U Rwanda rufite byose bikenewe ngo ruhangane na Ebola – Dr Zuberi

Umupaka utandukanyije Kigali na Ebola ni intera ya km 414,  gusa kuva mu mugi wa Beni ugera i Rubavu ni km 240, u Rwanda ngo ntirwicaye ubusa rurebera ko icyo cyorezo kibangamiye umutekano w’umuntu kinjira ku butaka bwarwo, Dr Muvunyi Zuberi ushinzwe ibikorwa by’Ubuvuzi avuga ko uyu munsi hari ubushobozi buhagije bwo kurwanya Ebola.

Ebola ni indwara yandura cyane ku buryo bisaba abaganga kwitwararika cyane ngo batanduzwa n’abarwayi

Ebola ni imwe mu ndwara zandura vuba cyane kandi yica abantu benshi mu gihe gito, kugeza ubu nta rukingo rushobora kuyivura ngo ihite ikira, kuko umubare munini w’abayanduye irabahitana.

Mu biganiro byahuje abayobozi b’Ibitangazamakuru, Abanditsi Bakuru, Pax Press n’Inzego z’Ubuzima, Dr Zuberi Muvunyi ushinzwe ibikorwa by’ubuvuzi (Clinical & Public Health Services) muri Ministeri y’Ubuzima yavuze ko u Rwanda rwiteguye cyane guhangana na Ebola haba mbere y’uko yagaragara ku butaka bw’u Rwanda na nyuma y’uko haba hari umuntu wagaragaye ko yayanduye.

Yagize ati “Kuva habaho gutangaza ko Ebola iri mu gace ka Beni muri Kivu y’Amajyaruguru (mu Burasirazuba bwa Congo), mu nama tugira n’abo dukorana mu kazi iki kibazo si ubwa mbere nkibajijwe… Ariko u Rwanda uko nduzi turimo turitegura, dufite inzego z’umutekano nzi ko hari icyo bakora tubaye tutari tayari (tutiteguye) bo hari ikintu byanga bikunda bakora.”

Icyo ni igisubizo ngo yahaye umuntu ukora mu kigo cyo muri America kita ku bushakashatsi bw’indwara z’ibyorezo ariko ngo yari yamubajije mu gihe gishize ubwo Ebola yatangazwaga ko yageze muri Beni hashize amezi abiri.

Dr Muvunyi Zuberi kuri uyu wa kabiri tariki 30 Ukwakira yavuze ko u Rwanda rwiteguye cyane guhangana n’iyi ndwara. Mu bimaze gukorwa ngo harimo guhugura abantu benshi bashoboka (Rapid Response Team) barimo Polisi y’Igihugu, Abatabazi (Coix Rouge), Abajyanama b’Ubuzima, Abaganga, n’inzego z’ubuyobozi bw’ibanze bitewe n’uko ngo Ebola igihe yaza kuyirwanya byasaba ubufatanye bwa bose.

Ati “Twahereye ku turere tuvuga ngo ni “high burden” (twegereye cyane Congo), Rubavu murumva ko ari ‘high burden’, Rusizi ni ‘High burden’ n’ahandi ntavuze.”

Uretse ayo mahugurwa y’abantu bashobora gutanga ubutabazi bwihuse, u Rwanda ngo rwubatse uburyo bwo guhuza amakuru (coordination) nka kimwe mu biba bikenewe cyane mu guhangana na Ebola, hashyizweho inzira bizajya bikorwamo yiswe “public health emergency operational center” ikorera ku rwego rwa Minisiteri y’Ubuzima.

Yagize ati “Ebola ni indwara yandura cyane ifite n’umubare munini w’abo yica mu bayanduye, ni yo mpamvu hari ibigo by’umwihariko byitwa “Ebola treatment Centers”, dufite bitatu, Rugerero (Rubavu), Nyarushishi (Rusizi) n’I Kigali.”

Dr Zuberi avuga ko u Rwanda rwabanje gushyira imbaraga nyinshi muri kiriya kigo cya Rugerero kiri muri Rubavu kikaba kiteguye ku gipimo cya 90% ku kuba cyafasha abanduye Ebola, ngo cyaburaga igikoresho kitwa (incinerator) n’uburuhukiro bugendanwa (mobile mortuary) kugira ngo kibe cyuzuje ibisabwa 100%, ibyo ngo biraba bihari mu gihe cya vuba.

