• 24/01/2020 12:16 48

Ruhango: Abarenga 2000 basabwe kurangiza ibibazo bibangamiye abaturage

Mu nama Mpuzabikorwa y’Akarere ka Ruhango yateranye kuri uyu wa gatatu, Habarurema Valens ukayobora yabwiye Umuseke ko hari abantu 2132 bagiye gukemura ibibazo bibangamiye imibereho myiza y’abaturage.

Habarurema Valens Umuyobozi w’Akarere ka Ruhango ,avuga ko hari abantu barenga Ibihumbi bibiri bagiye gukurikirana ibibazo bibangamiye Imibereho myiza y’abaturage.

Mayor Habarurema Valens avuga ko bakoranye inama n’abavuga rikumvikana, batoranyamo abantu bane muri buri Mudugudu kugira ngo bafashe abatishoboye kwivana mu bukene.

Ati: “Tubabazwa no kuba hakiri bamwe mu baturage badafite aho baba, abafite imirire mibi, cyangwa abararana n’amatungo, ibi bibazo ni byo aba bantu bose bagiye kwitaho.”

Habarurema yavuze ko  bihaye intego ko bizarangirana n’impera z’uyu mwaka wa 2019 kuko hari ibidasaba ingengo y’imari.

Ati: “Hari ibibazo bashobora gukemura hakoreshejwe Umuganda w’abaturage gusa.”

Hakizmana Joseph Umukuru w’Umudugudu wa Buhoro, Akagari ka Kubutare mu Murenge wa Mwendo, avuga ko  hari imvune ba Mudugudu bahuraga na yo kuko ngo muri Komite y’abantu batanu ni bo bakora cyane.

Ati: “Amabwiriza menshi arebana n’ishyirwa mu bikorwa ry’ibyemezo bya Leta bireba ba Mudugudu, kuba baduhaye abatwunganira bigiye kwihuta kurushaho.”

Guverineri w’Intara y’Amajyepfo, CG Gasana Emmanuel yasabye Mpuzabikorwa ko gusubiza mu ishuri abana bayataye ari byo bagomba kubanza gukemura kuko abamaze kurivamo ari benshi.

Ati: “Aba turabasaba kujya mu rugo ku rugo basuzuma ibibazo byatumye umwana waho ata ishuri, kandi ntabwo ibibazo byatinda gukemuka kubera ko abahawe izo nshingano ari benshi.”

Mu Karere ka Ruhango, abana barenga 500 bataye Amashuri.

Nta mibare y’abadafite amacumbi Ubuyobozi bw’Akarere bwagaragaje, gusa buvuga ko ibibazo bibangamiye imibereho myiza y’abaturage muri rusange ari byo basabwe kwitaho.

Guverineri w’Intara y’Amajyepfo CG Gasana Emmanuel avuga ko gusubiza abana mu Mashuri biri mu bibazo abahawe izo nshingano bagomba gukemura.
Bamwe muri ba Mudugudu bavuga ko hari ibibazo bizakemuka kubera ubufatanye.

MUHIZI ELISEE
UMUSEKE.RW

Subiza

Your email address will not be published. Required fields are marked *