• 11/12/2019 11:51 43

Uhagarariye UNDP muri Africa yasuye imishinga bateye inkunga binyuze muri “YouthConnekt Summit Africa”

Umuyobozi wungirije w’Ishami ry’Umuryango w’Abibumbye ryita ku Iterambere (UNDP), akaba anarihagarariye muri Africa, kuri uyu wa mbere tariki ya 07 Ukwakira yasuye ishuri ryigisha abafite ubumuga bwo kutabona riri mu Karere ka Musanze, yishimiye intera abana baryigamo bariho, ndetse anasura urubyiruko rwihangiye imirimo mu Karere ka Musanze na Rubavu.

Mme Ahunna Eziakonwa yavuze ko yishimiye intambwe abana bafite ubumuga bwo kutabona bamaze gutera nyuma yo kujya mu ishuri UNDP yafashije muri 2017

Ishuri yasuye riri mu Murenge wa Cyuve mu Karere ka Musanze. Mme Ahunna Eziakonwa yavuze ko yishimiye intambwe abana baryigamo bari gutera ndetse n’ibyifuzo byabo ku hazaza, avuga ko byose bihura n’intumbero za UNDP kandi ko bazakomeza kubaba hafi nyuma y’inkunga babateye.

Yagize ati “Intumbero ya UNDP ni uko nta we ugomba gusigazwa inyuma bitewe n’ubumuga afite. Twese turangana. Ndashimira ubuyobozi bwa UNDP mu Rwanda ndetse nkanashimira umuyobozi w’iki Kigo ari na we wagishinze, turabizeza kuzakomeza kubaherekeza muri iyi nzira nziza murimo.”

Abanyeshuri biga guhera mu wa mbere kugera mu wa gatanu w’amashuri abanza, bagaragaje ikibari ku mutima, bavuga ko bifuza kandi banafite ikizere cyo kuzavamo abayobozi beza b’ejo hazaza mu nzego zitandukanye.

Umwe mu banyeshuri waganiriye na Umuseke yitwa IRUMVA Eric, yashimiye UNDP yabateye inkunga anagaragaza ko n’ubwo bafite ubumuga bifitiye ikizere cy’ahazaza.

Umuyobozi w’Ishuri Hillside Hope School, NTAKIRUTIMANA Bosco, avuga ko mu mwaka wa 2015 yashinze iri shuri akuye igitekerezo ku mwana we wavukanye ubumuga bwo kutabona, bityo yumva ko hari abandi babyeyi yafashiriza abana.

Avuga ko kubona ubufasha bya UNDP byabafashije cyane kuko byatumye babona bimwe mu byo baha abarimu, no kugaburira abanyeshuri.

Yagize ati “Twabonye ubufasha bwa UNDP mu mwaka 2017, kugeza uyu munsi baduhaye inkunga ya miliyoni 50Frw zirenga, kandi nizo tugikoresha kuko nta bandi baterankunga turagira.”

Mu byo bifuza ngo ni uko babona abaterankunga barimo na Leta kuko hari ibikoresho birimo imashini ndetse n’ibitabo batarabona kandi bikaba bihenze ku isoko ku buryo batabasha kubyigurira, dore ko hari n’ibitaboneka mu Rwanda.

Umuyobozi wungirije w’Ishami ry’Umuryango w’Abibumbye ryita ku Iterambere (UNDP), , akaba anarihagarariye muri Africa, Mme Ahunna Eziakonwa yagiye gusura n’uruganda “UBURANGA Products” rw’uwitwa Nshyimiyumuremyi Cephas rukora amasabune n’amavuta.

Yavuze ko urubyiruko rukwiriye kubyaza umusaruro ibikomoka mu gace rutuyemo harimo n’ibimera, bikamamara hanze y’u Rwanda aho kwamamaza ibivuye hanze.

Nyuma yasuye urubyiruko rukora ibikoresho bitandukanye birimo intebe muri Musanze Polytechnic, ahu rubikora mu mabuye, anasura uruganda rwenga inzoga ruri mu Murenge wa Kanama mu Karere ka Rubavu.

Aba babose yasuye batewe inkunga binyuze muri YouthConnekt Summit Africa. Inama nk’iyi uyu Muyobozi wa UNDP muri Africa yajemo i Kigali, iratangira kuri uyu wa gatatu tariki 9-11 Ukwakira 2019.

Umuyobozi wungirije w’Ishami ry’Umuryango w’Abibumbye ryita ku Iterambere (UNDP), akaba anarihagarariye muri Africa, Mme Ahunna Eziakonwa yaganiraga n’abanyamakuru

Thierry NDIKUMWENAYO
UMUSEKE.RW/Musanze

Subiza

Your email address will not be published. Required fields are marked *