U Rwanda kandi ngo kuva rwamenya ko muri Beni hari Ebola, ku mipaka y’u Rwanda yegeranye na Congo Kinshasa habaho gupima umuriro ku binjira kubera ko kimwe mu bimenyetso bya Ebola umuriro ari nk’ik’ibanze.

Yavuze ko gusuzuma umuriro (Screening) binakorwa ku kibuga k’indege ariko ngo ho abantu ntibabimenya kuko hari imashini (camera) kabuhariwe ishobora gufata ibipimo by’umuriro ku bantu 50 icyarimwe. Iyo mibare ngo barayireba uwo basanze afite umuriro udasanzwe agashyirwa ukwe hakarebwa ko nta kibazo yaba afite.

Indi ntambwe ikomeye ngo ni uko u Rwanda ubu rushobora gupima EBOLA hakamenyekana niba umuntu ayifite bidasabye kujya hanze. Mbere ngo byasabaga kujya muri Uganda ariko ubu ngo ibizamini bifatirwa muri Laboratoire y’igihugu.

Ati “Mu magambo make Ebola iramutse ije twiteguye kuyirwanya, ni nayo mpamvu twashyizeho uburyo bwo kwerekana uko twahangana na Ebola ibaye ije.”

Ku wa Mbere tariki 29 Ukwakira mu Karere ka Rubavu, Minisiteri y’Ubuzima ifatanyije na Polisi y’u Rwanda na Croix Rouge y’u Rwanda bakoze imyitozo y’uburyo bazitwara mu gihe hagaragaye umurwayi wa Ebola, iyi myitozo ngo izanakorwa n’ahandi nk’i Rusizi, ndetse ngo hari n’iyakorewe mu Bitaro bya Gisirikare kandi igenda neza.

 

EBOLA ni ndwara ki?

Ebola ni indwara iterwa na Virus. Ku rubuga rw’Umuryango w’Abibumbye wita ku Buzima (OMS/WHO) bavuga ko Ebola ishobora kwica abagera kuri 50% by’abayanduye.

Ni indwara ica intege abasirikare b’umubiri (cells). Irangwa no kugira ububabare bukabije mu mutwe (severe headache), umuriro ukabije (a fever of at least 100.4 degrees), kubabara imitsi, kuruka, gucibwamo, gushesha ibintu ku mubiri, kuruka amaraso, kuribwa mu nda no kuva amaraso umubiri wose.

Urubuga (Live Science) rutangaza ko ubushakashatsi bwakozwe mu bihugu bya Guinea, Liberia na Sierra Leone, nyuma y’uko hadutse icyorezo cya Ebola yahitanye abasaga  11 300 hagati ya 2014 na 2016, bwagaragaje ko abana batoya cyane Ebola ibica kuruta abantu bakuru.

Nibura abana bari mu kigero cy’umwaka umwe banduye Ebola, abagera kuri 90% barapfuye, mu bana bafite hagati y’umwaka umwe kugera ku myaka ine, abapfuye bagera kuri 80% by’abanduye Ebola. Ubushakashatsi bwagaragaje ko abana bafite imyaka yigiye hejuru gato y’iyavuzwe bagenda bagira amahirwe yo kuba bakira Ebola, aho abana bafite imyaka hagati ya 10 na 15 abo Ebola yahitanye bagera kuri  52%.

Ubushakashatsi bwagaragaje ko abana b’imyaka 15 no ku bantu bakuru, nibura abapfa mu banduye Ebola bashobora kugera kuri 65%.

Ebola ntiyandurira mu mwuka, ni indwara yanduzwa igihe umuntu uyirwaye umubiri we akoranyeho n’uwa mugenzi we. Minisiteri y’Ubuzima ibuza abantu kurya inyama z’amatungo cyangwa inyamaswa z’agasozi zipfishije, ikabuza kuzikoraho no gutanga amakuru ku gihe, igihe ubonye umuntu ufite biriya bimenyetso byavuzwe.

Mu biganiro byari biyobowe na Solange Ayanone, Dr Zuberi Muvunyi ni uwa kabiri iburyo
Dr Zuberi Muvunyi ushinzwe Ibikorwa by’Ubuvuzi muri Minisiteri y’Ubuzima

HATANGIMANA Ange Eric
UM– USEKE.RW

Subiza

Your email address will not be published. Required fields are marked *