• 28/01/2020 2:39 16

Uhanga imideli ati: ‘Kugera ku byo ushaka bisaba guhozaho”

  • Yatangiye guhanga imideri mu 2008 icyo gihe yakoraga imirimbo yo kurimbana
  • Yatangije ubucuruzi bwe Frw 250 000
  • Ni umuyobozi w’ihuriro ry’abahanga imideli mu Rwanda

Uwera Karen ni rwiyemezirimo mu bijyanye no guhanga imideli. Yatangiye akora imirimbo yo kwambara nk’inigi n’ibindi ariko mu 2015 atangira ibyo guhanga n’indi mideli irimo imyambaro. Asaba bagenzi be bagitangira uyu mwuga kudacika intege kuko ‘imbuto z’umugisha zera ku giti cy’umuruho.’

Kareen Uwera avuga ko gukora cyane no kudacika intege bigera aho bigatanga umusaruro

Ngo hari benshi batangira uriya  mwuga bagashora amafaranga babona hashize nk’imyaka ibiri bataragaruza ayo bashoye  bagahita babivamo, yabasabye gukomeza gukora bakigira ku bandi kandi ngo igihe kiragera ‘bigacamo’.

Avuga ko ibyo guhanga imideli yabitangiriye muri Uganda mu murwa mukuru Kampala ahagana mu 2018.

Mu myaka irenga icumi amaze muri uyu mwuga ngo yahuriyemo na byinshi birimo ibyiza nko kuba yaratumiwe mu bihugu bitandukanye nka  Ghana n’Ubuyapani ndetse n’ahandi ateganya kuzajya kwerekana imideli ahanga muri iki gihe.

Mu iduka rye acuruza imideli itandukanye irimo imyenda y’abagabo n’abagore ariko ateganya  gutangira gukora imyenda y’abangavu n’ingimbi

Twaramusuye aho akorera mu Murenge wa Remera dusanga ari kwerekera abakozi be uko bakora akazi, nyuma aratwakira turaganira.

Karen avuga ko yatangiye ibyo guhanga imideli akiri muto cyane ariko mu 2008 akaba aribwo yahisemo kubikora kinyamwuga akiyemeza kubishoramo amafaranga.

Ati: “ Natangiye ibyo guhanga imideli  ntuye i Kampala muri Uganda. Nyuma yo kugaruka mu  Rwanda naje gufungura inzu y’imideri nyita Karssh Collection. Dukora imyenda itandukanye irimo iy’abagabo n’abagore.”

Ngo iyo ahanga  imyambaro yibanda cyane ku myenda abantu bambara bagiye mu kazi no mu zindi gahunda.

Akunda ariko gukora imyambaro y’abantu babyibushye ariko ngo arateganya no gukora iy’ingimbi n’abangavu.

Uwera avuga ko mbere abanyarwanda benshi batiyumvishaga akamaro ko guhanga imideli ariko ubu ngo batangiye guhindura imyumvire.

Yemeza ko abenshi bumvaga ko imyenda yose ikorerwa mu Rwanda igomba kuba ari ibitenge gusa.

Ndetse ngo iyo hagiraga uhanga imwenda mu bindi bitambaro abantu ntibemeraga ko yabaga yahangiwe mu Rwanda.

Karen wamaze imyaka itanu akora imirimbo gusa atarinjira mu myenda ngo yagowe cyane no kubaka ubushobozi bw’abadozi be no kubona ibitambaro byiza kandi bikomeye yajya akoramo imyenda ye.

Ati “ Ndibuka ko hari bimwe mu bikoresho najyaga ntuma muri Asia  kuko kubibona inaha byabaga bigoye. Ikindi cyangoye muri uyu mwuga ni ukubona abadozi bashobora gukora neza umwenda nk’uko nawushushanyije.”

Karen  avuga ko imiryango ifunguriye buri wese wifuza kwinjira mu ihuriro ry’abahanga imideri mu Rwanda ndetse ngo ryashinzwe mu rugaga rw’abikorera ‘PSF’.

Imyambaro ahanga harimo n’iy’abasore bakuze
Umukobwa wambaye ikanzu nk’iyi araberwa
Imwe mu myenda ikorwa na Karen Uwera
Ng’uyu mu iduka rye riri i Remera muri Gasabo

Robert KAYIHURA

UMUSEKE.RW

Subiza

Your email address will not be published. Required fields are marked *