• 18/01/2020 2:20 34

Twemeje ko muri 2020 ubutaka bwose buzaba bufite amaterasi, ubu ari hake – Prof K.Mbanda

Prof Kalisa Mbanda mu kiganiro yahaye urubyiruko rukora ubuhinzi ruhagarariye Uturere twose tw’u Rwanda yabasabye kuzarushaho kubungabunga ubutaka. Avuga ko igihe we na bagenzi be bashyiragaho Vision 2020 bari baremeje ko bitarenze 2020 ubutaka bwose buzaba bufite amaterasi y’indinganire ariko ubu ngo usanga ari hake.

Amaterasi y’indinganire ari hake mu Rwanda. Aha ni muri Ngororero

Prof Mbanda ni Perezida wa Komisiyo y’Amatora ariko yize ibijyanye n’Ubuhinzi mu bihugu bya Africa (Tropical Agriculture Engineer) avuga ko urubyiruko rukora ubuhinzi rwagombye kwibuka ko isuri ari ugutakaza ubutaka bityo ko mu byo bakora byose bagombye kuzaharanira gufata ubutaka butakara bitewe na yo.

Ati: “U Rwanda nakuriyemo rwarimo ibiti n’ubutaka ariko iyo urebye uko bimeze ubu usanga aho hantu harakundutse, nta butaka bufatika bugihari. Tudatabaye ubutaka bwacu ngo tubufate mu myaka igera cyangwa irenga 1000 igihugu cyazaba kitakera, kiri hafi kuba ubutayu.”

Prof Mbanda avuga ko ikindi kibabaje ari uko abakora ubuhinzi biganjemo abakuze, urubyiruko rukaba ari ruke cyane. Kuri we ngo ibi ntibikwiye kuko ubusanzwe urubyiruko ari rwo rwinshi ariko ugasanga rwigira mu bindi.

Yemeza ko iyo urubyiruko ari rwinshi ariko ntirugire umumaro ruba ikibazo ku gihugu. Asaba urubyiruko kwinjira cyane mu buhinzi kugira ngo umusanzu butanga mu bukungu bw’igihugu bwiyongere.

Avuga ko ubuhinzi bufite uruhare rungana na 35% mu musaruro mbumbe w’igihugu kandi ngo ibyo ¼ ry’ibyo u Rwanda rwohereza hanze bikomoka ku buhinzi.

Umwaka ushize Leta ibinyujije mu kigo k’igihugu cyo guteza imbere amazi n’amashyamba Rwanda water and Forests Authority, (RWFA), yatangije uburyo bwo kubungabunga amazi, ibibaya no kubungabunga ibyogogo binyuze mu gukora amakarita yerekana ubuhaname bw’ahantu henshi mu Rwanda kugira ngo habungabungwe.

Igikorwa cyo gutangiza iyi gahunda cyabaye mu Ukwakira, 2018 kibera mu Karere ka Nyamasheke mu Burengerazuba.

Urubyiruko Prof Mbanda yibutsaga akamaro ko kubungabunga ubutaka rwibumbiye mu muryango witwa AJADEJAR (Association des Jeunes Agronomes pour le Developpement des Jeunes Agri-Eleveurs du Rwanda).

Iri huriro ry’abize ubuhinzi muri za Kaminuza ryavutse muri 2002, intego ari ugafatanya mu gukora ubuhinzi bw’umwuga ariko buharanira kutangiza ibidukikije.

Evariste Murwanashyaka uriyobora avuga ko mu ngamba zabo harimo gukorana n’ibigo n’abandi bafite aho bahurira n’ubuhinzi n’ubworozi hamwe no kwita ku bidukikije.

Ati: “Twe ubu tugiye gutangira gukorana bya hafi nk’abakiri bato tugashishikariza abahinzi kwita ku gutera amaterasi y’indinganire ariko natwe tukabyinjiramo, bakabikora duhari.”

Ngo bazihatira kugira uruhare mu bikorwa by’iyamamazabuhinzi, bakore imishinga inyuranye yo mu rwego rw’ubuhinzi n’ubworozi kandi bagire uruhare mu gutubura no gukwirakwiza imbuto igihugu kifuza.

