• 03/12/2020 9:48 43

Umunyamakuru w’UMUSEKE, NIYONKURU Martin yamuritse IGITABO yise ‘IMBUTO Z’UMURUHO’

Umunyamakuru Martin Niyonkuru yasohoye igitabo cy’interabugabo yise  ‘IMBUTO Z’UMURUHO’ gikubiyemo inkuru igaragaza urugendo rwo kwigobotora ibibazo umuntu ashobora kunyuramo, agaharanira kubisohokamo no kubisohoramo abandi.

Umunyamakuru NIYONKURU Martin avuga ko atangiye inzira yo kwandika ibitabo, ndetse ngo afite n’ibindi azasohora nyuma

Ni igitabo mbarankuru (Novel) gikubiyemo inkuru y’umwana witwa Mizero watangiye gusharirirwa n’imibereho akiri mu nda ya nyina, aho avukiye asanga umuryango we ugoswe n’uruhuri rw’ibibazo by’imibereho.

Uyu Mizero wakuze atumva icyanga cy’ubuzima, yavutse atagejeje amezi icyenda (9) yagenwe na Rurema kubera impanuka ikomeye ababyeyi be bakoze, igahitana se umubyara.

Mu ishuri na bwo yigaga bimugoye kubera kudasiba gusiragizwa ajya gushaka amafaranga y’ishuri na yo yabonaga yiyushye akuya.

Mu rugendo rw’ishuri yahuye n’ibisitaza byinshi, bimwe bikamutsikiza akisanga mu nyanja y’ibibazo birenze iby’imibereho mibi we n’umuryango we bari babayemo. Yaje kwirukanwa azira gufatwa anywa ibiyobyabwenge na byo yaroshywemo no gushaka umuti wamwibagiza imibereho igoye y’iwabo.

Ageze mu mwaka wa kane w’amashuri yisumbuye, yakunzwe n’umukobwa w’uburanga n’ikimero bihebuje, ariko we abanza kugira ngo ni ugushaka kumutesha umutwe, ntamenye ko mwene Majoro yamwimariyemo atitaye ko ari umwana wo mu muryango utunzwe n’isuka.

Mizero na Gwiza mwene Majoro, barakundanye bishyira kera, Mizero atangira kumva icyanga cy’ubuzima kubera umunyenga w’urukundo yari yisanzemo kuva yavuka, nyamara ntamenye ko we n’umukunzi we bazaba aka wa mugani ugira uti “amaboko atareshya ntaramukanya” waje kubasohorezaho.

Uyu mwana w’umuhungu warangije amashuri yisumbuye ayoboye mu manota ndetse yabonye na buruse yo kujya kwiga mu mahanga, yaje gufungwa azira kwisumbukuruza agakunda umwana wa Majoro, atangira kubona amahirwe ye amuciye mu myanya y’intoki.

Ukuri guca mu ziko ntigushye, Mizero yagizwe umwere ndetse ajya gukomeza amashuri ye ku mugabane w’i Burayi, arahirwa, aratunga aratunganirwa ndetse ahigura umuhigo yari yarahize akiri umwana.

Martin Niyonkuru wanditse iki gitabo, avuga ko gikubiyemo amasomo abiri (2) y’ingenzi:

  1. Aho uvuka si ho hagena uwo uzaba we:

Ati “Hari benshi bumva ko batagera kuri ibi n’ibi kuko bavuka mu muryango umeze utya, nyamara si byo, tuzi benshi bavukiye ndetse bagakurira mu bibazo ariko ubu bahanzwe amaso n’Isi yose kubera ibikorwa by’indashyikirwa bagiye bakora cyangwa bakomeje gukora…

Kumva ko ntagera ku rwego runaka cyangwa ngo mbe uyu n’uyu kubera aho nkomoka, ntabwo byaba ari igisobanuro gikwiye.”

