• 08/12/2019 9:27 45

Rwanda: Ibitekerezo by’Ababyeyi ku “abakobwa bafata imiti yo kuboneza imbyaro”

Benshi mu babyeyi baganiriye n’Umuseke ku cyo bakora igihe abana babo bababwira ko bifuza gufata imiti yo kuboneza imbyaro cyangwa bakabasaba kubaherekeza kwa muganga kuyifata, bamwe bavuga ko kumva ubwo butumwa mu matwi yabo cya kibazo, ariko ngo ntibabaherekeza kwa muganga kuko ryaba ari ishyano bagushije.

Dr Zuberi Muvunyi avuga ko nta mabwiriza Ministeri y’Ubuzima yashyizeho abuza guha abangavu serivise zo kuboneza cyangwa kubasaba kuzana n’ababyeyi babo

 

Mu biganiro byabaye tariki 30 Ukwakira 2018, Ellen Numugisha ukuriye Umuryango urwanya inda zitateguwe mu rubyiruko (Afri Yan) yavuze ko abangavu bashaka serivise zo kuboneza imbyaro batazihabwa mu buryo bworoshye kuko basekwa, ndetse abandi bakabita abasambanyi.

Dr Zuberi Muvunyi ukuriye ibikorwa by’Ubuvuzi muri Ministeri y’Ubuzima we yabwiye abari mu biganiro ko nta tegeko cyangwa amabwiriza abuza ibigo nderabuzima n’ibitaro guha imiti yo kuboneza imbyaro abato babyifuza kabone n’iyo baba bari munsi y’imyaka 18.

Umuseke waganiriye n’ababyeyi ku Kigo Nderabuzima cya Remera mu karere ka Gasabo, ababyeyi bamwe bavuga ko abangavu aho gusama inda zizateza ikibazo bakoresha imiti yo kuboneza imbyaro ariko bavuga ko babasabye kubaherekeza kwa muganga kuyifata batajyana na bo.

Benshi mu bo twaganiriye banze ko dutangaza amazina yabo, uwemeye ko tuyatangaza akavuga izina rimwe.

Uwitwa Nyirahabineza ati “Numva bavuga ko hari ubwo ujya kuboneza urubyaro utarabyara na rimwe wabimaramo igihe ugasanga bigendaniye ko wazashaka umugabo ntubyare, mbyumvana abantu babivuga gutyo.”

Uyu mugore w’imyaka 26 avuga ko yarinze ashaka umugabo atagiye kuboneza imbyaro nubwo azi ko igihe nk’umukobwa yari “gushukwa n’umugabo akamutera inda ubuzima bwari kumugora yabyariye iwabo.

Tumubajije niba abangavu batangiye kubona imihango ya mbere baboneza imbyaro mu rwego rwo kwirinda gusama. Ati “Imyaka 11 cyangwa 12 (imihango ya mbere iboneka muri icyo kigero) ni mike, yenda nk’imyaka 18. Abakobwa nkunze kumva babijyamo ni abari mu kigero cy’imyaka 17 kugera kuri 20, nta we ndumva wagiyemo afite imyaka 12.”

Undi mubyeyi abajijwe kuri iyi ngingo, ikibazo cyari kimwe “wumva ari ngombwa ko abangavu bafite imyaka 11 kugera kuri 18 bajya kuboneza urubyaro? Ari umwana wawe wamuherekeza kwa muganga?”.

Uyu yagize ati “Jyewe numva babishoboye baruboneza, kuko akenshi usanga ari ha handi abana bari muri icyo gihe babyara inda zitateguwe, babahaye uburenganzira bakaboneza numva byabafasha.”

Nubwo atatubwiye amazina ye, ni umugore w’imyaka 23, avuga ko kuba umwana yajyana n’umubyeyi we kwa muganga gushaka ziriya serivisi zo kuboneza imbyaro nta kibazo kirimo, ariko ngo abana batinya ababyeyi ntibabibabwira.

Undi na we bigaragara ko ari umugore ukiri muto yagize ati “Numva rwose nta kibazo aho kugira ngo umwana agire risqué zo kubyara ari muto na we akirerwa, yaboneza urubayaro. Ku bijyanye no kuba yaherekezwa n’ababyeyi, akenshi umwana uri mu kigero cy’iyo mwaka y’ubugimbi cyangwa ubwangavu aba atinya ababyeyi, akabahisha ko ari muri izo nzira mbi z’ubusambanyi, umubyeyi yamubaza impamvu ajya kuboneza adafite umugabo.”

