• 08/12/2019 9:28 29

Umusaruro w’Imyumbati kuri hegatri ni muke, bitera abahinzi guhendwa

*Kinazi iragura ikilo k’imyumbati 92Frw, umuhinzi abaze neza ngo yunguka Frw 10/Kg

Kigali – Mu nama yahuje inzego zinyuranye zifite aho zihuriye no kugira uruhare mu ruhererekane nyongeragaciro ku gihingwa cy’imyumbati abahinzi basabwe kuzamura umusaruro beza kuri Hegitari kuko ukiri hasi bikabatera guhendwa.

Rwibasira Vital uhinga akanatubura imyumbati avuga ko ari igihingwa cyateza imbere umuntu
Rwibasira Vital uhinga akanatubura imyumbati avuga ko ari igihingwa cyateza imbere umuntu

Mme Tushabe Mable ushinzwe uruhererekane nyongeragaciro ku gihingwa cy’imyumbati muri Minisiteri y’Ubucuruzi n’Inganda, yabwiye abahinzi bari muri Koperative hirya no hino ko bakwiye gukoresha ibikorwa remezo bahawe n’amahugurwa bakongerera agaciro igihingwa cy’imyumbati.

Yavuze ko mu gihe cyahise nko mu myaka itatu ishize umusaruro w’imyumbati wari waragabanutse cyane bigatuma inganda nto ziwutunganya zidakora ariko ubu ngo umusaruro wabonetse bakwiye gukoresha ubuyobozi batoye muri Koperative z’abahinzi, bagakoresha ubwanikiro n’ubuhunikiro bakongerera agaciro umusaruro w’imyumbati.

Kuri we ngo mu turere imyumbati yeremo ihinzwe neza yababera ‘diamant’.

Mu kiganiro yagiranye n’Umuseke, Tushabe Mable yagize ati “Ikibazo dufite cyane ni umusaruro tubona kuri Hegitari aho umuhinzi ahinga Ha 1 cyangwa Ha 10 akabona Kg 100, nubwo igiciro cyazamuka ibyo yashoye ntibizavamo, uyu munsi icyagombye guharanirwa cyane ku buso buto here ibintu byinshi ku girango n’igiciro kijyane n’ubushobozi bwo kugura bw’Umunyarwanda, n’inganda zifate umusaruro ku giciro gito n’ibivuyemo Abanyarwanda babashe kubirya.”

Mme Tushabe avuga ko byagora ko Umunyarwanda arya ikilo cy’ubugari cy’amafaranga 800, ariko ngo kimanutse bikagera ku mafaranga 400 cyangwa no munsi byamworohera kubona amafaranga abigura.

Yavuze ko abahinzi b’imyumbati bakwiye kumva ko umusaruro babonye bawugurisha ku giciro kiriho ahubwo bagaharanira ko ubutaha bahinga myinshi kugira ngo igiciro cyawo kizagende neza.

Ati “Iyo usubiye inyuma kuva 2015 kugera muri 2017 twari dufite umusaruro muke, muri icyo gihe umuhinzi yishyizemo ko azabona igiciro cy’amafaranga 150 niyeza, uyu munsi byabananiye kwakira ko igiciro kiva ku Frw 150 kikajya munsi yayo, iyo ubamanuye bumva ko bahohotewe ariko muri bo ntibumva ko nibeza imyumbati myinshi n’igiciro bifuza kizaboneka.”

 

Abahinzi bo bite?

Rwibasira Vital uhinga akanatubura imyumbati avuga ko nubwo imbuto yari yabuze, ubu aho yabonekeye ngo uruganda ntirufata imyumbati yose yeze.

Yagize ati “Igiciro cy’imyumbati navuga ko ari 92Frw ariko umuhinzi abona muri rusange Frw 70 kuko hari Frw 10 agenda ku modoka igeza umusaruro ku ruganda, amafaranga 5 ahabwa abakura imyumbati, naho andi Frw 7 ahabwa abayitonora. Iyo ukuyeho n’andi washoye mu buhinzi usanga umuhinzi yunguka Fr 10 ku kiro ariko ntacyo bitwaye bitewe n’ikiciro cy’ubukungu tugezemo.”

Uyu muhinzi avuga ko kuri Hegitari imbuto bafite uyu munsi bashobora gusaruraho Toni hagati ya 10 kugera kuri Toni 15 igihe bafumbiye.

Dr Athanase Nduwumuremyi ukuriye ishami rishinzwe ubushakashatsi bw’imyumbati muri RAB avuga ko ubu iki gihingwa gihagaze neza, imbuto zihari ariko hari ikibazo cy’umusaruro wabaye mwinshi urenga ubushobozi bw’isoko.

Ati “Uyu munsi ugereranyije n’aho tuvuye umusaruro wari hasi ugereranyije Toni 10 kuri Hegitari, ubu tugeze kuri Toni hagati ya 15 na 19, ariko birashoboka ko twawongera ukagera kuri Toni 25 na 30. Hari imbuto nshya zibigaragaza, wakoresha ifumbire utayikoresha umusaruro ukiyongera, ariko nagira inama abahinzi gukoresha ifumbire mu guhinga imyumbati kuko harimo nkunganire, iyo imyumbati ushyizemo ifumbire wabona Toni 30 icyo gihe n’iyo igiciro cyaba cyamanutse nta kibazo k’igihombo umuhinzi yagira.”

Ubu hari imyumbati ihingwa n’irimo ituburwa. Ihingwa cyane ni amoko abiri yavuye hanze, NASE 14, NAROKAS 1, hakaba imbuto nshya Ndmirabana /7 na Gahene/ 2 izo ngo zeraga mu gihugu mbere ariko zongera gutuburwa, ubu hari n’izindi mbuto eshanu zigeragezwa, ndetse ngo hari imbuto 30 zirimo kuvanwamo indwara.

Muhizi Jotham uhagarariye ihuriro ryabatunganya ifu y’imyumbati bakanayohereza mu mahanga mu rwego rw’Abikorera (ACEPR- PSF), avuga ko batumiye abantu bose bafite aho bahuriye no kongerera agaciro igihingwa cy’imyumbati kugira ngo barebe imbogamizi ziri mu nganda no mu bahinzi, kandi banaganire ku kibazo k’inganda nto zitunganya imyumbati zikaba zidakora kandi imyumbati yarabonetse.

Ati “Ni ibiganiro by’iminsi ibiri tuzava aha twumbikanye uko umusaruro w’imyumbati uboneka ari mwinshi kandi mu buryo burambye.”

Muhizi avuga ko hari abantu bari mu Bubiligi bari mu biganiro bashobora kujya bagura Toni 500 ku kwezi, ariko ngo bizaterwa n’ubushobozi bazasanga bafite.

Mme Tushabe Mable asanga igiciro cy’imyumbati kitagushamo umuhinzi igihe yejeje myinshi
Uyu ni Dr Athanase Nduwumuremyi ushinzwe ubushakashatsi ku gihingwa cy’imyumbati muri RAB
Ubanza iburyo ni Muhizi Jotham ukuriye ACEPR ikorera muri PSF avuga ko hari abantu bo mu Bubiligi bari kugirana ibiganiro ngo bajye bagura umusaruro w’ifu y’imyumbati mu Rwanda

HATANGIMANA Ange Eric
UM– USEKE.RW

Subiza

Your email address will not be published. Required fields are marked *