• 18/01/2020 6:48 14

Ruli na Coko babwiye Umuvunyi ibibazo byabo

Gakenke – Byiganjemo ibishingiye ku butaka, amakimbirane mu miryango n’ingurane ku mitungo. Umuvunyi wungirije ushinzwe kurwanya ruswa n’akarengane avuga ko hari abaturage babaza bashaka guhinyuza imyanzuro yafashwe gusa, hakaba n’ababaza kuko ibibazo byabo ubuyobozi bwatinze cyane gukemura ibibazo byabo.

Abaturage bo mu mirenge ya Ruli na Coko baje ari benshi kubwira Umuvunyi ibibazo bafite
Abaturage bo mu mirenge ya Ruli na Coko baje ari benshi kubwira Umuvunyi ibibazo bafite

Clement Musangabatware Umuvunyi wungirije yari mu karere ka Gakenke kuri uyu wa gatatu yumva ibibazo by’abaturage bo mu mirenge ya Ruli na Coko, avuga ko usanga ari ibibazo ubuyobozi cyangwa inkiko bakemuye abaturage ntibanyurwe, cyangwa ibyo abayobozi batakemuye neza cyangwa kare.

Umuturage umwe witwa Ntakirutimana Simon wo mu murenge wa Ruli Akagari ka Rusori yavuze ikibazo cy’ubutaka bwe Leta yamuguraniye ikamuha ubundi ariko nyuma uwigeze kuba Mayor akabugurisha akigendera uyu agasigara amara masa.

Avuga ko ikibazo cye yakigejeje ku nzego kuva ku Murenge kugeza kuri Guverineri, uyu akamwoherereza Akarere, Akarere kakamusubiza ku Murenge , imyaka igashira indi igataha ntahabwe ubutaka yita ubwe nubwo afite impapuro z’ibyo asobanura.

Amaze kubwira ikibazo cye Umuvunyi ubuyobozi bw’Umurenge bwabwiye uyu musaza ko ubu bari gusesengura ikibazo cye bakazamuha igisubizo mu kwezi kumwe.

Musangabatware yasabye abayobozi kwirinda guheza abaturage mu gihirahiro ku bibazo nk’ibi, ko bakwiye kubikemura kare.

Ibibazo bigaruka cyane ni ibishingiye ku ngurane ahanyuze ibikorwa remezo, ibibazo by’ibyangombwa by’ubutaka byanditse nabi (ngo hari akagali kamwe hano hose ibi byandikanywe amakosa) n’ibibazo by’ibitabo by’irangamimerere  ku bashakanye mbere ya Jenoside ubu byabuze bakaba ntahandi banditse nk’abashakanye.

Umunyamabanga Nshingwabikorwa w’Umurenge wa Ruli avuga ko bimwe mu bibazo nk’ibi bikeneye gukorerwa ubuvugizi inzego zibishinzwe zikabikemura kugira ngo bidakomeza guteza ibibazo bikomeye mu baturage.

Clement Musangabatware (ibumoso) yumva ibibazo byabo
Clement Musangabatware (ibumoso) yumva ibibazo byabo
Bamwe ngo baba bahinyuza imyanzuro yafashwe abandi koko ibibazo byabo byaratindinze cyane gukemurwa
Bamwe ngo baba bahinyuza imyanzuro yafashwe abandi koko ibibazo byabo byaratindinze cyane gukemurwa

Josiane  UWANYIRIGIRA
UM– USEKE.RW

1 Igitekerezo

  • Uyu muvunyi, ba Senateri n’abadepite nibarekere aho gushora abaturage. Bamara kubabwira akari imurori, aho kurenganurwa bagatanikwa n’abayobozi b’inzego z’ibanze na polisi, bafungirwa bindi bivuka nyuma y’ubuhamya bwabo nk’aho mvugiye aha. Tutanagiye kure, murebe yenda uko byagendekeye kaminuza ya Gitwe cyangwa uriya mudamu w’i Muhanga uregwa gucuruza urumogi. Jye sinzibagirwa umuturage w’i Rubavu wabajije Meya wahahoze wari ugiye kurangiza ikibazo cy’amasambu ayambura abayaguze banatsinze mu nkiko ayaha abavuga ko ari gakondo yabo yagurishijwe binyuranyije n’amategeko ati: nimvugisha ukuri ntimufunga? Meya ati vuga ikikuri ku mutima nta kibazo rwose. Arakibaza (kijyanye n’ububasha nyakuri Meya yari yaje yambaye mu kurangiza ikibazo cyateje rwaserera). Amaze kukibaza bamushyiramo amapingu baramutambikana abaturage bakiri ahongaho. Umuturage ugitobora akavuga ku mugaragaro ibitagenda mu ruhame ajye azirikana ikintu nka kiriya, akuremo isomo rya ngombwa.

Subiza

Your email address will not be published. Required fields are marked *