• 19/01/2020 9:22 19

Twaje hano twizeye ijambo rya burugumesitiri turahashirira-Uwarokotse

Samuel Dusengiyumva warokokeye mu cyahoze ari Komini Ntongwe watanze ubuhamya ubwo hibukwaga Abatutsi bishwe biciwe kuri biro bya komini yavuze ko kuba abenshi muri bo barishwe ari benshi ngo ni uko bizeye ijambo rya burugumesitiri wari wabijeje umutekano.

Samuel Dusingiyumva avuga kwizera ijambo rya Burugumesitiri biri mu byatumwe Abatutsi benshi bo muri Ntongwe bishwa

Dusengiyumva avuga ko nyuma y’uko Interahamwe zitangiriye kwica Abatutsi muri Ntongwe ngo byageze aho bamwe muri bo bihagararaho barwana na zo. Ndetse ngo babanza kuzihashya kuko bakoresheje amabuye.

Nyuma ariko ngo baje gucibwa intege n’uko Interahamwe zifatanyije n’Abajandarume n’abasirikare bakoresha gerenade n’amasasu.

Burugumesitiri Kagabo Charles ngo yijeje Abatutsi kujya kuri Komini kuko azabashakira umutekano.

Buri muntu wese wabaga afite inkoni yo kwicumba cyangwa ikindi barakimwakaga.

Abatutsi bose ngo babavanaga mu masegiteri babazana kuri komini.

Burugumesitiri Kagabo ngo yabwiraga Interahamwe ko buri mututsi agomba kwicirwa aho bamuzi.

Dusengiyumva yavuze ko ibi byabaga ari uburyo bwo gutuma umututsi yicwa nabi n’abamuzi.

Avuga ko yihishe mu rugo rw’umupasitori i Shyogwe.

Kubera ko Inkotanyi zakomeje kotsa igitutu Interahamwe, byabaye ngombwa ko aho yari yihishe bamusaba kuhavs ari kumwe na nyina.

Nyina yabwiye abo bari kumwe ko byaba byiza uwo wari wabahishe yamukomezanya, wenda ngo ni we wari kumurokora kandi koko ngo ni ko byagenze.

Murumuna we na we wari wahungishijwe n’umwe mu batarahigwaga ariko umwe mu bana b’uwo muryango yaje gutungira urutoki Interahamwe ziramufata zimwica.

Yaje kurokoka ageze mu Nkotanyi zabaga ahitwa i Kizi.

Yasabye Leta n’izindi nzego kuzareba uko ahitwa Nyamukumba hashyirwa inyandiko ivuga uko Abarundi bariye imitima y’Abatutsi bayokeje ku mbabura.

Nyuma yo kurokoka ngo yafashe umwanzuro wo kwiga kandi agashaka umugore akubaka kugira ngo Se atazazima kandi ngo Imana yabimuhereye umugisha ubu afite abana bane.

Uyu munyamategeko yasabye Abanyantongwe bagize uruhare muri Jenoside ubu bakaba bararekuwe barangije igifungo kumva ko kuba babana nabo atari intege nke ahubwo ari ubushake n’ubupfura.

Ati ” Tubana namwe kuko ari umusanzu dushaka gutanga wo kubaka igihugu. Ntabwo ari intege nke kuko mu by’ukuri hari abo tuzirusha. Rwose ntawe tuzahutaza. Turasaba ko abana bacu bajya baza inaha batekanye. Mudufashe tubane amahoro.”

Yarangije ijambo rye avuga ko kurokoka atari ‘ifiyeri’ ahubwo ari inshingano kandi zikomeye zigomba guha uwarokotse kumva ko agomba kubaho akaberaho n’abe.

Urwibutso rwa Ntongwe ruruhukiyemo imibiri ibihumbi 62 irenga.

Nyuma y’ibyavugiwe ku rwibutso hashyinguwe imibiri 202 yabonywe ahatandukanye muri Kinazi na Ntongwe.

Minisitiri ushinzwe Minisiteri y’ubutabazi Germaine Kamayirese  avuga ko urebye aho igihugu kiri ubu wabona ko ibyo abashakaga kwica Abatutsi bakabamara batabigezeho.

Yavuze ko hakiri byinshi byo gukora binyuze mu kwigisha urubyiruko ibyabaye no kurufasha kumva ko kwibuka birureba.

Nawe yasabye abazi aho imibiri y’Abatutsi iri kuherekanq bahashyingurwa mu cyubahiro

Ati ” Ndahamagarira abari hano kwamagana abafite ingengabitekerezo ya Jenoside abo aribo bose.”

Germaine Kamayirese yasabye abarokotse kandi kujya bandika ibitabo cyangwa ibindi byafasha mu kubika amateka ya Jenoside.

Hashyinguwe imibiri 202
Abari baje mu muhango wo kwibuka Abatutsi biciwe ku Mayaga wabereye ahahoze Komini Ntongwe
Abana 25 bakomoka kuri bamwe mu barokotse Jenoside. Babise ISHAMI

Jean Pierre NIZEYIMANA
UM– USEKE.RW

1 Igitekerezo

  • Mu Rwanda iyo harose intambara yo kurwanira ubutegetsi, abategetsi bagombye gufata iya mbere mu kurengera abo bayobora nibo bajya ku isonga ryo kubicisha no kubaryanisha. Ni ibintu tumazemo imyaka irenga 120. Ikimbabaza nuko abaturage nta somo nyaryo bavanamo kugeza uyu munsi.

Subiza

Your email address will not be published. Required fields are marked *