• 12/12/2019 12:47 03

Senderi waharaniye agaciro k’ibihangano bye RDB iri kumwifashisha

Umuhanzi Nzaramba Eric umenyerewe nka Senderi wakunze kugaragaza ko ibihangano by’umuntu bikwiye guhabwa agaciro kugira ngo binamutunge, ari mu bukangurambaga bwateguwe na RDB buhamagarira abanyempano batandukanye kwandikisha ibihangano byabo.

Senderi ari mu bukangurambaga buzenguruka igihugu bwa RDB

Senderi aherutse kwishyira hamwe n’abandi bahanzi barimo Intore Tuyisenge, Munyanshoza Dieudonné uzwi nka Mibiliri na S. Maj Robert Kabera baherutse gutangaza ibiciro ku bakoresha ibihangano byabo mu ruhame cyangwa mu bikorwa bigamije inyungu.

Uyu muhanzi uri mu bafite indirimbo nyinshi mu Rwanda, ari gukorana n’igihugu k’Iterambere RDB cyateguye ubukangurambaga bugamije guhamagarira abahanzi mu ngeri zitandukanye kwandikisha ibihangano byabo.

Senderi asaba bagenzi be b’abahanzi gutinyuka bakandikisha ibihangano byabo kuko baba biteganyirije kandi bakanateganyiriza abazakomokaho.

Ati “Kuko ni’yo waba utakiriho bizatunga abagukomokaho kuko ni umutungo mu by’ubwenge. Ubugeni, ubukorikori, indirimbo n’ibindi nimutebuke mubyandikishe.”

Senderi uherutse gushimwa na Perezida Kagame kubera indirimbo ‘Nzabivuga’ yakoranye na Intore Tuyisenge, avuga ko ibihangano by’umuhanzi bishobora kumugeza kure kandi bikamufasha kubaho neza mu gihe yaba yabihesheje agaciro.

Avuga ko intambwe ya mbere umuhanzi akwiye gutera ahesha agaciro igihangano ke, ari ukucyandikisha kuko ari umutungo mu by’ubwenge.

Muri ubu bukangurambaga buzazenguruka ibice byose by’igihugu, RDB iri kugenda yandika ibihangano by’abahanzi ku buntu.

Bufite insanganyamatsiko igira iti “Hesha Agaciro umutungo wawe. Shinganisha  igihangano cyawe.”

Abitabira iki gikorwa biganjemo urubyiruko rurimo n’abasanzwe bakora ubuhanzi, baboneraho n’umwanya wo gusobanuza ibyo batumva kugira ngo ibihangano byabo bikomeze kubungwabungwa no kubatunga.

Udushya dusanzwe tumuranga…Aha ari kuririmba yambaye Casquet
Ubu bukangurambaga buri kwitabirwa n’abiganjemo urubyiruko
Ku rubyiniro agira atya akahazana n’abaturage bakamufasha kubyina

Bonaventure KUBWIMANA
UMUSEKE.RW

Subiza

Your email address will not be published. Required fields are marked *