• 28/01/2020 2:58 54

Sudan: Abishwe n’ingabo z’igihugu bamaze kugera kuri 60

Amakuru atangazwa n’abaganga bavura abatavuga rumwe na Leta muri Sudan avuga ko imibare y’abishwe n’amasasu yarashwe mu bigaragambyaga kuri iki Cyumweru imaze kugera kuri 60.

Abaturage ntibashaka ko ingabo ziyobora Sudan. Ngo zo zishinzwe kurinda ubusugire bw’igihugu, Politiki ikaba iy’abaturage

Hari amakuru avuga ko abarashe muri bariya basivili bigaragambya basaba ingabo kurekura ubutegetsi bagize ishami rikorana nazo.

Umuryango mpuzamahanga harimo USA n’ibihugu bigize umuryango w’ubumwe bw’u Burayi bamaganye ibyakozwe n’abari ku ruhande rw’Inama ya gisirikare iyoboye Sudan by’inzibacyuho.

Abibasiwe n’amasasu ni abigaragambya bari bamaze iminsi myinshi bakambitse mu marembo ya Minisiteri y’ingabo za Sudan.

Bahakambitse guhera taliki 06, Mata, 2019 iminsi itanu mbere y’uko uwahoze ayobora Sudan Omar Al Bashir avanywaho n’ingabo.

Aba baturage bari bamaze iminsi bagiranye ibigano n’iriya nama ya gisirikare iyoboye inzibacyuho bakaba baremeranyije ko habaho inzibacyuho y’imyaka itatu ikazarangira haba amatora ataziguye.

Gusa kuri uyu wa Mbere nibwo uriya mutwe bivugwa ko ukorana n’inama ya gisirikare iyoboye Sudan by’inzibacyuho yarashe muri bariya basivili, ubu bikaba bivugwa ko hapfuye abagera kuri 60.

Bivugwa ko insoresore zo mu mutwe ukorana n’abasirikare bari ku butegetsi ziri mu kiswe Rapid Support Forces arizo zarashe bariya bantu.

Ngo bafashwa kandi n’umutwe w’aba Janjaweed  bamaze igihe mu mirwano muri Darfour guhera 2003.

Kuri uyu wa Kabiri ariko abasirikare bagize iriya nama iyoboye Sudan by’agateganyo bavuze ko bagiye gutegura amatora mu mezi ikenda ari imbere, gusa abigaragambya bo bavuga ko ibyiza ari uko amatora yazaba mu gihe kirekire kurushaho kugira ngo abantu bose bafite aho bahuriye n’ubutegetsi bwahozeho bwa Bashir bacike intege.

Ngo nibwo amatora aciye mu mucyo kandi ya Demukarasi yazashoboka.

Umunyamabanga mukuru wa UN Antonio Guterres yasabye impando zombi kwirinda icyatuma umwuka mubi urushaho kuzamuka kandi asaba ingabo kwirinda guhohotera abaturage zishinzwe kurinda.

Umuryango w’ababimbye urasaba ingabo za Sudan kumva ko kurinda umutekano w’abayituye ari inshingano zazo

BBC

Jean Pierre NIZEYIMANA

UMUSEKE.RW

3 Ibitekerezo

  • Abanyasudani nibanga ko bariya basirikare babategeka badakopfora bazabatsemba nk’uko bagenje abo muri Darfour na Sudani y’Epfo itarigenga, usibye ko yanigenze bikaba guhungira ubwayi mu kigunda. Demokarasi y’ubudasa ya Sudani ndetse n’iy’ibindi bihugu bitegekeshejwe imbunda, ni ubutegetsi bw’abasirikare, butangwa n’abasirikare, bugakorera abasirikare. Humiriza-nkuyobore muri Africa yacu ni norme aho kuba exception.

  • Uyu musilikare yicukuriye nako yisabiye icumbi muri gereza iruhande rwa Bashir. Umuntu uvugako akorera abaturage ko azabarinda none niwe watanze itegeko ryo kurasa abaturage ashinzwe gucungira umutekano. Burya umusilikare ahora arumusilikare ntampavu n’imwe yo kumugirira icyizere. Ni Ikirura mubindi. Ahuhindukira igihe ashakiye kandi akagukindura.Mwibuke Mobutu ibyo yakoreye abanyeshuli bomuri Unisersité ya Lubumbashi.

  • Where is AU!
    Shame to them!
    Barareba ibibera muri Sudan bakananirwa kuvuga kuko baziko abenshi nabo aricyo gisasu bicariye!
    Imana ijye irengera abanyafrika kabisa!

Subiza

Your email address will not be published. Required fields are marked *