Ubu buhinzi bateganya gukora ngo buzakorwa mu buryo bwo kurengera ibidukikije no guhangana n’ingaruka z’imihindagurikire y’ikirere.

Yemeza ko bazakora ubushakashatsi ku buhinzi n’ubworozi ndetse n’ibyerekeye imihindagurikire y’ikirere.

Rigizwe n’abanyamuryango barenga 1000 ariko ngo n’abandi bumva bajyamo bazarijyemo kuko kwita ku butaka bw’u Rwanda bigirwamo uruhare n’inzego nyinshi.

Prof Mbanda avuga ko niba urubyiruko rudashyize imbaraga mu gufata ubutaka u Rwanda rwazaba ubutayu
Urubyiruko rwa AJADEJAR rukurikiye ijambo rya Prof Mbanda

Jean Pierre NIZEYIMANA
UMUSEKE.RW

5 Ibitekerezo

  • Prof. Kalisa Mbanda nibura twamushimira ko imirimo yashinzwe ku buryo bw’umwihariko muri komisiyo y’amatora we yayikoze neza cyane. Ubusabe bw’abaturage miliyoni hafi enye bwabyabyaye referandumu nayo yabyaye kongera kugirira icyizere Prezida wacu kugeza nibura muri 2034, yabushyize mu bikorwa nta kuzuyaza. Turabimushimira cyane. Kandi ntawushobora kwiyamamaza yasinyishije abantu bapfuye cyangwa acura imigambi y’iterabwoba n’iy’amacakubiri, cyangwa afite ingengabitekerezo ya jenoside, ngo abibonere uburenganzira. Ni ibigwi by’indashyikirwa dukesha Prof. Kalisa Mbanda. Yarize araminuza rwose ubuhanga n’ubunararibonye bye birigaragaza.

  • Prof. Mbanda akwiye kwihangana tukazabanza tugakora isuzuma rya Vision 2020 yose uko yakabaye.

  • Sinasobanukiwe urwego Prof Mbanda yavugagamo! Ese yashakaga kwumvishako Viziyo 2020 itazagerwaho? Ibyo bigaragarira buri wese. Ntibyari ngombwa kuzana umuprofeseri kubitwereka! Akazi yakoze mu matora hari abagashima. Kuba yarazanye udushya nko gusinyisha abapfuye byagombye kuba byarakozwe n’umuntu utari kuri ruliya rwego. Kuba icyo cyaha cyaragizwe impfabusa, byagombye kuba byaramubereye inzira yo kwegura. Niba nkuko abivuga ari mubashyizeho Viziyo 2020, nuwo kwibazwaho yuko umuntu wize yagombye kuba yarabonyeko viziyo 2020 ari baringa!

  • Uyu se ntakiri muri komisiyo y’amatora ? yimukiye mu y’ubutaka ?

  • Aba banyagipindi bararambiranye! Mumaze kuvuga ko kugera muri 2020 ubutaka bwose buzaba buriho ama terasi, mwabishinze nde ngo ajye abikurikirana umunsi kuwundi azanabazwe impamvu bitagezweho?!

    Bwana Mbanda, ko wabeshyeye Diane Rwigara ngo yakuzaniye ama liste y’abapfuye, ukamubuza guhatanira umwanya w’umukuru w’igihugu ukqmushora mumanza, ubu ntiyagizwe umwere?! Wowe ntugandagaje muri Komisiyp y’amatora?! Waba warabajijwe impamvu wabeshyeye umwari Diane Rwigara?!
    Mwese mumaze kugaragarira imbere y’abanyarwanda nka babandi bavuzweho ko ngo AMARESHYA MUGENI SIYO AMUTUNGA.
    Reba Mituelle, Reba ibyiciro by’ubudehe, Reba ubucucike mumashuri n’ireme ry’uburezi ryapfuye. Mbwira harya biterwa n’iki?! Ninde wabibazwa muri uru Rwanda?! Ninde ubifungiye?! Turabaziiii

Subiza

Your email address will not be published. Required fields are marked *