• 29/01/2020 12:11 55

Umuvunyi: Abahinzi, abashoferi n’abamotari ku isonga ry’abahamwe na ruswa

Urwego rw’Umuvunyi kuri uyu wa Gatanu rwasohoye urutonde rw’abahamwe n’icyaha cya ruswa mu buryo bwa burundu, aho abari ku myanya itatu ya mbere ari ibyiciro birimo abahinzi, abashoferi ndetse n’abamotari.

Umuvunyi Mukuru, Anastase Murekezi, mu kiganiro n’abanyamakuru

Guhera muri Kanama 2018 kugeza Mutarama 2019, Urwego rw’Umuvunyi rwaburanye imanaza zirebana na ruswa  89, zaregwagamo abantu 108 bakaba barahamwe burundu n’icyaha cya ruswa.

Ibyiciro byahamwe na ruswa harimo abahinzi 15, abashoferi 11, abamoytari 11, abacuruzi 8, abakora ikitazwi 5, abakoresha ba VUP 4 n’abandi.

Inzego n’imiryango zigenzura ibyerekeye ibyaha bya ruswa, ibyo kunyereza no gukoresha umutungo w’igihugu zirimo Inteko Ishinga amategeko n’umuryango mpuzamahanga urwanya ruswa n’akarengane zikunze kugaragaza ko inzego za Leta zigenza ibi byaha zigaragaza intege nke mu gutahura abakira n’abanga ruswa iri hejuru [abo bakunze kwita ibifi binini].

Ibi byiciro byatangajwe n’urwego rw’Umuvunyi na byo biyobowe na rubanda rugufi [bakunze kwita udufi duto] kuko abarimo bakomeye ari nk’umucungamutungo umwe wa SACCO n’umuyobozi ushinzwe ubucuruzi muri SONARWA.

Umuvunyi Mukuru, Anastase Murekezi avuga ko ziriya manza ari izo uru rwego ayobora rwakurikiranye ariko ko na bariya bakunze kwita ibifi binini bagenda bakurikiranwa mu zindi nzego z’ubutabera nk’inkiko.

Murekezi avuga ko nubwo muri ibi byiciro birimo abantu bake ariko bagashobora kwakira cyangwa gutanga ruswa iri hejuru.

Yatanze urugero rw’Umupolisi [ni umwe ugaragara kuri uru rutonde], ati “Imodoka ishobora gutambuka akaka ruswa y’ibihumbi 20, kandi ku munsi imodoka zimucaho ni nyinshi, urumva ko azatahana ruswa y’amafaranga menshi.”

Ubahinzi bafatwa nk’ikiciro kiri hasi muri ibi byatangajwe, ni bo baza benshi bahamijwe ruswa mu manza Umuvunyi waburanye kuko ari 15.

Umuvunyi Mukuru avuga ko muri serivisi zihabwa aba bafatwa nka rubanda rwa giseseka harimo ruswa nyinshi nko muri gahunda zigenewe kuzamura abatishoboye nka Girinka munyarwanda, VUP, Ubudehe ndetse no gutanga ifumbire kuri aba bahinzi.

Ati “Umubyeyi akajya kwandikisha umwana, nka bariya babyara inda zitateguwe, umuyobozi akamunyuza hirya hino ashaka ruswa, uje akayitanga akamwandikira, hariya harimo ruswa nyinshi.”

Izi manza urwego rw’Umuvunyi rwaburanye zaragaragayemo gusaba cyangwa gutanga indonke, bigaragara mu manza 55 zirimo abantu 61.

Harimo kunyereza umutungo biri mu manza 25 zirimo abantu 35, mu gihe mu byereke gukoresha nabi umutungo ufitiye rubanda akamaro, biri mu manza 8 zarezwemo abantu 10.

Hari kandi kwaka cyangwa kwakira amafaranga bidakwiye cyangwa arenze ateganyijwe, bikaba byaragaragaye mu rubanza rumwe, rwarezwemo umuntu umwe.

