Sefu warekuwe na Rayon Sports ariyumvamo gukina hanze y’u Rwanda kuruta ibindi

Umukinnyi wo hagati uheruka kurekurwa na Rayon Sports ngo yishakire indi kipe, Niyonzima Olivier bita Sefu avuga ko yiyumvamo kujya gukina mu makipe yo hanze y’u Rwanda kuruta ibindi byose.

Niyonzima Olivier Sefu yarekuwe na Rayon Sports tariki 17 Kamena 2019

Kuri uyu wa gatatu yaganiriye n’Umuseke akaba yadutangarije ko nta kipe n’imwe iramwegera kuva yava muri Rayon Sport, gusa ngo ushinzwe kumushakira akazi (manager) ni we uri mu biganiro.

Hari amakuru avuga ko yaba yarasinye muri APR FC agahabwa miliyoni eshanu (Frw 5000 000) ndetse akajya ahembwa ibihumbi 800Frw, ibi yabihakanye.

Ati “Nta kipe ndasinyira mu Rwanda kuko ngo Manager ntacyo arambwira.”

Yadutangarije ko ku wa gatandatu ashobora kuzaba yamenye aho azajya mu ikipe yo hanze y’u Rwanda.

Yavuze ko kuva muri Rayon Sports ukajya mu yindi kipe yo Rwanda uba usa n’uri gusubira inyuma.

Yavuze ko nta kibazo yagiranye na Rayon Sport kijyanye n’imyitwarire mibi, ngo icyo batumvikanye ni iby’amasezerano mashya muri iyi kipe.

Niyonzima Olivier yari amaze imyaka isaga ine muri Rayon Sports, ariko mu ntangiriro z’uku kwezi we n’uwari Kapiteni Manzi Thierry barekuwe n’iyi kipe nubwo bayifashije gutwara igikombe cya Shampiyona.

Jean Paul NKUNDINEZA
UMUSEKE.RW

Subiza

Your email address will not be published. Required fields are marked *