• 29/01/2020 5:50 07

Umugore ati ‘duce bugufi’. Komisiyo y’uburenganzira iti ‘Abagabo na bo bibe uko”

Rwamagana – Umwe mu bagore bo mu murenge wa Gishari, Kagari ka Ruhunda witwa Grace Mukamana yabwiye Umuseke ko kugira ngo urugo rugire amahoro byaba byiza umugore aciye bugufi igihe umugabo arakaye, Komisiyo y’Uburenganzira bwa muntu na yo yungamo ko no ku bagabo bajya babigenza uko igihe umugore arakaye.

Mme Nirere Madeleine Perezida wa Komisiyo y’Uburenganzira bwa muntu mu Rwanda

Mukamana yemeza ko ibi byafasha mu kuzana umwuka w’amahoro mu ngo.

Yabivuze nyuma yo kwitabira ikiganiro Komisiyo y’igihugu y’Uburenganzira bwa muntu yahaye abatuye kariya kagari kigamije gutangiza umushinga wo kwigisha abahatuye n’abanyarwanda muri rusange  ko guhohotera abagore n’abakobwa bihungabanya umuryango.

Ni umushinga Komisiyo y’uburenganzira bwa muntu yatangije uzamara imyaka ine uzabera mu Rwanda hose, ikazawushyira mu bikorwa ifatanyije na Ambasade y’u Bushinwa mu Rwanda.

Mukamana Grace wo mu murenge wa Gishari, Akagari ka Ruhunda avuga ko guhohotera abagore n’abakobwa bigaragara mu Kagari atuyemo.

Ngo hari abagabo bafatanya n’abagore babo mu bikorwa by’iterambere nk’ubuhinzi ariko imyaka yakwera bakaba ari bo bonyine bashaka kuyungukiramo kurusha abo bashakanye.

Avuga ko hari ubwo bigera ku rwego rwo kurwana ndetse bakaba bakwicana.

Mu rwego rwo kubungabunga umutekano w’urugo, Grace Mukamana avuga ko umugore yajya aca bugufi kuko ngo iyo ashyize hejuru n’umugabo agashyirayo umuriro waka mu rugo kandi ikibazo umugore yari afite ntigikemuke.

Ati: “Iyo umugore aciye bugufi mu rugo akegeranya abana akabereka ibyo Se arimo ariko ko ashobora guhinduka bamugendeye neza birafasha.”

Perezida wa Komisiyo y’igihugu y’uburenganzira bwa muntu, Madeleine Nirere yabwiye Umuseke ko ikiza ari uko buri wese mu bagize umuryango acira undi bugufi kuko nta we ufite uburenganzira bwo guhohotera mugenzi we.

Ati: “Biterwa n’icyo bita guca bugufi… Ubundi mu rugo abantu barumvikana. Njye nabifata mu buryo bwo koroherana. 
Ntabwo wavuga ngo umugore yorohere umugabo ariko umugabo ntamworohere. Bose bagomba kumva ko koroherana bizana amahoro.”

Nirere avuga ko buriya bukangurambaga buzakorwa mu myaka ine buzajya butambutsa ubutumwa binyuze mu makinamico yigisha.

Ngo ni uburyo bwiza bwo gutambutsa ubutumwa cyane mu cyaro kuko bakunda ikinamico.

Umuyobozi w’Akarere ka Rwamagana, Radjab Mbonyumuvunyi avuga ko imiryango myinshi ibanye neza mu karere ke nubwo ngo hatabura mike igaragaza amakimbirane.

Abo na bo ngo bazakomeza babagire inama igihe cyose bibaye ngombwa.

Yashimye ko Komisiyo yatangirije buriya bukangurambaga mu Karere ayoboye, ariko ngo ntibivuze ko ariho hari ihohotera rikorerwa abagore n’abana kurusha ahandi mu gihugu.

Uyu ni umwe mu bitabiriye iki gikorwa cy’ubukangurambaga bugamije kurwanya ihohotera ku bagore n’abakobwa
Ibikorwa by’ubu bukangurambaga bizanyuzwa mu ikinamico

Jean Pierre NIZEYIMANA
UM– USEKE.RW

3 Ibitekerezo

  • Ntawaremewe guhohoterwa, ariko ntanuwaremewe guhozwaho inkeke! Kworoherana niyo ntango y’urugo rurambye. Uyu mugore we yabivuze neza. Guca bugufi. Naho aya makomisiyo yuzuyemo abakomisiyoneri yo aho yerekeje umuryango nyarwanda haragaragaye. Igihugu mumaze kugihungabanya mukinjizamo imishinga y’uburinganire idafata, ngo muri kwigana abanyaburayi(urebye iwabo batandukana buri munsi)ni rugero ki batuzanira uretse urwo kudutiza umuhoro igihe cyose turi kwisenyera. Abaduteza ingengabitekerezo za mpatsibihugu kandi nta bandi ni abo bakomisiyoneri bo muri ayo makomisiyo. Iyo bibera za Kigali iyo, bamwe muri bo ntibabana n’abo bashakanye mucyumba kimwe! Abo ngo nibo baba baje kunga imiryango da! Abashakanye niboroherane kubw’inyungu z’imiryango n’umuco nyarwanda.

