• 23/01/2020 1:22 03

Rutsiro: Ab’i Kagano bubatse ivuriro bagura na ‘Ambulance’, bakennye amazi n’amashanyarazi

Ni abaturage bo mu Kagali ka Kagano, mu Murenge wa Mukura mu Karere ka Rutsiro bamaze igihe bafite ikibazo cyo kwivuza kure kuko bajyaga kwivuriza aho bita i Murunda bakoze urugendo rurerure,  bubatse ivuriro bagura n’imbangukiragutabara (Ambulance).

Muri Kagano abaturage baho batunzwe n’ubuhinzwe n’ubuhinzi ariko babashije kubaka iryo vuriro

Icyo ubu bakennye ni umuriro w’amashanyarazi n’amazi meza.

Bavuga ko bataragira ivuriro kubona imbangukiragutabara byabagoraga cyane, ngo bashoboraga kuyihamagara mu gitondo ikabageraho bwije.

Abaturage benshi mu batuye Akagari ka Kagano batunzwe n’ubuhinzi, bavuga ko bafashe ikemezo cyo guteranya amafaranga yo kubaka ivuriro no kugura imbangukiragutabara ubwo iwabo habonekaga akazi ko gukora amaterase.

Icyo gihe babikaga ibiceri 200Frw bageza miliyoni mirongo ikenda (Frw90 000 000).

Nsabimana Donat uhagarariye komite y’abaturage b’Akagali ka Kagano yakusanyije ayo mafaranga yabwiye Umuseke ko ikibazo cy’ubuvuzi cyari kibakomereye.

Ati “Aha ntavuriro twari dufite wasangaga umuturage afite ubwisungane mu kwivuza ariko akarembera mu rugo. Mu gihe k’imyaka itatu dukora mu materasi twabashije gukusanya Frw 200 kuri buri muntu tubasha kubona Frw 90 000 000,  twarebye mu bibazo dufite dusanga icya mbere ari ukubona ivuriro kuko twivuzaga dukoze km 50.”

Nyuma yo kubaka ivuriro banaguze imbangukiragutabara. Abaturage ngo bazashyiraho uburyo iyo modoka n’ivuriro byahavunnye kubibona bazabibungabunga bigakomeza gukora.

Ikibazo kigihangayikishije abaturage Kagano ni ukuba kugeza ubu nta muriro w’amashanyarazi bagira ndetse nta mazi meza bagira.

Amashanyarazi yo abaca hejuru ajya i Karongi.  Kantengwa Chantal umwe mu baganiriye n’Umuseke avuga ko bakwiye gufashwa kubona amashanyarazi.

Ati “Nibyo twiyubakiye ivuriro ndetse tunigurira imbangukiragutabara ariko ikibazo ni umuriro w’amashanyarazi utari ku ivuriro ikindi tuzakenera ni amazi nayo ntayo dufite. Mu rwego rwo kunoza isuku turasaba Akarere kudufasha ibyo na byo bikatugeraho.”

Umunyamabanga Nshingwabikorwa w’Umurenge wa Mukura, Ndayisenga Eustache avuga ko igitekerezo abaturage bagize ari kiza kandi biteguye gukomeza kubafasha ndetse n’ubusabe bwabo ngo bazakomeza kubukoraho ubuvugizi.

Ati “Ni igitekerezo cyiza kandi buri Munyarwanda wese yakwigiraho, aba baturage batunzwe n’ubuhinzi nta kindi  kidasanzwe bakora, kuba barabashije gukusanya ayo mafaranga yose ni ikerekana ko bafite ubushake bwo kwishakamo ibisubizo. Imbogamizi bagaragaje turakomeza kuzikoraho ubuvugizi kandi twizeye ko bizakunda.”

Aba baturage iri vuriro bubatse bariha agaciro ka milioni 26Frw naho imbangukiragutabara ifite agaciro ka miliyoni 66Frw.

Agasantire kabo karimo isoko bahariramo ariko iyo ujoro riguye ubuhahirane burahagarara kubera umwijima

Sylvain NGOBOKA
UMUSEKE.RW

Subiza

Your email address will not be published. Required fields are marked *