• 14/12/2019 6:56 56

U Rwanda na Uganda byarezwe mu rukiko kubera ‘gufunga imipaka’

Imiryango itegamiye kuri Leta muri Uganda yatanze ikirego mu rukiko irega Leta y’u Rwanda n’iya Uganda ku mabwiriza yo gufunga imipaka, ivuga ko yakenesheje abaturage.

Tariki 25 Gicurasi 2019 ba Perezida Paul Kagame na Yoweri Museveni bahuriye muri Africa y’Epfo mu muhango wo kurahira kwa Perezida Cyril Ramaphosa, ku ifoto basaga nk’abaganira ku kibazo gikomeye umwe ateze undi ugutwi

Kuva mu kwezi kwa kabiri, ubutegetsi mu Rwanda bwafunze umupaka wakoreshwaga cyane wa Gatuna “bunagira inama” abaturage b’u Rwanda yo kutajya muri Uganda.

Abategetsi bavuze ko batafunze imipaka yose ahubwo bafunze uwo mupaka umwe ngo usanwe.

Ibi byabaye mu gihe cy’ubushyamirane bwa politiki hagati y’ibihugu byombi bukomeje kugeza ubu.

Imijyi n’ibice byegereye umupaka w’u Rwanda na Uganda byahungabanyijwe n’ibi byemezo, nk’uko iyi miryango yareze ibivuga.

Deborah Kyarisiima, umuyobozi wungirije mu ishyirahamwe ry’abacuruzi b’abagore ku mupaka wa Gatuna igice cya Uganda, avuga ko hari abantu bari barafashe inguzanyo ngo bakore ubucuruzi bwambukiranya imipaka ariko ubu bahunze kuko bari kwishyuzwa kandi badafite icyo bishyura.

Barasaba indishyi z’akababaro

Bavuga ko abaturiye ibi bice, by’umwihariko abagore bakora ubucuruzi hagati y’ibihugu byombi, “batewe n’ubukene” kuva u Rwanda rwafata ibyo byemezo.

Ikirego k’iyi miryango kuri Leta zombi cyashyikirijwe urukiko rw’umuryango w’ibihugu bya Afurika y’Iburasirazuba (EAC), kivuga ko gufunga imipaka binyuranyije n’amabwiriza ashyiraho uyu muryango.

Abarega barasaba n’indishyi z’akababaro ku bagizweho ingaruka n’ibi byemezo bya politiki.

Uganda yahungabanyijwe byihariye n’ibi byemezo kuko Banki y’iki gihugu ivuga ko ibyoherezwaga mu Rwanda byagabanutseho 80% mu kwezi kwa gatatu ugeraranyije n’ukwezi kwa kabiri.

Abarezwe, nta we uragira icyo avuga kuri iki kirego.

Buri ruhande, u Rwanda na Uganda, rushinja urundi kwivanga mu bibera imbere mu gihugu.

Hari n’Abanyarwanda baherutse kwifashisha Umunyamategeko bavuga ko barega Leta ya Uganda ku bwo kuba barahohotewe n’inzego zayo zishinzwe umutekano, na bo bavugaga ko baregera indishyi z’akababaro zigera kuri miliyoni 1,1$.

U Rwanda ruheruka gufungura by’agateganyo Umupaka wa Gatuna mu byumweru bibiri, ubu byarashize ubuyobozi buvuga ko wongeye gufungwa, cyakora Uganda na yo yari yatangaje ko amakamyo yabo atemerewe kuhanyura isaba u Rwanda kugerageza ko ibyubatswe bikomeye rukoresheje imodoka zarwo.

BBC

UMUSEKE.RW

1 Igitekerezo

  • Nahoze nsoma ku gitangazamakuru kimwe ko bafungirye imodoka nini mu igerageza ry’ibyakozwe hakaboneka ko hari amarange asizwe nabi ku nzugi z’inyubako zo ku mupaka barongera barahagarika. Ikiboneka ni uko hari ukuri kuri ku mupaka wa gatuna impande zombi zidashaka ko rubanda rumenya. Koko utagra we ntagereranya? Kongera guhagarika amakamyo kubera ko amarange adasizwe neza? Ese igerageza ryakoresheje ayahe makamyo ko Uganda yari yasabye ko u Rwanda rwakoresha ayarwo?

Subiza

Your email address will not be published. Required fields are marked *