  • Abanyaburayi rea bo gutandukana kwabo
    Nta gihombo kinini babibonsmo nkatwe
    Ikindi abana babo bo ntibagerwaho ni ibibazo nka abacu
    Ibihugu byabo byinjiye muri gender kera cyane
    Bahuye nibi turi guhura nabyo
    Urebye mu Rwanda yagiyeho itegeko
    Ryuko
    Umwana wese kuva 0-18 uwo mwana akomeze kurerwa nu umuryango
    Icyumweru kwa papa ni ikindi kwa mama
    Niryo tandukana ryazana agahenge
    Kuko mu burayi burya kiriya kirabashobora
    Abenshi batinda gutandukana abana bakiri bato kubera ko bibagora
    Niyo babikoze barabyakira kuko biri mu itegeko
    Naho twe turazana gender ariko
    Amategeko yayo agakomeza gupyinagaza umunyarwandakazi
    Kuko iyo bamutaye niwe usigarana umwana igihe cyose
    Nu umugabo nta fr atanga
    Ugasanga aricyo gituma abana bajya mu mihanda
    Ibi ntako tutagize tubisabe aba depite biracyari kure nku ukwezi
    Usoma hano abibambwirire
    Cyangwa bajye baduha umwanya natwe tubabwire uko tubyumva
    Kuko kubyandika hano
    Agatoki kagiye kuzahacikira
    Na abatera abakobwa inda iri tegeko risohotse
    Ndakurahiye ko ntazo wazongera kubona
    Kuko uziko waba ukora wiga
    Uzajya uba ufite inshingano ku mwana wawe
    Kuko ni wowe wamubyaye
    Nawe mugore
    Bityo bizagufasha kubaha umugore , umugore nawe yubaha umugabo
    Kubera wa mwana uri hagati yabo
    Na babandi bitwa ba mukase nta mushiha
    Bazongera kugira kuko
    Umwana nibwo azaba ari uwumuryango
    Ariko birasaba ubukangurambaga buhagije
    Kuko nabonye abanyarwandakazi baguha cyane
    Sinziko mu mico yabo habamo kwakira neza umwana wu umukeba
    Mu birayi barabahuguye umwana ni umwana
    Uramufataneza icyo cyumweru
    Ubundi agasubira kwa se or kwa nyina
    Bigatuma abana bakura batitwa ibinyendaro?
    Iryo zina naryo ntiturishaka muri sosiyete yacu
    Ni ukurirwanya
    Umwana Kandi agakura azi se na nyina
    Kuko nabyo ni ingenzi
    Ibyo nibyo nifuza ko intumwa za rubanda
    Zadufasha gukemura

  • NJYE MBONA UMUGORE YAKAGIZE KOROHERANA KURUSHA UMUGABO BIBILIYA IVUGAKO UMUGABO ARI UMUTWARE W’URUGO NYAMARA ABAGORE BAKWIYE GUCA BUGUFI NTIBISENYERE BAKIHANGANA MU GIHE UMUGABO AGIZE UBURAKARI KUKO BIRAKABIJE RWOSE ABA BANTU BIGISHA UBURINGANIRE NIBO USANGA INGO ZABO ZARASENYUTSE NONE BIRIRWA BASHUKA ABAGORE NGO MUMENYE KO MUNGANA N’ABAGABO BANYU UGASANGA RURASENYUTSE KANDI UBOHOMBERAMO WA MBERE NI UMUGORE N’ABANA UMUGABO AHITA ASHAKA ISUGI VUBA CYANE, MUZABANZE MUMENYE IMPAMVU BA MUKECURU BANYU BASAZIYE IWABO MUBABAZE IBANGA BAKORESHEJE NONESE UGIRANGO NUKO BATAHURAGA N’IRYO HOHOTERWA ARIKO BARIHANGANAGA KANDI UGASANGA NIBYO BITANZE AMAHORO MU RUGO ITEKA UMUGABO AKUNDA ICYUBAHIRO MU RUGO IYO USHATSE KUKIMWAMBURA RERO BIBA BIBI KURUSHAHO NYABUNEKA IMICO Y’ABAZUNGU IRASENYA UMURYANGO NYARWANDA, NIMUREBE I BUGANDE UMUGABO NI UMWAMI MU RUGO, I BURUNDI UMUGABO NI UMWAMI, TANZANIYA UMUGABO NI UMWAMI MU RUGO NA KENYA NUKO RERO MUREKERAHO G– USENYA UMURYANGO NYARWANDA UMUGABO NI UMWAMI MU RUGO SIMVUZENGO AHOHOTERE UMUGORE UKO ASHATSE ARIKO DIVORCE ZIRI MURIKIGALI ZITEYE UBWOBA NIZIGARAGARA KO ZUBATSWE NI KURI SIYASA GUSA IMANA ITABARE NUKURI BITEYE UBWOBA.

Subiza

Your email address will not be published. Required fields are marked *