Avuga ko nk’umubyeyi yumvise ko umwana we yaboneje yabyakira kuko ngo niko yaba yarabyaye.

Ati “Nsanze yaboneje namubaza impamvu nagira amahirwe akambwiza ukuri nabyakira aho kumubona afite inda ari uruhinja, ariko ntabwo namuherekeza. Oya, yakwijyana kuko ntabwo bwaba ari uburere ndi gutanga.”

Mu babyeyi benshi bari aho batubwiye ko bataherekeza abana kwa muganga igihe baba babasabye ko bajyana gushaka serivise zo kuboneza imbyaro, ngo byaba ari ukubatiza umurindi wo gusambana.

Umuseke wagiye mu kindi kiciro cyarimo ababyeyi bakuze na bo twumva icyo bavuga

Ntawuhiganayo w’imyaka 57, avuga ko we nk’Umukiristu Gatolika kuboneza imbyaro ku bana (urubyiruko) atari byo, ngo Kiliziya ntibyemera.

Ati “Ibyo byo kuboneza imbyaro ku bana bataragimbuka biba ari ugukabya kugira ngo habeho ubusambanyi bweruye, iyo umwemereye kuboneza imbyaro akora imibonano mpuzabitsina igihe ashakiye, akitwaza agakingirizo ndetse kakaba kamucika agatera inda.”

Uyu avuga ko igikwiye ari ukwigisha abana mu muryango, keretse ngo abana bananiranye nibo bafata ingamba zitemewe. Ku bwe ngo umwana utarananiranye ntiyaboneza imbyaro.

Abandi babyeyi biganjemo ab’igitsina gore baganiriye n’Umuseke na bo ntibashyigikiye ko abangavu baboneza imbyaro. Umwe muri bo w’imyaka 43 yavuze ko igihe umuganga yabona umwangavu umugana agiye kuboneza imbyaro yagakwiye guhita amutuma umubyeyi kuko ngo n’ubundi aba agiye yihishe.

Ati “Ndi Umukiristu numva ari uruhare rw’umubyeyi, akwiye guhora ari inshuti n’umwana, akamwigisha gukunda Imana yarangiza akamwereka ingaruka zo gukora ibyaha, akamukuriza mu Mana akamusengera, akamwereka ikibi n’ikiza biri imbere.”

Umuseke wanaganiriye n’umwe mu baganga ari ko wadusabye kutavuga amazina ye.

Yagize ati “Nk’umubyeyi umwana ambwiye ko ashaka kuboneza imbyaro byangora kubyakira kuko tuzi ko umuntu ukuze aba afite imyaka 18 ni na we nibura wakagombye kuba yakwibaruka ariko hari ubwo umwana aba afite imyitwarire idahwitse, icyo gihe mwaragiranye ibiganiro ukabona bidatanga umusaruro, kumurinda kubyara umwana atazabasha kurera na njye ntazabasha kumufasha byaba byiza kubyirinda kugira hatabaho izo ngaruka.”

Uyu mubyeyi ngo avuze nk’umuganga, yumva igihe umwangavu yajya gushaka imiti yo kuboneza imbyaro akwiye kujyana n’umubyeyi kugira ngo igihe imiti yamutera ikibazo umubyeyi amube hafi azi ibyo ari byo.

Nubwo Dr Zuberi Muvunyi ushinzwe ibikorwa by’Ubuvuzi muri Minisiteri y’Ubuzima avuga ko nta mabwiriza ahari asaba abangavu guherekezwa n’ababyeyi kwa muganga igihe bashaka serivise zo kuboneza imbyaro, bisa n’aho Leta itarafata umwanzuro mu mahitamo yo guha indangagaciro urubyiruko n’inyigishisho zarurinda kugwa mu bishuko bibaganisha mu busambanyi cyangwa kubareka bagakoresha imiti yo kuboneza nk’igisubizo kiboneye.

U Rwanda ruhangayikishijwe cyane n’inda ziterwa abangavu kuko ahanini zikurura amakimbirane mu muryango, zikanatera ibibazo abakobwa baziterwa.

Imibare igaragaza ko mu mwaka wa 2016-2017 abakobwa bari mu kigero k’imyaka 15-19, abasaga ibihumbi 17 batewe inda.

