• 08/12/2019 10:36 23

Umusaruro w’imboga ubasha gutunganywa mu nganda ni 1,5%, imbuto ni 18,3%

Ikigo k’igihugu gishinzwe guteza imbere inganda n’ubushakashatsi (NIRDA/ National Industrial Research Development Agency) kigaragaza ko kongerera agaciro umusaruro w’imbuto n’imboga bikiri hasi cyane kuko umusaruro w’imboga ubasha gutunganyirizwa mu nganda ungana na 1,5% ugereranyije n’uba wabonetse wose mu gihe uw’imbuto ari 18,3%.

Umuyobozi wa NIRDA Kampeta avuga ko ibi bituma umusaruro w’imboga n’imbuto bigera ku isoko mpuzamahanga ukomeza kuba muke

Ibi byagaragajwe n’ubushakashatsi bwakozwe n’iki kigo kuva mu kwezi kwa Gashyantare kugera muri Kamena, bukorerwa ku bigo n’abikorera 56 basanzwe bafite inganda zitunganya ibikomoka ku musaruro w’imbuto n’imboga.

Iyi raporo igaragaza ko 83,9% by’inyanya, 95,3% by’ibitunguru na 88,1% na 76,4% by’umusaruro w’imbuto bigera ku masoko y’imbere mu gihugu bitaratunganywa mu nganda ngo agaciro kabyo kiyongere.

NIRDA ivuga ko iki cyuho kikiri mu musaruro w’imbuto n’imboga byongerewe agaciro bigira ingaruka ku ngano y’ibyo igihugu cyohereza hanze.

Ubu bushakashatsi kandi bwagaragaje ko 96% by’umusaruro w’imbuto n’imboga biba byatunganyirijwe mu nganda, bicuruzwa ku masoko y’imbere mu gihugu.

Umuyobozi w’Ikigo k’Igihugu gishinzwe guteza imbere Inganda n’Ubushakashatsi, Kampeta Sayinzoga avuga ko ubushobozi bw’abanyenganda bukiri hasi haba mu mafaranga no mu buryo bw’ikoranabuhanga.

Ati « Ibi biduha akazi ko kubafasha kongera ubuziranenge bw’ibyo bakora kugira ngo buzuze ibisabwa ku masoko yo hanze.”

Agaragaza kandi ko hakiri ikibazo ku ruhande rw’abahinzi kuko kugira ngo imbuto n’imboga bibashe kugera ku nganda bitange umusaruro mwiza biterwa n’uburyo zitabwaho kuva zihinzwe kugeza igihe zisaruriwe.

Avuga ko ikigamijwe ari ukongerera ubushobozi inganda zitunganya umusaruro w’ibi bihingwa kugira ngo zibashe kongera umusaruro w’ibyongererwa agaciro bityo hanabeho kugabanuka kw’ibyangirika bitarakoreshwa.

Bamwe mu banyenganda bakorana n’abahinzi bavuga ko abahinzi bakeneye kongererwa ubushobozi kugira ngo haboneke umusaruro mwinshi kandi mwiza.

Uwayo Desire wo muri Entreprise Urwibuto avuga ko umusaruro w’imbuto n’imboga ukiri hasi, gusa ngo na muke uboneka igice cyawo kinini gipfa ubusa kuko abahinzi bagifite ubumenyi buke bwo kuwitaho ngo ube wagera ku ruganda ugifite ubuziranenge.

Muri gahunda ya Leta y’imyaka irindwi, biteganyijwe ko umusaruro w’imbuto n’imboga witezweho kugira uruhare rwa 17% y’ibyoherezwa mu mahanga buri mwaka.

Abatunganya umusaruro w’imbuto n’imboga baracyafite ibibazo

Dieudonne NSHIMIYIMANA
UMUSEKE.RW

Subiza

Your email address will not be published. Required fields are marked *