• 08/12/2019 9:30 30

Umusirikare ‘wishe umugore’ we i Rulindo yakatiwe burundu

Yireguye avuga ko yishe umugore bimutunguye,
Ngo umugore we yabanje kumutera ibuye rifata akaboko, we arimukubita mu mutwe,
*Umwunganira mu mategeko yasabye ko afungurwa akajya kurera abana basigaye bonyine. 

Mu murenge wa Kisaro, mu karere ka Rulindo kuri uyu wa mbere haburanishirijwe urubanza ruregwamo umusirikare witwa Caporal Janvier Nsengimana ukekwaho kwica umugore we muri Gicurasi,  agahunga ariko nyuma akaza gutabwa muri yombi.

Mu murenge wa Kisaro muri Rulindo
Mu murenge wa Kisaro muri Rulindo

Inkuru ibabaje y’umugore wishwe n’umusirikare mu karere ka Rulindo yamenyekanye tariki 9 Gicurasi 2018, bikaba byaravugwaga ko umusirikare witwa Janvier Nsengimana ari we ukekwa kwica umugore we agahita ahunga ubutabera.

Kuri uyu wa mbere tariki 25 Kamena, Caporal Janvier Nsengimana watawe muri yombi ageze i Kubungo (Ngoma), yaburanishirijwe aho yakoreye icyaha.

Umwe mu bari muri uru rubanza yabwiye umuseke ko Capl Nsengimana yireguye avuga ko atashatse umugore kugira ngo amwice ahubwo ko yamushatse kugira ngo yubake umuryango kuko ntawo yagiraga.

Yavuze ko kumwica byamutunguye kuko ngo bapfuye amafaranga yari amubajije, akaba yari yarayamwoherere ari mu butumwa bw’akazi, ngo umugore ntiyamusubiza neza.

Aho ngo niho byaturutse kugira amwice, kuko ngo umugore (nyakwigendera Akimana Claudine) yabanje kumutera ibuye riramuhusha rifata urugi ariko ngo rinamukomeretsa ku kaboko, na we ararifata arimutera mu mutwe, muri nyiramivumbi.

Capl Nsengimana yavuze ko akimara gukubita umugore we ibuye atahise apfa ahubwo ngo yatangiye gusamba, agerageza kumukorera ubutabazi bw’ibanze, kuko ngo yumvaga amwiciye mu gace avukamo ku buryo abaturage nibabimenya na we bamwica, afata ishati yari ihari ngo amukorera  ‘first aid’, amucucagira amazi ngo arebe ko yahembuka, ariko ngo aranga arahwana ari na bwo yamushyize ku gitanda, arahunga.

Umushinjacyaha na we ushinja Capl Nsengimana kwica umugore we akoresheje ibuye, yanze ibisobanuro yatanze yiregura, avuga ko nta kimenyetso agaragaza ko umugore we yamuteye ibuye rikamukomeretsa, avuga ko yari afite uburyo bwose bwo guhunga umugore warakaye aho kumukubita ibuye mu musaya.

Yavuze ko bitumvikana uburyo umuntu yica undi yarangiza akaza kumukorera ubutabazi bw’ibanze, yungamo ko umurambo wa nyakwigendera basanze atari ishati iwuriho ahubwo ko basanze ari ishuka imuziritse mu ijosi, akemeza ko yamuhotoye ngo abaturage batabimenya, nubwo ibizamini bya muganga byemeje ko nyakwigendera yazize ahanini gukubitwa cyane ikintu mu mutwe.

Umwunganizi mu mategeko wa Caporal Nsengimana yavuze ko umukiliya we akwiye imbabazi kuko ngo yaburanye yemera icyaha, ndetse ngo yasabye imbabazi ingabo z’u Rwanda (RDF) n’Abanyarwanda bose ku bw’icyaha yakoze, bityo agasaba ko yahanishwa igihano gisubitse kubera ko yasize abana, akaba yadohorerwa akajya kubarera.

Umwunganize wa Capl Nsengimana avuga ko uwo yunganira yabanje gukubitwa ibuye, ibyo yise ‘ubusemburacyaha’, nubwo yabuze ibimenyetso bigaragaza ko ibyo byabaye.

Ubushinjacyaha bwo bwavuze ko ahubwo Caporal Nsengimana yishe umugore we yabigambiriye kuko ngo yari amaze imyaka itanu atagera mu rugo atanaruhahira, ariko inshuro imwe yahageze asiga umugore apfuye.

Ibyo byose nibyo Abacamanza b’Urukiko rwa Gisirikare baciye uru rubanza bahereyeho, nyuma yo kwihera isaha banzura ko Caporal Nsengimana ahamwa n’icyaha bityo ahanishijwe igifungo cya burundu nk’umuntu wishe undi abigambiriye, bavuga ko afite igihe cy’iminsi 30 cyo kujurira.

Umushinjacyaha yahise avuga ko abaregera indishyi na bo bazabikora nyuma y’isomwa ry’uru rubanza.

Mu karere ka Rulindo
Mu karere ka Rulindo

UM– USEKE.RW

0 Igitekerezo

  • ariko aka ni akumiro, ababuaranira abakoze aamarorrerwa ubanza baba bakina theatre ngo afungurwe age kurera abana basigaye bonyine!!!!!!!!!!!!!!! yabiciye nyina ari impuhwe abafituye, ndumva bindenze pe,

    • Kuba AVOCAT ni akazi kabi.Tekereza nawe kujya kuburanira umuntu wishe undi!! Kandi hafi buri gihe Avocats bavuga ko “umukiliya wabo arengana”.Urugero,umuntu waburaniraga Bagosora yavugaga ko arengana.Akazi k’aba Avocat,kazatuma batajya mu ijuru.Kubera ko buri gihe basa naho bashyigikira abagome.Igitangaje nuko muli ba Avocats habamo abiyita Abarokore ngo kuko batanywa inzoga!!Bamwe ndabazi.Ariko bagakunda kuburanira abagizi banabi kuko aribo batanga amafaranga menshi.This is Hypocrisy.

Subiza

Your email address will not be published. Required fields are marked *