• 28/01/2020 8:46 05

Umuturage ati: “Twasanze tugomba kwigana RDF ibyo idukorera, tugafashanya”

Umwe mu baturage bo mu Murenge wa Nyarugunga, mu Karere ka Kicukiro witwa Lucky Murekezi avuga ko we na bagenzi be bitegereje ibyo ingabo z’u Rwanda zikorera abaturage mu cyo zise Army Citizen Outreach, basanga na bo bazigana bakagira icyo bafasha abaturage batishoboye.

Lucky Murekezi avuga ko abasivili bagombye kwigana uko RDF ifasha abaturage nabo bakayunganira

Murekezi avuga ko kuba ingabo zifata umwanya zigakora ibikorwa bigamije kuzamura urwego rw’imibereho y’abaturage ari ikintu abandi bagombye kwigana, abafite ubushobozi runaka bagafasha abafite buke.

We na bagenzi be bo mu Turere dutandukanye tw’u Rwanda bishyize hamwe bakora umuryango bise ‘Ingabo Zacu Initiative’ bakaba ariho bahurira bagashyiraho gahunda zo gufasha abatishoboye no guhangana n’abashaka gusiga isura y’u Rwanda icyasha.

Mu rwego rwo gufasha abatishoye nk’imwe mu ntego zabo, kuri uyu wa Gatandatu bagiye mu Mudugudu wa Bamporeze  mu Kagari ka Busanza basana inzu y’umukecuru w’inshike witwa Candide Kandanga.

Kubera ko mbere bari baramushyiriyeho idari (plafond), inzu bakayitera sima imbere n’inyuma, kuri uyu wa Gatandatu bashyizeho umusingi (fondation).

Murekezi avuga ko igikorwa cyo kuri uyu wa Gatandatu gisanzwe muri gahunda zo gufasha abantu batishoboye.

Ati: “Igikorwa cyacu uyu munsi kiri ku murongo w’ibyo dukora kandi tuba dushaka gukora nk’uko ingabo zacu zibigenza, tukita ku bo turushije amikoro.”

Kugira ngo bashobore kumenya aho Kandanga atuye bayobowe n’abagize urugaga rw’abagore bashamikiye ku Muryango FPR-Inkotanyi mu Murenge wa Kanombe.

Umuyobozi w’uru rugaga witwa Olive Mukobanya avuga ko abagize Ingabo Zacu Initiative bagize igitekerezo bakibagezaho bumva ni kiza bemeranya kuzagifatanya basana inzu ya Candide Kandanga.

Mukobanya yemeza ko ibyo bubakiye Kandanga ari ibintu bizaramba kandi ko hari na gahunda yo kuzamuha amashanyarazi.

Umukecuru Candide Kandanga yashimye ibyo yakorewe avuga ko n’ubwo ari inshike ariko azasaza neza kuko hari abo yise abana be bamuba hafi.

Ati: “Aba bana ndabashimira ko bangaruyemo ikizere cy’uko nzasaza neza, bakanshajisha neza. Ubu kera nari umugore usa neza n’uko ureba nsaziye mu mibereho mibi, ariko ubwo aba baje nziyongera iminsi yo kubaho.”

Umuyobozi w’Umurenge wa Kanombe, Nathan Kanyesigye yabwiye Umuseke ko Kandanga asanzwe abona inkunga y’ingoboka imufasha mu kubona iby’ibanze ariko ko ubufasha ahawe n’abagize uriya muryango n’urugaga ari inyongera nziza.

Ngo we n’ubuyobozi bw’Akagari, Umudugudu n’Isibo bazakomeza barebe uko iriya nzu icunzwe kugira ngo ibyayigiyeho bitaba imfabusa.

Abagize Ingabo Zacu Initiative basigiye uriya mubyeyi ikizamutunga mu gihe runaka kandi bagira amafaranga bamushyirira kuri banki kugira ngo azamwunganire mu gihe kiri imbere.

Abo mu Ingabo Zacu Initiative na bagenzi babo bashamikiye kuri FPR Inkotanyi bubakira uriya mubyeyi w’Intwaza akarima k’igikoni
Abagore barimo bavanga sima
Abafundi bari baje kubakira uriya mubyeyi inzu yo mu gikari kugira ngo ajye ayikodesha imwingirize
Umwe mu bagize ihuriro Ingabo Zacu Initiative atera igipande
Lucky Murekezi mu muganga wo kubakira uriya mukecuru w’Intwaza
Iyi nzu bayikoreye umusingi kugira ngo umuvu utazayigusha. Bari barigeze kuyisana mu nkuta
Intwaza Candide Kandanga ngo ibyo bamukoreye bizatuma iminsi yicuma
Olive Mukobanya uhagarariye urugaga rw’anbagore bashamikiye kuri RPF
Kanyesigye Nathan uyobora umurenge wa Kanombe avuga ko bazakurikiana niba iriya nzu izafatwa neza

Jean Pierre NIZEYIMANA
UMUSEKE.RW

5 Ibitekerezo

  • Ngo dukwiye kwigana RDF mubyo idukorera!! Byose se? Bene ubwite barabe bumva!

  • Uri akumiro koko nkizina ryawe! Bavuze kwigana ibikorwa bya RDF batanga nurugero rwabyo

  • Kubera iki se bakoze mu buryo bwabo na RDF igakora nka RDF. Ni ngombwa se kwiganana?

  • mwagize neza basore

  • Umuganda n umuco gakondo wa ba Sogokuruza…

    Gufashanya… … Uyu muco ugomba gusigasirwa….. Nta umenya ejo hazaza…

    Ineza uzayisanga imbere….

    Hari umuhanzi waririmbye ngo bitunaniza iki…..

    Dufashe abakeneye ubufasha

Subiza

Your email address will not be published. Required fields are marked *