• 25/01/2020 7:50 14

Titi waririmbanye na Danny V. ‘Suko Baterera’ yinjijwe mu muziki n’abakunze ijwi rye

Thierry Bizimana ukoresha izina rya Titi mu buhanzi waririmbanye na Danny Vumbi indirimbo bise ‘Suko Batereta’, avuga ko yari asanzwe akunda umuziki ariko ko atateganyaga kuwukora ariko kubera ko abahanga mu muziki bakunze kubimusaba kubera jwi rye, yasanze ari ngombwa kumvira inama zabo.

Titi uba mu Busuwisi ngo abantu benshi bakunze kumusaba ko yaririmba kuko bamwumvanaga ijwi ribikwiye

Uyu munyarwanda umaze imyaka ine aba mu Busuwisi, avuga ko kuva kera abantu bakunze kumubwira ko ijwi rye rikwiye kuririmba.

Uyu munyarwanda wahoze ari umunyamakuru ku yahoze ari Lemigo TV akora ikiganiro Club 250, avuga ko intandaro yo kwinjira muri Muzika ari ubwo yasuraga umwe mu batunganya indirimbo hano mu Rwanda.

Ati “Nta gahunda nari mfite yo kujya muri muzika ariko nari nsanzwe nyikunda.”

Mu Busuwisi akora umwuga wo kuvangavanga imiziki (Deejay), avuga ko uyu mwuga watumye ahura n’abatunganya umuziki bakomeye mu bihugu bitandukanye by’Iburayi birimo Ubusuwisi, Ubutaliyani no mu Bufaransa.

Ati “Bagiye bambwira ko nkwiye kuba naririmba kuko mfite ijwi ryiza.”

Avuga ko inama z’aba bahanga muri muzika atagombaga kuzirenza ingohi, na we ahita yisunga Made Beat na Danny Vumbi usanzwe unamenyereye mu byo kwandika indirimbo.

Ngo icyo gihe yahise yinjira muri Studio atangira kuririmba barabyishimira, ku buryo uwo munsi baraye bafata amajwi y’indirimbo ye ya mbere yakoranye na Danny Vumbi yitwa Suko Batereta ikomeje gukundwa cyane muri iyi minsi.

Uyu muhanzi ukomeje kwakira ibiterekezo by’abakunzi ba muzika bamubwira ko bishimiye kiriya gihangano ke, avuga ko biri kumutera imbaraga zo gukomeza ubuhanzi ku buryo ari guteganya gukorana n’abahanzi bakomeye barimo abo muri Kenya no muri Uganda.

Ati “Ibyiza birahari muzabibona sinabivuga nonaha ariko nkunda umuziki cyane.”

Uyu ubaye umwe mu banyarwanda bakorera umuziki mu mahanga, asaba abanyarwanda b’imbere mu gihugu kumutera inkunga mu gukurikirana ibihangano bye.

By’umwihariko asaba abanyarwanda baba ku mugabane w’uburayi gukomeza guteza imbere umuziki wa bene wabo kuko abanyaburayi bakunda umuziki wo muri Africa.

Asaba abanyarwanda kumushyigikira

Bonaventure KUBWIMANA
UMUSEKE.RW

Subiza

Your email address will not be published. Required fields are marked *