Abanyamakuru bitabiriye ikiganiro

Martin NIYONKURU
UMUSEKE.RW

9 Ibitekerezo

  • Umuvunyi buriya ntiyibeshye ra? Mu bahamwa na ruswa bahora bagarukwaho kenshi harimo n’ibifi binini rwose, birimo abayobozi b’imidugudu n’utugari, abunzi, ba DASSO, abapolisi bo mu muhanda, abasifuzi b’umupira w’amahuru, abakoresha imirimo ya VUP bo icyakora yarabatahuye… Warondora ibyo bifi binini ruswa ihama ku mugaragaro se ukabirangiza? Ariko yatwemereye kuzabiroba byose akabivana mu nzira. Nakomereze aho.

  • Le ridicule ne tues pas!!! Nonese umuntu urya ruswa ya 5000 Frw agafatwa nurya za milliard kuko ashoboye guhemba Umucamanza, Umushinjacyaha n’umwavoka akbaa umweere ubwo uba ukoze iki? Uyu muntu ko mperuka agakora neza akiri PM byagiyehe?

  • Uwiyise “Akumiro” yibagiwe abayobozi ba za cooperatives

  • aBO BAMOTARI N’abashoferi baziha bande mbese buriya, njye aba mbona ntacyo batwaye cyane. yanze gutunga urutoki aho bishobora kumukoraho, ubuse twirengagize ruswa ziba mu butaka, twirengagize ruswa ziba mu nzego bwite za leta! None ngo ba nyakwipfira abahinzi, abamotari n’abashoferi!
    Aka ni akumiro!
    Njye ubu nayobewe service nakwizera ko ikora neza, keretse ahari presidence office na immigration, naho abandi bo ndabakemanga pe!
    NONE N’ABITWA NGO bararwanya ruswa nibo bayisasira!

  • imitungo ihanitse ya reta yitirwa inyerezwa, iyigaragaza twese tuzi cg twagonye imishinga itangira ikaburirwa irengero ngo abashoferi n’abamotari kweli! Inshingano ze ni mu muhanda naho mu biro ntiyishoboreye nyakubahwa peresida wa Repubulika mu bushishozi mufite biragaragara ko uyu muyobozi umusaruro we ukemangwa ntashoboye cg asangira n’abagatuza akinnyogorera ku banyantege ke aho abona ntacyo aryamo ubundi agatekinika raporo ngo azahora abeshya igihugu ni akumiro rwose!!!!!!!!!!!!

  • Nagirango mbibutseko ugereranyije imishahara abantu bahembwa mu Rwanda, (abakozi ba leta) ntanumwe wabasha kurihira umwana muri USA. Nibande babikora? Bayakurahe kugeza naho basigaye boherezayo nimpinja? Ikintu bita principe yuko icyo ikitari umushara nibindi bigenwa nitegeko ntawemerewe kubikoraho ntaho tugana. Svp ibi bireba abantu bose kuva kuri president kugeza kuri nyumbakumi. Africa ntago ikennye ahubwo management mbi niyo iduheza hasi.

  • uyu arashaka kwangisha abaturage leta tu bamukurikiranire hafi ashobora kuba afite indi misiyo yitwikira ibyo yatumye gukora akabiha indi sura
    ubundi kuki ategera muzehe TIto akamwerekera koko

  • Muvandimwe Kakire,icyo nakubwira nuko abashoferi baha ruswa abamotari, abahinzi nabo bagahana ruswa hagati yabo. Ibyo jye mbona aribyo Umuvunyi Mukuru w’igihugu,ubihemberwa kdi biri mu nshingano ze za buri munsi yashoboye kubona, mu bushakashatsi yakoze mu minsi 365 yose

  • Aba chauffeur aba motari n’abahinzi!!!!mbega umuvunyi wacu ubu koko nibi muhemberwa ?ndi mwebwe nakwegura nkavuga ko kananiye.niba nta ruswa wabonye mu gutanga amasoko ya leta twebwe rubanda tuyibona ubwo dukomeze twizere urwego rw’umuvunyi cg ?

Subiza

Your email address will not be published. Required fields are marked *