• 25/01/2020 3:59 03

Rulindo: Nsabimana igihe yahawe cyo kubagwa kirenzeho amezi 4

Nsabimana Celestin, wo mu Mudugudu wa Gako, mu Kagari ka Mugo, mu Murenge wa Kisaro avuga ko atakibasha kugenda no kugira icyo akora kubera uburibwe bw’akaguru ke, uko buke n’uko bwije ngo ububabare burushaho kwiyongera.

Uyu mugabo uburwayi bwe bwarizanye

Yagiye kwivuza mu ku Kigo Nderabuzima cya Kisaro mu kwezi kwa mbere 2019, bamwohereza ku Bitaro bya Byumba, mu kwezi kwa gatatu na bo bamwohereza ku Bitaro bya Gisirikare i Kanombe, ahageze bamuha gahunda yo kuzamubaga mu kwezi kwa kane 2019, none ageze mu kwezi kwa munani atarabagwa.

Avuga ko i Kanombe yahageze tariki 12 Werurwe bamuhaye utunini tumworohereza ububabare, bamubwira ko azasubirayo mu kwa Kane bakamubaga, igihe kigeze arahamagara bamubwira ko ngo bagiye ahandi bazamubwira igihe cyo kumubaga.

Dogiteri uzabaga uyu murwayi bavuganye ku wa kabiri w’iki cyumweru tariki 13 Kanama na bwo amubwira ko adahari, iki nicyo gihe twaganiriye na Nsabimana.

Nsabimana ati “Ndaribwa cyane, kugenda nihanganye ntega igare ngo ndebe abanyamakuru, akaguru kirirwa kandya kakarara kandya, nta kintu njya nkora.”

Uyu muturage uvuga ko nta kintu ajya akora kubera ubwo burwayi. Abarizwa mu kiciro cya gatatu cy’Ubudehe cy’abantu bifashije.

Iyi ndwara yafashe ukuguru kw’ibumoso ahagana ku murundi ayimaranye imyaka itanu. Ngo yarizanye atangira kwivuza.

Bwa mbere yabazwe n’Umuganga wakoreraga ku Bitaro bya Byumba ariko nyuma yongeye kuremba ajya kwivuzayo bamubwira ko uwo muganga yahavuye, bityo uburwayi bwe babwohereza i Kigali.

Ati “Ni agasebe gato kaje kizanye, kagenda gakura, bakamvura kagakira kakongera kakagaruka, nyuma kwa muganga bambwira ko ari indwara yo ku magufwa.”

Nsabimana iyo ahamagaye ku Ibitaro bamubwira ko agomba kwitonda kubera ko hari n’abandi babiganwe mbere ye bataravurwa.

Uburwayi bwe buramusaba amafaranga agera ku bihumbi 100.

Ati “Nzishyura amafaranga asabwa, yari yambwiye (Dogiteri) ngo ningenda nzitwaze Frw 100 000. Jye nagurisha n’ibyo ntunze byose ariko nkivuza ikibazo ni uko batamvura.”

Nsabimana Celestin ni umugabo wubatse, afite umugore n’abana batatu.

Umuseke wahamagaye Umuyobozi w’Ibitaro bya Kanombe atubwira ko amaze umwaka agiye kwiga, cyakora ko byasaba kumenya Umuganga wita kuri uwo murwayi.

Mbere yarivuje Umuganga wo ku Bitaro bya Byumba aramubaga, uburwayi bugarutse asubiyeyo bamubwira ko atakihakora
Nsabimana avuga ko azemera akagurisha ibyo atunze ariko akivuza

UMUSEKE.RW

5 Ibitekerezo

  • Uburwo muli Africa twivuza biteye agahinda.Iyo ugiye mu bitaro bya Kanombe,uhasanga abantu benshi barwaye cyane kandi bamaze amezi batavurwa.Yego koko bagira abarwayi benshi.Kandi Doctors b’abasirikare bakunda kujya kuvura ahandi muli Army Week.
    Leta nirebe icyo ikora,ziriya ndembe zivurwe.Nibiba ngombwa bashake Doctors bo hanze.Tuge tugira umutima nkuko Yesu yadusabye muli Matayo 7,umurongo wa 12,havuga ngo icyo utifuza ko cyakubaho,ntukagikorere abandi.Tugire icyo bita “empathy”.Nukuvuga kwishyira mu mwanya w’abandi.Twibaze tuti arijye bibayeho.Rwose niba hari Doctor w’i Kanombe usoma iyi nkuru,nagire icyo akora uyu mugabo avurwe.Nibwo bukristu.Ntitukabone umuntu ababara ngo twinumire.Twese tube wa Musamaritani Mwiza.Nibwo iyi si yaba nziza.Nibe nakoraga I KANOMBE nashaka Doctor nkamwinginga akamuvura.Ndababaye cyane kubera uyu mugabo.

  • Turarwana no kwerekana ko ubukene bwagabanutse cyane mu gihugu, imibereho myiza y’abaturage ihagaze neza, none murazana inkuru nk’iyi yerekana ko kubona umuganga ubaga umurwayi ubikeneye amazi atararenga inkombe ari nko kubonekerwa?

  • Ubu se aho ntiyaba arwaye UBULIMA?

  • Ubu se aho ntiyaba arwaye UBULIMA? Abayarwanda barayivura igakira.

  • None se iyo umuganga agiye kwiga ,mu mahugurwa se cg ahandi ,abo yasize ahaye rendez vous birangirira aho ntawe abasigira ngo bazakomereze aho yari agejeje ?!!!!!!!!!!! niba ari ntawe byumvikana ko hari abarinda bapfa kubera ko babuze ubuvuzi cg se batavuriwe igihe . Ubwo se iyo umuntu apfuye cg se agize izindi ngaruka zo kumugara kubera ko atitaweho nkana cg bitewe no kutita ku bintu kw’abaganga bibazwa nde ?? birangirira aho agapfa bagahamba cg agacibwa urugingo bikarangira ? !!! Ababisobanukiwe bansobanurire ndabinginze.

Subiza

Your email address will not be published. Required fields are marked *