• 11/12/2019 11:33 20

Sosiyete Sivili mu Biyaga Bigari ngo igiye kwita ku bibazo by’abagore n’abamugaye 

Abagize Sosiyete  Sivili mu Rwanda, Congo Kinshasa n’i Burundi baravuga ko bagiye kwita ku ihohotera rikorerwa abagore n’abafite ubumuga bakora ubucuruzi bwambukiranya umupaka.

Sosiyete Sivili ivuga ko hari abahohoterwa ndetse bakamburwa ibyabo ku mipaka

Mu biganiro  by’iminsi itanu abagize Sosiyete Sivili  mu bihugu by’Akarere k’Ibiyaga Bigari bakoreye mu Karere ka Muhanga,  bavuga ko abakora imirimo y’ubucuruzi bwambukiranya imipaka  cyane cyane abari mu byiciro by’abagore n’abafite ubumuga bakunze guhura n’ihohotera mu bucuruzi bwabo.

Umunyamabanga Mukuru wungirije muri COTRAF Rwanda (Congrès du Travail de la fraternité) Gasore Seraphin  avuga ko ubusanzwe bakoraga ubuvugizi bashingiye ku Gihugu bakoreramo. Ubu ngo bagiye kuzamura ijwi babwire abanyapolitiki ko  hari ibyiciro by’abantu bahohoterwa iyo bashatse kwambutsa ibucuruzwa byabo  ku mipaka no hakurya yayo.

Ati: “Si abagore n’abafite ubumuga bakunze guhohoterwa gusa hari n’abakuze bafite intege nke. Ibi byiciro nibyo twifuza gukorera ubuvugizi kuko baraharanira imibereho myiza y’imiryango yabo bakwiye gufashwa.”

Umuyobozi w’Impuzamasendika mu Gihugu cya Congo Kinshasa Shimbi Josephine avuga ko  hari  bamwe mu bagore bakwa  ruswa ishingiye ku gitsina  babyanga  bikabaviramo gukubitwa no kwamburwa ibyabo.

Mangala Anatole  umukozi w’Ishyirahamwe mpuzamahanga mu Bihugu by’Ibiyaga Bigari, avuga ko  gukorera ubuvugizi ibi byiciro byihariye bizoroha kuko Perezida Paul Kagame ari na we uyobora  Umuryango wa Africa yunze ubumwe muri iki gihe.

Ati: “Tuzakora ibitureba nka Sosiyete Sivili, gusa twumva bigiye kumvikana kuko  hari abanyapolitiki bamwe badushyigikiye kandi bifuza ko abaturage batera imbere.”

Muri ibi biganiro kandi byarimo amashyirahamwe y’abahinzi n’aborozi, abagize Sendika ndetse n’Imiryango itegamiye kuri Leta mu Gihugu cy’Ububiligi.

Ababirimo bavuga ko ubuvugizi bifuza gukora butagomba kugarukira gusa mu bihugu by’Ibiyaga Bigari ahubwo ko  buzagera no mu bihugu bindi bya Africa abacuruzi bo muri aka karere bakoreramo.

Imiryango itegamiye kuri Leta mu Gihugu cyUbubiligi ivuga ko yiteguye kubafasha
Musenyeri Smaragde Mbonyintege n’abahagarariye Sosiyete Sivili mu Rwanda no hanze baganiriye kuri ibi bibazo
Umuyobozi w’Impuzamasendika muri Kongo Shimbi Josephine avuga ko abagore bakora ubuvuruzi bwambukiranya imipaka hari abasabwa ruswa ishingiye ku gitsina

MUHIZI ELISEE
UM– USEKE.RW/Muhanga.

0 Igitekerezo

  • Muli iyi si,Abagore n’abantu bamugaye bagira ibibazo byihariye.Icyo bahuriyeho,nuko abantu babasuzugura.Ibibazo byose byo mu isi,bizakemurwa n’ubwami bw’imana.Nukuvuga ubutegetsi bw’imana,buzaza ku munsi w’imperuka,bukabanza bugakuraho ubutegetsi bw’abantu nkuko tubisoma muli Daniel 2:44.Buzahabwa Yesu Kristu nkuko nabyo tubisoma muli Ibyahishuwe 11:15.Hanyuma ahindure isi paradizo.Niyo mpamvu imana idusaba gushaka ubwami bw’imana,aho guhera mu byisi gusa.

Subiza

Your email address will not be published. Required fields are marked *