• 09/12/2019 8:49 25

Sitasiyo ya Gabiro izagabanya gucikacika kw’amashanyarazi i Burasirazuba

Minisitiri w’Ibikorwa Remezo, Amb. Claver GATETE, ni we watangije iriya sitasiyo y’amashanyarazi ya Gabiro yubatswe kugira ngo yuganire itangwa ry’amashanyarazi mu Ntara y’Iburasirazuba.

Minisitiri Gatete na Ambasaderi w’Ububiligi mu Rwanda, Benoit Ryelandt batashye ibi bikorwa bizongerera imbaraga amashanyarazi mu Rwanda

Kuru uyu wa gatanu tariki 17, Gicurasi 2019 nibwo iriya sitasiyo yatashywe n’umuyoboro w’amashanyarazi uzayageza mu Turere twa Rwamagana, Kayonza, Ngoma na Kirehe, byubatswe ku nkunga y’Ubwami bw’Ububiligi.

Igice kinini cy’Intara y’Iburasirazuba cyagezwagwaho amashanyarazi hifashishijwe sitasiyo ya Kabarondo ikayajyana ikayageza Kagitumba yabanje kunyura i Kayonza (KKK).

Bitewe n’inzira ndende ugereranyije aho amashanyarazi yaturukaga n’aho yajyaga kandi hari abayakoresha bato n’abafite ibikorwa binini inzira yarushwaga imbaraga hakabaho ko acikagurika kongera gusubira ku murongo bikamara igihe.

Kugira ngo icyo kibazo kibonerwe igisubizo, Ikigo k’Igihugu gishinzwe ingufu (REG) cyatekereje kubaka iriya sitasiyo ya Gabiro mu Karere ka Gatsibo ikaba ifite imbaraga zogutanga umuriro wa 110/30kV (bivuga ko iriya sitasiyo ifite imbaraga nyinshi ariko ishobora gutanga umuriro wa 30kV) kandi ikagura sitasiyo ya Musha ikabihuza n’umuyoboro w’amashanyarazi wavaga Rulindo ugana i Musha.

Iyi sitasiyo ya Gabiro izunganira iriya ya Kabarondo ndetse igahura n’iya Musha yongerewe imbaraga, bizatuma Intara y’Iburasirazuba ibona amashanyarazi mu buryo bwiza kandi ibihombo by’ayasigaraga mu nsinga bigabanuke.

Sitasiyo ya Gabiro izajya igezwaho amashanyarazi avuye ku miyoboro ya Nyagatare, Kiziguro na Ngarama. Ngo bizafasha ko igiye yagize ikibazo kizajya kimenyekana vuba abayikuraho amashanyarazi akabageraho nta nkomyi.

Ku bijyanye n’umuyoboro mushya w’amashanyarazi mu Turere twa Rwamagana, Kayonza, Ngoma na Kirehe, yubatswe binyuze mu masezerano Ubwami bw’Ububiligi bwasinyanye n’u Rwanda mu 2014.

Ububiligi bwatangiye gutera inkunga mu bijyanye no kubaka amashanyarazi binyuze mu mushinga Electricity Access Rollout Program (EARP), iki gihugu cyasinyanye n’u Rwanda amasezerano atatu y’inguzanyo (Grant Agreements), afite agaciro ka miliyoni 39 z’ama- Euro agamije kuvugurura serivise zo gutanga amashanyarazi.

Ingo nshya muri Turiya turere tune two mu Ntara y’Iburasirazuba zigera ku 22 387 zamaze kugezwaho amashanyarazi nk’uko bitangazwa n’ikigo REG.

Binyuze muri uyu mushinga izindi ngo 5 446 zizagezwaho amashanyarazi bitarenze Ukuboza  2020.

Ariya mafaranga y’Ububiligi azanakoreshwa mu kongerera ingufu amashanyarazi yari mu bwoko bwa single-phase (Mono-phase) ari ku ntera ya Km 280 mu Ntara y’Iburasirazuba akazagirwa three-phase  (Tri-Pahase) bikazaterwa n’uko umuyoboro w’amashanyarazi wa Rubavu uzongererwa imbaraga ukava kuri 6.6kV ukagera kuri 30kV.

Uriya mushinga wafashije Uturere twavuzwe kugera ku ntego twihaye mu bijyanye n’amashanyarazi. Akarere ka Rwamagana mu mihigo (2017-2018) kari kihaye intego yo kuyageza ku ngo 4554, byaje kurangira ageze ku ngo 7 831, Kayonza  yari yihaye umuhigo wo kuyageza ku ngo 3 400 mu mwaka (2018-2019) ubu yageze ku ngo        3 007, Ngoma muri uyu mwaka yari yihaye kugeza amashanyarazi ku ngo 6 340 ariko amaze kugera ku ngo 5 050 naho Kirehe yahigiye kuyageza ku ngo 6 291 ubu akaba yarageze ku ngo 6 499.

Minisitiri w’Ibikorwa Remezo, Amb. Claver GATETE yavuze ko biriya bikorwa bazafasha Intara y’Iburasirazuba mu iterambere ryayo.

Yavuze ko by’umwihariko umugi wa Nyagatare nk’umwe mu izunganira Kigali ugomba guhabwa amashanyarazi adacika kugira ngo ibikorwa remezo bihari bizarusheho gukora neza kandi abahashora imari ntibagire impungenge z’amashanyarazi.

Ambasaderi w’Ububiligi mu Rwanda, Benoit Ryelandt, yashimye uruhare igihugu ke cyagize muri ibi bikorwa avuga ko amashanyarazi ateza imbere igihugu mu buryo bwinshi harimo guhanga imirimo mishya itanga akazi kuri benshi.

U Rwanda rukomeje kongera ingufu z’amashanyarazi, rwihaye intego ko muri 2024 Abanyarwanda bose (100%).  Ikigo REG kivuga ko Abanyarwanda 51% ingo zabo zirimo amashanyarazi mu gihe rugeze kuri MW 221.1.

Hanatashywe umuyoboro w’amashanyarazi azagera mu Turere 4 tw’Intara y’Iburasirazuba

UMUSEKE.RW

Subiza

Your email address will not be published. Required fields are marked *