• 20/01/2020 2:19 31

UR mu bushakashatsi ni iya kabiri mu karere nyuma ya Makerere

Kaminuza y’u Rwanda (UR) igaraza uko yateye imbere mu byiciro binyuranye kuva yahurizwa hamwe n’andi mashuri makuru ya Leta, nyuma yo kuvuga ku kwakira abanyeshuri no kubakurikirana, n’iterambere mu myigishirize, muri iyi nyandiko turavuga ku byo Kaminuza y’u Rwanda (UR) yagezeho mu bijyanye n’Ubushakashatsi n’ikizere bufitiwe.

Prof Deo Jaganyi ni Umuyobozi ushinzwe Ubushakashatsi muri UR avuga ko bwateye imbere mu myaka 5 ishize

Prof Deo Jaganyi  ushinzwe Ubushakashatsi mu kiganiro twagiranye yatangaje ko mu myaka itanu ishize Kaminuza yarenze iyo kuba ahantu ho kwigisha gusa, ihinduka ikigo kigamije ubushakashatsi (Research Led Teaching Universty).

Avuga ko muri iyi myaka itanu Kaminuza y’u Rwanda yahatanye n’izindi ku rwego rwa Africa no ku Isi, ndetse ihabwa ibigo by’indashyikirwa (Centers of Excellence) bine(4) biri ku rwego rwa Africa.

Ibi bigo ngo bikora neza kandi bitangirwamo ubumenyi ku bantu baturuka mu karere u Rwanda ruherereyemo bakiyongera ku Banyarwanda.

Prof Jaganyi ati “Dufite abahanga beza cyane bari muri Kaminuza y’u Rwanda bashobora guhangana n’abandi beza muri Africa no ku isi.”

Bitewe n’ikizere Kaminuza y’u Rwanda igenda igirirwa, umubare w’abanyeshuri biga bashaka Post Graduate Certificates wariyongereye. Mu myaka itanu ishize Kaminuza y’u Rwandi yari ifite abanyeshuri muri iki kiciro bagera kuri 448, ubu hari abasaga 1 500.

Abiga bashaka Master’s bari 263 mu myaka itanu ishize, ubu babarirwa mu 4 199 mu gihe mu bijyanye n’abakoreraga PhD, mu myaka itanu bandikaga abanyeshuri babiri gusa, ubu abiga bashaka PhD bagera kuri 204.

Abakozi ba UR na bo biyongereye ubumenyi nk’uko Prof Jaganyi abivuga, abagera kuri 53 ni bo bari bafite Master’s gusa, ubu bagera kuri 59% by’abakozi bose ariko ngo Kaminuza yifuza ko benshi bagira PhD kuko ni na bo babasha gufasha abandi kugera kuri PhD, icyo gihe mu myaka itanu bari 18 mu bakozi ba UR ariko ubu ngo ni 22% by’abakozi bose.

Kaminuza y’u Rwanda yazamuye cyane umubare w’inyandiko z’ubushakashatsi, zari 308 zandikwa buri mwaka mu myaka itanu ishize. Izi nyandiko ni zo zituma Kaminuza ishyirwa ku ruhando rw’izindi ku rwego mpuzamahanga.

Ubu inyandiko z’ubushakashatsi abahanga ba UR bandika ku mwaka zirabarirwa kuri 404 bivuze ko ziyongereyeho 31%.

Prof Jaganyi avuga ko ubwiza bw’inyandiko Kaminuza y’u Rwanda yanditse muri iyi myaka itanu bwatumye izigera ku 185 zemerwa ku rwego mpuzamahanga hakurikijwe ibigenderwaho mu gihe mu myaka itanu ishize izemewe ku rwego mpuzamahanga muri ziriya zanditswe ari 50 zonyine.

Avuga ko ibi byose bigerwaho bitewe no gukorana n’ibigo mpuzamahanga byo muri America, mu Bubiligi no muri Africa y’Epfo, n’ahandi.  Gukorana n’ibindi bigo by’ubushakashatsi ngo byikubye inshuro 12.

Prof Jaganyi avuga ko zimwe mu nyandiko zanditswe n’Abahanga ba Kaminuza y’u Rwanda ziri mu 10 za mbere nziza bigaragaza ko zifite impinduka zizana ku isi.

Kaminuza y’u Rwanda mu karere ni iya kabiri mu by’ubushakashatsi nyuma ya Makerere yo muri Uganda nk’uko Prof Jaganyi abivuga. Ashimira ikigo SIDA cy’igihugu cya Sweden gifasha Kaminuza mu bushakashatsi.

Prof Nelson Ijumba Umuyobozi Mukuru wa Kaminuza wungirije ushinzwe guteza imbere Imyigishirize n’Ubushakashatsi muri UR, avuga ko ibyo byose byagezweho bituma abantu bumva ko UR ari ikigo kigomba kugumaho.

Avuga ko nyinshi mu nyandiko z’ubushakashatsi Kaminuza yasohoye zivuga ku bibazo biriho mu Rwanda, haba mu bijyanye n’Ubuhinzi n’Ubuzima kandi ngo zirifashishwa cyane.

Prof Ijumba avuga ko Kaminuza y’u Rwanda nubwo yageze kuri biriya byose ariko igifite imbogamizi haba mu bikorwa remezo nk’ibikoresho byo kwigishirizaho mu mashuri, Internet ikiri nkeya ariko ngo hari n’inzira yo kubikemura binyuze mu bafatanyabikorwa.

Ikindi Kaminuza y’u Rwanda yahagurukiye ngo ni ukuzamura umubare w’abafite impamyabumenyi ya PhD bakava kuri 22% bakagera kuri 65% mu myaka 10 iri imbere.

