• 24/01/2020 1:47 24

Umuntu watotejwe ahorana ibikomere- Kalisa Evariste

Kalisa Evariste wahoze ari umudepite, yabwiye abitabiriye umuhango wo kwibuka Abatutsi batazwi aho baguye wabereye mu Murenge wa Rusiga mu Karere ka Rulindo ko intimba abayirokotse bafite itazabavamo ahubwo ko n’abakomokaho bazayigira.

Kalisa Evariste wahoze ari umudepite

Kwibuka Abatutsi batazwi aho baguye bikorwa buri mwaka n’Umuryango Imena, ugizwe n’abarokotse Jenoside bagasigara bonyine mu muryango w’ababyeyi babo n’abavandimwe babo.

Kalisa avuga ko kubera impamvu politiki y’ubumwe n’ubwiyunge igomba guhora icungira hafi kugira ngo ibyabaye bitazongera.

Yavuze ko nk’umuntu wavukiye agakurira mu cyahoze ari Komini Mbogo yahoze ituranye na Komini Shyorongi azi neza uko ingengabitekerezo ya Jenoside yakwirakwijwe.

Ngo mu myaka ya za 1959 na nyuma y’aho gato Leta yakwirakwijwe ibibiriti mu ngo z’abitwaga Abahutu ngo zitwikire Abatutsi.

Avuga kimwe mu cyatumye  muri Shyorongi haba ubwicanyi bukomeye ari abantu bari bakomeye bahavukaga babaga mu bayobozi bwo kwa Perezida Habyarimana Juvenal.

Muri bo harimo Matayo Ngirumpatse wari Perezida w’Interahamwe hamwe na Munyazesa Faustin wari Minisitiri w’Ubutegetsi bw’igihugu, Bonaventure Habimana n’abandi.

Ikindi cyatumye Abatutsi bo muri kariya gace bicwa cyane ngo ni uko ingabo za Habyarimana zari zifite ikigo hafi ya za Shyorongi kandi ngo habaga na bariyeri z’Abafaransa.

Musafili umwe mu bagize Umuryango Imena yatanze n’ubuhamya, avuga uko yarokokeye mu bibazo byinshi ndetse ngo umwe mu basirikare yaje kumujyana amuvanye Shyorongi, amushyikiriza umukecuru wangaga Abatutsi cyane ariko ngo mbere gato y’uko uwo umukecuru amutanga ngo Inkotanyi zaje kuhatunguka zirababohora.

Ati ” Inkotanyi zirakabaho zadusubije ubuzima baratwitaga ibikoko.”

Fidèle Nsengiyaremye uyobora Imena Family yashimiye Leta y’u Rwanda kuba yarahaye abarokotse uburyo bwo kwibuka ababo.

Yashimye abagize Umuryango Imena kuba baratekereje uburyo bwo kwibuka Abatutsi bitazwi aho baguye.

Gusa ngo hari ikibazo cy’uko hari abatarashyingura ababo.

Yasabye abagize Imena kumva ko kuba barasigaye ari bonyine bivuze ko bagomba gufata iya mbere bakirinda ko hari indi jenoside yabaho mu Rwanda cyangwa ahandi.

Yavuze ko abagize Umuryango Imena bubatse urukuta ruriho amazina y’abatutsi bitigeze bimenywa aho baguye  kugira ngo byibura izina rye rijye risomwa yibukwe.

Amazina yakusanyijwe ni 250 mu mirenge itanu ya Rulindo ariko Rulindo ifite imirenge 17 bityo rero hashobora kuba hari abandi.

Bityo ngo habonetse mazina n’ubushobozi hakubakwa izindi nkuta zanditsweho ayo mazina.

Akarere ka Rulindo kagizwe n’inzibutso Icyenda: Mvuzo , Rusiga, Remera, Mbogo,Busizi, Bushoki, Rutonde, Shyorongi na Bushoki.

Urwibutso rwa Rusiga rushyinguwemo imibiri y’Abatutsi igera ku 6,043.

Umuyobozi w’Akarere ka Shyorongi n’abandi bayobozi ubwo bafunguraga ahubwatswe ririya buye
Ibuye ryanditseho amazina y’Abatutsi bitazwi aho baguye. amazina yabo yavanywe mu mirenge itanu ariyo Kinzuzi, Murambi, Shyorongi, Ngoma na Rusiga
Umuhuzabikorwa w’Umuryango Imena Fidel Nsenyiyaremye ashyira indabo ku ibuye ririho amazi y’Abatutsi biciwe muri Shyorongi bitazwi aho baguye
Emmanuel Kayiranga uyobora Rulindo ashyira indabo kuri ririya buye

Jean Pierre NIZEYIMANA

UMUSEKE.RW

2 Ibitekerezo

  • Umuntu watotejwe uwariwe wese ahorana ibikomere haba mu Rwanda cyangwa kwisi hose.Kuko ntawe ubabarira undi. La vraie souffrance est et reste personnelle haba ku mutwa, umututsi cyangwa umuhutu.Umugesera umunyiginya, umwega.

  • @Rugero, banza urebe neza ko definition yawe y’umuntu n’iya Kalisa Evariste ari imwe.

Subiza

Your email address will not be published. Required fields are marked *