HATANGIMANA Ange Eric
UM– USEKE.RW

0 Igitekerezo

  • Bikaza kurangira aboneje urubyaro atazi niba anarufitemo !!!Ntabwo nabuza ababyigisha kubikora kuko yaba irindi mirimo igabanutse ku isoko,ariko byibuze bajye babyigishanya impuhwe kuko ndi Sure ko nubundi abakobwa babyara abana bake,kuva navuka sindabona umukobwa wabyariye iwabo abana barenze babiri

  • Akaga abantu bahoramo kuri iyi si, ni ugushyira ingufu nyinshi mu guhangana n’ingaruka z’ibibazo aho guhangana mbere na mbere n’impamvu zabyo.

  • JYEWE MBONA NAMWE UBWANYU UMUCO MWIGISHA MUTAWUZI AHUBWO MWATWAWE N’IMICO Y’ABAZUNGU MUHITEMO KIMWE KUKO KUBONA UMUNTU MUKURU AVUGA NGO UMWANA ABONEZE URUBYARO BITEYE ISONI MU MUCO NYARWANDA UBUNDI SE SE NINDE WEMEREWE KUBYARA? RYARI?KUBERA IKI?

  • Abayobozi bacu n’ababyeyi babashyigikiye basa n’abagira bati: ubwo tudashobora kubuza abangavu bacu gusambana no gufatwa ku ngufu, nimureke tubahe ibya ngombwa bituma babikora cyangwa babikorerwa ariko batabyaye abana bazatubera umutwaro: tubahe ibikoresho byo kuboneza urubyaro, tuborohereze no gukuramo inda ku mugaragaro, mu mavuriro ya Leta no mu yigenga. Niba igitekerezo nyamukuru ari ikingiki, nimushikame murebe ukuntu bigendekera ababaho barateye umugongo amategeko y’Imana. Ntibaba bakiri mu nzira y’ubuzima, baba bahisemo iy’urupfu. Umubyeyi muzima aha umwangavu yibyariye uburyo bwo kuboneza urubyaro, agira ngo atabyarana na nde, kandi itegeko nta muntu uwo ari we wese ryemerera kuryamana n’umwangavu?

  • Heheheeee, yewe iriya miti murayibarirwa ntimuyizi ! Abagore 3 b’inshuti zanjye batangiye kuyikoresha tugeze muwa 5 secondaire kugeza nyuma gato turangije universite, nyuma y’imyaka hafi 3 twabaye nk’abashakira rimwe abagabo, uyu munsi 2 muribo babuze urubyaro burundu, Clemence we yasamaga zivamo yagiye gutandukana n’umugabo amaze gukuramo 3 zose; abandi babiri nabo umwe yatandukanye n’umugabo bamaranye imyaka 4 akabona adasama bajya kwa kwivuza birananirana Faycal, Kampala no mu kinyarwa, abonye frw agiye kumushiramo aramwirukana; undi we baracyabana ariko umugabo amaze kubyara umwana hanze ku wari mucuti we bamenyanye mu gihe twateguraga bukwe bwe ! Ni akumiro, injiji niziyishoremo muzaba mumbwira urura nirumara kunyerera ! Ikibazo gikomereye u Rwanda cyane si icy’abana b’abakobwa bataboneza urubyaryo, ikibazo cy’ingutu dufite uyu munsi ni icya banyina bataboneza urubyaro; aha nigo hagakwiye gushyirwa ingufu abo bakecuru barimo kwivugisha ubusa akaba aribo bashishikarizwa gufata ibyo binini/inshinge/udupira/utwuma. Abana mubahe computers, impira ya volley/tenis, ibikoresho bya musica ubundi bidagadure positvely.

  • Ibi bimeze nka bimwe bya ba bandi bajya bashishikariza abantu korora inkoko za kizungu zikurira iminsi 30,nyamara bajya ku isoko bakazanga kandi arizo zigura macye. Rubanda rugufi akaba ari rwo ruhahorerwa. Nizere ko iyi campain ihiririkijwe n’abatarashaka abagabo. Simpamya ko hari umubyeyi wabyaye ushobora kujya inama nk’izi. Niba harya ubutinganyi atari umuco w’i Rwanda ko njya numva ari byo mwamagana,gukuramo inda byemewe,gushishikariza izo mpinja kuboneza imbyaro zitagira zitanazi ni wo muco?

Subiza

Your email address will not be published. Required fields are marked *