Ikindi barimo gushyiramo imbaraga nka Kaminuza ngo ni ugusaba Abarimu kugira icyangombwa kigezweho gitangwa na Kaminuza y’u Rwanda kigaragaza ko umuntu azi umwuga wo kwigisha. Gutunga icyo cyangombwa ngo ni itegeko kuko kijyanye n’imyigishirize igezweho Kaminuza yifuza.

Mu zindi nzitizi zihari ngo ni Ururimi rw’Icyongereza rutavugwa neza haba ku Barimu n’Abanyeshuri, ariko amahugurwa ngo azakomeza gutangwa kugera ubwo uzananirwa azaba yemerewe kwirukanwa muri Kaminuza.

HATANGIMANA Ange Eric
UM– USEKE.RW

0 Igitekerezo

  • Harya ku rutonde rwa kaminuza zihagaze neza ku isi turi aba kangahe? Muri aka karere se izituri imbere ni zingahe? Ibi nibyo twita kwikirigita ugaseka! Nategereje ko Professor wivugwa ibigwi aduha ingero z’ubuvumbuzi nka 2 cyangwa butatu bwahinduye ubuzima bw’abanyarwanda ndaheba. Bamwe bajya babiteramo urwenya, ngo ntitukitiranye abashakashatsi n’abavumbuzi. Prof. arivugira umubare w’ababona masters na PHD n’ibitabo banditse bibitse muri za bibliotheques. Ubu uyu mwarimu azi umubare w’abagande, abanyakenya, abakongomani, abanyanijeriya, abashinwa, abahinde cyangwa abanyafrika y’epfo bari mu mirimo muri iki gihugu yakagombye gukorwa n’abenegihugu iyo baza kuba bakura muri kaminuza zacu ubumenyi bufite ireme rihagije? Wa mugani wa Prezida Kagame, kuki tutagabanya ibyo kwitaka, ngo dutakwe n’abo twagiriye akamaro? Ibikorwa byinshi, amagambo make.

  • I agree with this person called AKUMIRO

  • Uvuze neza nuko Akumiro nibura iyo atanga ingero 2 akareka kutubwira umubare wa masters’ thesis zuzuyemo plagiarism na Fraud of data.

  • Ubushakashatsi bra UR nacho bufasha mwiterambere bandana papers za theory gust zidafite akamaro nukwishimisha (old style) publishing paper nyishyi zitari impacted kubibazo byabaturage ntacyo bimaze .
    bahindure :
    urugero : duffle ba Drs,Professors muri electrical, electronics machanical nizindi field : NINDE WARI WAKORA NA ASSEMBLING YITOROSHI : AHANDI ZIKORWA ANABANA MO BURI PRIMERE
    Ninde fite prottype : sura makerere bakoze imodoka , system isoda maralia, nja Muhimbiri hospital tanzania, nya Nairobi university, nyja university of Tanzania, Arusha urebe project barite
    ABACU MURATUBESHYA ; MUHINDURE MUFATE PROJECTS ZABANA BATO MUZIHE UBUSHOBOZI NAHO UBUNDI NA MANAGEMENT YA UR NIKIBAZO HAGIZE UYIKORAHO UBUSHAKASHATSI SE
    THXS

  • Iyi nkuru njye wize atari menshi nayifata nk’igitekerezo ku mpamvu nka 2. Iya mbere ibi avuga ntiwajya kuri website ya UR ngo ubiboneho, ubwo bushakashatsi bavuga tutabona mu buzima bwa bwa buri munsi ntitububone no mu bitabo bitaaka buba hehe? Icya2 iyo umu professor avuga UR ni iya 2 mu karere ntatange aho yabivanye bivuga iki? Keretse niba abanyamakuru arimwe mutashyizeho reference y’iyo research yagize UR iya 2.
    Nyuma y’ibi nakwanzura ko iyi nkuru ari igitekerezo.
    Gusa njye mbona IPRCs arizo zigaragaza umumaro wazo mu mibereho rusange kuko impact yazo iragaragara. Ahubwo leta izishyiremo cash nyinshi urebe ngo mu myaka mike tuzaba nka India cg China.

  • Ariko kwirarira twabigize intego? UR nanjye ubwo bushakashatsi ikora buterekana impact bugira ku mibereho y’abanyarwanda ni bushakashatsi nyabaki? UR ngo ifite ba professors, ba Phd b’abanyarwanda kandi ngo beza, kuki isigaye iyoborwa n’abacancuro baza Nigeria cyangwa UK? Habuze harya abanyarwanda bayiyobora? Mujye mureka kutubeshya, nta munyeshuri urangiza muri UR turabona yakoze n’imbabura ngo ifashe abaturage kugabanya ibyo gucana, abayirangijemo usanga nta kindi kidasanzwe twabategerezamo usibye kujya mu biro ku mugoroba bakajya kureba aho zaryoshye gusa.Abana bize mu mashuri y’imyuga nibo bari kugerageza guhanga udushya za prof, Phd na masters za UR ziri mu mandazi.

  • reka nta UR , nta research mbonye aho !ntago rwose ibyo uyu mugabo avuga nemeranywa nawe ! discour za politique !

  • Ko yaruhutse mu kwa gatanu tukaba twenda kugeza mu kwa 12 itaratangira? ikora 1/2 cy’umwaka?

  • Bazace nagahunda yo kudodesha, ireme ntaryo, aho umunyeshuri arangiza atazi no kwandika application letter nta editing y’indi akoze. aha hize abize bacyambika isuka umunyeshuri mwijosi uvuze ikinyarwanda ku kigo. Yemwe ngo education pour tous.

Subiza

Your email address will not be published. Required fields are marked *