• 21/01/2020 9:51 41

Uganda yirukanye abandi Banyarwanda 11 bari baragiye gupagasa

Umubano utari mwiza hagati y’u Rwanda na Uganda ukomeje kugira ingaruka ku baturage banyuranye b’Abanyarwanda kugeza no ku baciriritse bari baragiyeyo gupagasa. 11 baraye boherejwe n’iki gihugu bagezwa ku mupaka wa Gatuna. Bari bamaze igihe, bamwe amezi atatu, bafunze mu buryo bavuga ko ari bubi cyane.

Utwo babashije guhambira nitwo babemereye kuzana
Utwo babashije guhambira nitwo babemereye kuzana

Mu bihe bishize bya vuba hari Abanyarwanda bafunzwe muri Uganda bashinjwa imigambi yo kugirira nabi iki gihugu, hari abakorewe iyicarubozo, hari n’Umunyarwandakazi wari umuyobozi muri MTN yaho uherutse kwirukanwa yoherezwa mu Rwanda.

Abaturage 11 barimo abana, abagore n’abagabo ejo nimugoroba bagejejwe ku mupaka wa Gatuna n’inzego z’umutekano muri Uganda ngo batahe iwabo, uyu munsi bavuze uko byagenze.

Ni abaturage bavuga ko bari baragiye muri Uganda gushakisha imibereho nyuma yo kumva ko ibi bihugu bihuriye mu muryango utuma abantu bisanzura mu mirimo n’ingendo mu bihugu binyamuryango.

Muri bo hari abavuye mu turere twa Huye, Ruhango n’i Kigali. Harimo abari bamaze imyaka itatu kumanura. Bose bemeza ko nta byangombwa byo kuhatura bari bafite.

Umugore umwe mu batashye wari utuye mu mujyi wa Kigali avuga ko yari yagiye muri Uganda gushakisha ubuzima kuko nta butaka yari afite mu Rwanda nyuma yo gupfakara.

Ati “Njyewe icyo nabonye ni uko badashaka Abanyarwanda, niyo waba ufite ibyangombwa babishatse bagufata.”

Kuva umwuka utangiye kuba mubi hagati y’u Rwanda na Uganda aba baturage ngo batangiye kubona ibimenyetso ko badashakwa muri Uganda.

Batawe muri yombi kuko nta byangombwa bafite bibemerera kubayo, bavuga ko bari bafungiye ahitwa Jinja Road, ndetse ngo bahasize n’abandi Banyarwanda bahafungiye kubera iki kibazo na bo bazoherezwa vuba.

Umwe muri aba ati “Twari tumerewe nabi cyane, dufunganye n’abana n’abakuru bakatugaburira rimwe ku munsi na bwo akawunga kadahiye n’ibishyimbo bijya ku mashyi gusa.”

Bavuga ko birukanywe badahawe utwabo bari bamaze kugeraho kuva bahagera. Uretse utuntu babashije guhambira gusa.

Aravuga ko bari bafunze nabi cyane
Aravuga ko bari bafunze nabi cyane bicishwa inzara

Leta y’u Rwanda ishinja iya Uganda kugirira nabi, guhohotera no gufunga binyuranyije n’amategeko bamwe mu Banyarwanda bari muri Uganda nta mpamvu zifatika zihari nk’uko Minisitiri w’Ububanyi n’Amahanga w’u Rwanda yabibwiye abanyamakuru umwaka ushize.

Leta ya Uganda yo yashinje iy’u Rwanda gushimuta impunzi za Politiki z’Abanyarwanda zahungiye muri Uganda, ndetse nyuma itangaza ko izirukana Abanyarwanda bose bahatuye mu buryo butemewe n’amategeko.

Leta y’u Rwanda yo yatangaje ko nta muturage wa Uganda uzagirirwa nabi mu Rwanda kubera ibi bibazo bya Politiki.

U Rwanda na Uganda ni ibihugu bisobekeranye mu babituye kubera umubano w’igihe kinini byagiranye, kuri buri ruhande  hari abenegihugu benshi b’urundi ruhande bafite ibyangombwa n’abatabigira, ndetse n’imiryango imwe abayigize ugasanga bamwe bari hakurya abandi hakuno.

