• 16/12/2019 2:55 38

S.Africa: Thabo Mbeki ntashyigikiye ko Abazungu bamburwa ubutaka nta ngurane

Thabo Mbeki wabaye Perezida wa Africa y’Epfo yanenze ishyaka riri ku butegetsi rya ANC (African National Congress) kuba rishaka kuba iry’Abirabura, nyuma y’umugambi watangajwe wo kunyaga Abazungu amasambu bamazemo igihe kandi ntibahabwe ingurane.

Thabo Mbeki wayoboye Africa y’Epfo ntashyigikiye ko Abazungu bamburwa amasambu nta nguraneAfrica Summit, Cape Town, 3 – 6 June 2008
emiller@iafrica.com
Thabo Mbeki

Ayo magambo n’ubundi Mbeki yayavuze anenga icyo kemezo, avuga ko ANC ishaka kwibasira Abazungu bikaba ari ugutakaza intego iryo shyaka ryatangiranye yo “Kutarangwa n’ivangura rishingiye ku moko”.

Abayobozi b’ishyaka riri ku butegetsi ariko bo bavuga ko kunyaga ibikingi Abazungu ari uguhangana n’ikibazo cy’ubusumbane mu baturage mu bijyanye no kugira ubutaka.

Hashize imyaka 25 ishyaka rya ANC riri ku butegetsi nyuma yo guhirima k’ubutegetsi bwari bushingiye ku ivanguramoko bwa Apartheid, ariko imibare igaragaza ko Abazungu bangana na 9% by’abatuye igihugu batunze ubutaka bungana na 72% by’ubuhingwa.

Mbere hatekerezwaga ko Abazungu cyangwa abandi bashaka ubutaka babugurisha ‘ababyifuza ariko ishyaka ANC ryasanze ngo bitaba ari byo, rihitamo kunyaga ubutaka Abazungu kugira ngo ikibazo gikemurwe mu mizi.

Mu nyandiko yatangajwe n’Umuryango wa Thabo Mbeki Foundation bikekwa ko yanditswe na Mbeki ubwe, ivuga ko ANC yatangiye ifite intego yo kuba ishyaka riharanira uburenganzira bwa muntu uwo ari we wese yaba Umuzungu n’Umwirabura.

Yavuze ko kwambura ku ngufu ubutaka Abazungu bugahabwa Abirabura bigaragaza ko ANC yaba yarataye umurongo.

Muri iyo nyandiko Mbeki agira ati “Byaba bitakiri guhagararira abatuye Africa y’Epfo bose. Ahubwo, nk’uko Perezida wavuyeho, Jacob Zuma, yabivuze, ryaba ari ishyaka ry’Abirabura.”

Igitekerezo cya Perezida Thabo Mbeki hari bamwe bagishyigikiye abandi bakavuga ko agamije kurinda inyungu z’Abazungu.

Ku ruhande rw’Ishyaka ANC nta cyo baratangaza kuri ubu buryo Thabo Mbeki abonamo ibintu.

Gusa, Perezida Cyril Ramaphosa yavuze ko kunyaga Abazungu ubutaka bizakorwa neza kandi hakagenderwa ku bitekerezo bizaba biri mu Itegeko Nshinga.

Iki kibazo cy’ubutaka hari ababona ko abanyepolitiki bashobora kugikoresha kugira ngo bagere ku nyungu zabo politiki.

Thabo Mbeki yabaye Perezida wa Africa y’Epfo mu 1999 – 2008 ubwo yasimburwaga na Jacob Zuma atarangije manda.

Ishyaka ANC ryashinzwe mu 1912 riharanira kurwanya ubutegetsi bw’Abazungu bake bategekaga igihugu. Ishyaka ryageze ku butegetsi mu 1994, ubwo Nelson Mandela yatsindaga amatora.

Itegeko ryitwa (The Natives Land Act of 1913) ryashyizweho n’Abakoloni b’Abazungu ryabuzaga Abirabura kugura cyangwa gukodesha ubutaka mu gihugu cy’Africa y’Epfo y’Abazungu, ibyo byatumye Abirabura bamburwa ubutaka.

Nyuma ya Apartheid, ANC yavuze ko izasubiza Abirabura ubutaka bugera kuri 30% y’ubwo bambuwe nibura bikazaba byakozwe kuva mu 1994 kugera ku 2014.

Bivugwa ko ubutaka bugera ku 10% bukorerwaho ubuhinzi bugamije gucuruza bwaba bwaramaze gusubizwa Abirabura.

BBC

UM– USEKE.RW

Subiza

Your email address will not be published. Required fields are marked *