• 12/12/2019 4:05 10

U Rwanda na Misiri bagiye gushyiraho itsinda ry’ubushuti bushingiye ku Nteko

Kuri uyu wa gatatu Perezida w’Inteko Ishinga Amategeko, Umutwe w’Abadepite yagiranye ibiganiro na Dr Aly Abdel Aal Perezida w’Inteko ishinga Amategeko mu Misiri bemeranya ko bagiye gushyiraho itsinda ry’ubushuti hagati ibihugu byombi.

Dr Aly Abdel Aal yaraye ageze mu Rwanda yakirwa na Hon Mukabalisa Donatille Perezida w’Inteko ishinga Amategeko y’u Rwanda (Abadepite)

Hon Mukabalisa Donatille Perezida w’Inteko, umutwe w’Abadepite yavuze ko uruzindiko rwa Dr Aly Abdel Aal wa Misiri rugamije gukomeraza gutsura umubano hagati y’ibihugu.

Avuga ko bagaragarije aba Badepite bo mu Misiri amateka y’u Rwanda aho rwavuye n’aho rugana mu nzira y’iterambere.

Mukabalisa Donathille yavuze ko mu rwego rwo gukomeza gutsura umubano w’ibihugu byombi ndetse n’inteko zishinga Amategeko ibihugu byemerenyije gushyiraho abantu bashinzwe uwo mubano.

Ati “Twemeranyije ko tuzashyiraho itsinda ry’ubushuti hagati y’inteko zishinga Amategeko ndetse no gukomeza gusangira ubunararibonye.”

Avuga ko byose bizanyura mu gukomeza gusurana hagati y’abagize inteko nshingamategeko muri ayo matsinda y’ubushuti.

Yagize ati  “Ayo matsinda arasanzwe mu mikorere y’inteko nshingamategeko, ubu no ku ruhande rw’u Rwanda na Misiri twemeranyije gushyiraho iryo tsinda rigizwe n’Abadepite bake ku mpande zombi.”

Dr Aly Abdel Aal Umuyobozi w’inteko Nshingamategeko ya Misiri avuga ko uruzinduko rwe rugamije kongera gutsura umubano,  ko bazakomeza kungurana ubumenyi hagati y’inteko Ishinga Amategeko zombi biciye muri ririya tsinda ry’ubushuti.

Dr Aly Abdel Aal aranagirana ibiganiro na Perezida wa Sena, Bernard Makuza. Uruzinduko rwe yarutangiye ku wa kabiri tariki 23 Nyakanga azarusoza tariki 25 Nyakanga, akaba ari kumwe n’abandi umunani.

Kuri uyu wa gatatu Dr Aly Abdel Aal yagiranye ibiganiro na Perezida w’Inteko ishinga Amategeko umutwe w’Abadepite, aranaganira na Perezida wa Sena

Josiane UWANYIRIGIRA
UMUSEKE.RW

2 Ibitekerezo

  • “…byose bizanyura mu gukomeza gusurana hagati y’abagize inteko nshingamategeko muri ayo matsinda y’ubushuti”????? Ubwo harya umusaruro mutubwiye uzava mu gusurana kwanyu ni uwuhe koko? Ibyo abaturage bakeneye ni ibikorwa by’ishoramari bituma havuka imirimo, kwagura ubucuruzi cash zikiyongera,… ibindi by’amatsinda ngo asurana kenshi mube mubigabanyije rwose!

  • Sha aba bantu bazi icyo gukora kweri !
    Bararwana ku mazi ya Nyabarongo-Akanyaru-Akagera-Nil, ngo législatif ijye ibavugira muri exécutif.

    Bisa nyamara na dipolomasi

Subiza

Your email address will not be published. Required fields are marked *