  1. Kwibuka ko ubereyeho umuryango mugari :

Ati “Umuntu yahirwa, akagera kuri byinshi ariko ni ngombwa kwibuka ko hari umuryango mugari umukeneye. Uramutse utekereje ko uri buryame ugasinzira, umuturanyi wawe yabuze ibitotsi, byaba ari ukwibeshya kuko ntazakwemerera ko ugoheka kuko nukemura ibibazo byawe nyamara abaturanyi bawe bakigoswe na byo, bizarangira na we babigusangije.”

Niyonkuru avuga ko yaba abana, urubyiruko ndetse n’abakuze, buri wese yakwibona muri iki gitabo by’umwihariko abakiri bato kuko ari bo bakunze guhura na byinshi bishobora kubatsikiza mu rugendo rw’ubuzima.

Iki gitabo cyanditse mu buryo bw’ubuvanganzo, uwagishaka yakibona muri Libraire Caritas mu mujyi wa Kigali cyangwa agahamagara kuri 0788 408 544 /E-mail/Imeri: martinniyonkuru@gmail.com

UMUSEKE.RW

5 Ni byo bitekerezo bimaze gutangwa

  • Nkunda abantu bakunda gusoma no kwandika.Ikibabaje nuko mu Rwanda ari bake bikabije.Ntekereza ko batarenze 0.01%.Hari indirimbo ivuga ngo:”Uzajijuka ute utazi gusoma”??Urugero,ntabwo wamenya neza ibyo Imana idusaba utabanje gushaka umuntu uyizi neza ngo muyigane ku buntu.Kandi barahari benshi bagusanga iwawe mukayigana ku buntu.Benshi bitwa abakristu,bakora ibintu byinshi Imana itubuza,batazi ko ari icyaha.Kubera ko banga kwiga bible.Gushaka Imana bisaba gushyiraho imihate.Nayo ikazaguhemba ubuzima bw’iteka muli paradizo,ibanje kukuzura ku munsi wa nyuma.Ibyo benshi ntibabizi.Ahubwo bababwira ko upfuye aba yitabye Imana bakabyemera,batagenzuye niba koko bible ariko ivuga.Nta hantu na hamwe bible ivuga ko dufite roho idapfa,isigara ikora twapfuye.

  • “Imbuto y’umuruho” ? Cg y’umugisha? Iyo ya nyuma ni yo nzi yera ku giti cy’umuruho!

    • @Mujyanama, nibyo koko abanyarwanda tuvuga ko imbuto y’umugisha yera ku giti cy’umuruho. Ariko uko bizwi, ntushobora gusarura inkeri ku bitovu cyangwa amacunga ku mishubi. Ni gute igiti cy’umuruho cyera imbuto zitari izacyo? Iz’umugisha zagombye kwera ku giti cy’umugisha, n’iz’umuruho zikera ku giti cy’umuruho. It would be more logic. Dusobanurire kurushaho. Ariko unyumve neza, ibyo ntibivanaho ko ababibana amarira basarurana ibyishimo nk’uko zaburi (psaume) ya 126 ibitubwira.

      • Mugenzi wanjye ibyo uvuga na byo mu busanzwe ni byo, ariko burya n’ibishyimbo bateye mu butaka birabanza bikabora mbere yo kuzamuka; mbese biruhira mu butaka, ariko byajya kuzamuka, ugasanga ni ibitontome by’ibitohagire. Burya umuntu unyuze mu bibazo akenshi avamo uw’ingirakamaro. Ni icyo bishushanya rero, ntabwo ari ibi biti buti tuba tuvuga!

        • Yes Mujyanama.Urugero FPR yarwanye intambara iruhije cyane,none dore AMATUNDA abarwanye iyo ntambara barimo kurya!! Uzarebe amafoto yabo ukuntu bari bananutse bose bakili mu rugano.None benshi batunze Amato mu Nyanja,V8 n’Amataje atabarika.Ngizo imbuto z’umuruho.

Subiza

Your email address will not be published. Required fields are marked *