarutsweho cy’uko ingimbi n’abangavu bagenerwa umuboroba wabo, avuga ko bikwiye kuko waba umuyoboro abana bajya baboneramo inyigisho ku myororokere.

Ati “Ikibazo k’inda zitateganyijwe akenshi ziterwa no kuba abangavu baba badafite amakuru ahagije. Umugoroba w’ingimbi n’abangavu urakenewe kugira ngo babone amakuru ahagije ajyanye n’imyororokere.”

Ubushakashatsi bwakozwe n’Ikigo k’Igihu k’Ibarurishamibare, NISR bwo muri 2015, bugaragaza ko abana batewe inda zitateganyijwe bari hagati y’imyaka 15-19 bangana na 7.5%.

Urubyiruko rugaragaza ko guterwa inda biteye ipfunwe cyane kuruta gufata imiti yo kuboneza imbyaro

Dieudonne NSHIMIYIMANA 
UMUSEKE.RW

9 Ibitekerezo

  • aba bakobwa baragira bati kuko ibishuko ari byinshi kdi tukaba tudashoboye kubyirinda nimuduhe ibishinge mudushyiremo nudupira mureke tujye twisambanira nta nkomyi.

    • Ikosa ntabwo ari iry’aba bana b’abakobwa.Ikosa ni abemera kubaha uburenganzira bwo gukoresha Capotes n’Ibinini.Mu maso y’imana,bose ni abanyabyaha.Kuboneza urubyaro bizatuma abangavu biyandarika ku bwinshi.Niba koko turi abakristu,tureke gukora ibyo Imana itubuza.Twirinde guha uburenganzira abangavu bwo gukoresha Capotes n’Ibinini.Biteye isoni.

  • Nonese aho kujya kuboneza urubyaro ngo adatwita ahubwo yabanje akikuramo kujya gukora iyo mibonano nge ndumva ku giti cyange ari ikibazo wenda izo nda zizagabanuka ariko twitegure izo ndwara zandurira mu myanya ndangagitsina.BIRAKAZE

  • Birakaze

  • Aaaaaaaah!ese ubu uyu Niwo Muti wikibazo kko.eee??Aho Gufatira ibahano bikarishye uwateye inda Uwo Mwana ngo nabone urubyaro ku Myaka 15??Ariko Murumva u uburemere byibi Bintu?K
    KUBONEZA URUBYARO KU MYAKA 15??eeeeeeee!Aaaaah nzabandora Ni’umwana w’umunyarwanda

  • Umugoroba w urubyiruko ubayeho ukanitabirwa wagira akamaro rwose mu guhugura izo ngimbi ku buzima bw imyororokere. Ariko kuboneza mu myaka 15 kubera gutinya kubyara ntabwo ari umuti ahubwo bigishwe ba menye uko bakwifata ikindi batozwe indangagaciro z umwali ukwiriye u Rwanda.

  • Wagira ngo bano bana ntibazi ko aho izo nda zinyura ari naho SIDA inyura!

  • Ibaze ariko urwo rubyiruko ubwarwo ni rwo rwisabira kuboneza urubyaro! Nange mfite umukibwa wa 15 ans. Natwara inda,ntihazagire uwiteranya na rubanda ngo arafunga uwayimuteye. Kereka naba yamufashe ku ngufu,kandi ntabwo azategereza inda yabaye nyarwege ngo abone kuvuga ko bamufashe. Harya itorero ry’igihugu ritazumvisha umwana n’umubyeyi ko ubusambanyi atari indangagaciro y’umunyarwandakazi,rizaba ridufashije iki? Hari kimwe mu bihugu duturanye,nabonye umukobwa ugera imyaka 20 nta mwana afite aba ari igicibwa. Niba na bo ariko baranababyara,none ab’iwacu ngo
    1 -Kuboneza urubyaro,biremewe
    2 -Gukuramo inda,biremewe
    3 -Sinshyigikiye abatera abo bana inda,ariko burya no kubafunga simbona ko ari cyo gisubizo. Wa mwana wavutse aba akeneye kurerwa. Kuki leta itashyiraho ingamba zihamye uwateye umwana inda akerekana ibimutunga. Muramufunze,nyina w’umwana ntamushoboye,iwabo ntibazamurerera,ab’iwabo w’ufunze ntibazamwemera nk’umwana wabo,bizahita bikurura andi makimbirane,kera kabaye muzasanga ahubwo muhemukira wa mwana wavutse atyo.
    Icyo njye ntekereza, leta nihaguruke,umwana abe uwa buri mubyeyi,acyahwe igihe yitwaye nabi. Uko habaho imihigo buri muntu akabazwa ibye,n’ababyeyi byakabaye bizima bahigiye abakobwa babo. Kuko imwe mu mpamvu zo gutuma ibi byose bibaho ni ukwihunza inshingano ku bana kwa bamwe mu babyeyi

  • Ariko koko ubu bwisanzure buratwerekeza he? None se bazajya baringaniza imbyaro bemerewe kuryamana n’abagabo cg abasore? Bazajya babanza bajye kwipimisha indwara zandurira mu mibonano se? Ubwisanzure bw’abana, uburenganzira bwabo, uburinganire, uburenganzira ku batinganyi, gukuramo inda, mwitege kuzasubiza ibyo mwakoze imbere y’intebe y’imanza y’Imana.

Subiza

Your email address will not be published. Required fields are marked *