Umubano mubi mu bya Politiki umaze iminsi hagati y’ibihugu byombi hari abemeza ko ari wo utera izi ngaruka ku baturage b’ingeri zinyuranye kugeza no ku baciriritse cyane nk’aba birukanywe ejo no mu minsi ishize.

Ngo hari abandi basize inyuma nabo bafunze
Ngo hari abandi basize inyuma nabo bafunze
Bari bamaze igihe bafunganye n'abana babo
Bari bamaze igihe bafunganye n’abana babo
Aho bari bafungiye ngo bari bagiye kwicwa n'inzara
Aho bari bafungiye ngo bari bagiye kwicwa n’inzara

Photos©E.Ngirabatware/Umuseke

Evence NGIRABATWARE
UM– USEKE.RW

6 Ibitekerezo

  • Birababaje kubona abantu bagaraguzwa agati gutya kandi amasezerano ibihugu byombi byashizeho umukono yemera urujya n’uruza rw’abantu hagati y’ibihugu.

  • Ngiyo East African community! Iki ni ikimenyetso simusiga cyerekana ko za nama bajyamo bagahoberana baba baryaryana! Njye nsang abakwerura ko byabananiye buri gihugu kikarwana no kurengera inyungu zacyo naho ni bya bindi bavuga amahoro bahishe imihoro!

  • Abagande bo mu Rwanda baridegembya kandi ntacyo benda no kuzabatwara. Gusa burya baraduhatse muri byose kuko imirimo yose aribo bayigaruriye mu gihugu cyacu kuko ngo aribo bazi icyongereza. Mu ma banki, mu nganda, mu burezi aho baza bakangish’ibyongereza bidashinga, ndetse no mu nzego bwite za leta buzuyemo kuko binjiyemo kuva 1994. Nitumara kumvako kumeny’icyongereza atariko kumeny’ubwenge, tuzabipakurura ahasigaye bibe kimwe ku kindi. Arega mujye mumenyajo abungukiye muri iyi regionalisme ari abanyakenya n’abagande gusa twe n’abarundi dutahir’amagambo n’ubwirasi gusa. Umunyakenya araza agatangiz’urwego rw’aba avocat, urwego rw’abakontabure n’urw’abaenjenyeri nk’aho mu Rwanda ntawushobora kubitanzgiza. Ngaho tukiyandikisha tukanabishyur’imisanzu y’abanyamuryango kandi ari wacu. Amabanki ishyano ryose y’abanyakenya, amakaminuza yabo ndetse n’ay’abagande, abitw’aba expert bazan’icyongereza gusa tukabaha budget yacu yose y’igihugu bakayijyan’iKampala na Nairobi ngiy’inyungu twakuye muri EAC. Rwanda kanguka va muby’urimwo kuko ntabw’ugihek’abawe uko bikwiye.

  • East African community! harya ubu bigeze he ngo passport imwe amanama y’urudaca.

  • Rwanda Rwanda nziza ngewe ndi umugande yabaye murwanda igihe kinini kandi nshaka numudame wumunyarwanda kazi ubu tukaba dufitanye abana4 ubu bose bakaba batuye ikampala wamu na mama wabo ngewe mba haze muburayi aliko igihe nabaye murwanda nkabana nabavadimwe nishuti zabanyarwanda nago nigeze mbona nakimwe batandukanya ko ngewe ndi umugande cagwa umunyamahanga rero ndashima kurwubutware abanyarwanda bafite aliko mumenyeko ibyo byose nibibazo by a bayobozi febwe abagade tubabazwa nimyazuro abayobozi
    na Uganda bafata kuko nago idushimisha nagato murakoze.

  • ubugande bushinzwe abagande(nabo bafite ubucyene bwabo),ni gute bajya guharira abanyamahanga bafite abagande bafite ibibazo byabo?
    mugihugu cyacu niho honyine baharira abanyamahanga ba kavukire baratesetse(harakabano neoliberalim,ubukoloni, byatuzaniye genocide,imvururu n’ubucyene)

Subiza

Your email address will not be published. Required fields are marked *