• 12/12/2019 2:23 55

Rubavu: Abakekwaho amanyanga mu gushaka kugurisha ibagiro rya KOADU barafunze

Bamwe mu bakekwaho gukora inyandiko mpimbano bagamije kugurisha ibagiro ry’abanyamuryango ba Koperative KOADU ikorera i Rubavu, ubu bari mu maboko y’ubushinjacyaha, batawe muri yombi muri iki cyumweru.

Inyubako y’ibagiro yari yashyizwe muri cyamunara

Abanyamuryango b’iyi Koperative bari baherutse kuvuga ko nta wundi wo kubarenganura uritse Perezida wa Repubulika Paul Kagame.

Abafunzwe ni Theogene Nzabandora na Hakizimana Hassan ni ba rwiyemezamirimo bubatse ibagiro mu izina rya Company King Construction and Service Limited.

Noteri w’Umurenge wa Rubavu witwa Bahati Amuri na we yatawe muri yombi akaba yarasinye ku nyandiko bivugwa ko ari mpimbano yari igamije guteza cyamunara ibagiro.

Nyuma yo gutakamba mu itangazamkuru, Ikigo k’Igihugu gishinzwe iterambere ry’Amakoperative cyahise gihagarikisha cyamunara ya ririya bagiro.

Umuvugizi w’Ubushinjacyaha, Faustin Nkusi yabwiye Umuseke ko abafunzwe ari batanu bashinjwa ubufatanyacyaha mu guhimba no gukoresha inyandiko mpimbano bagamije guteza cyamunara ibagiro.

Ati “Abafunze sinjya mu myirondoro yabo, barimo Hakizimana Hassan na bagenzi be, hari inyandiko bahimbye  igaragaza ko hari amafaranga miliyoni 250 yagombaga gusohoka muri Koperative, RIB yakoze iperereza irabadushyikiriza turi kubicukumbura ngo turebe umwanzuro wafatwa.”

Leta iheruka gushyira imbaraga mu bijyanye no gukurikirana abanyereza imitungo y’Amakoperative.

Jean Paul NKUNDINEZA
UMUSEKE.RW

2 Ibitekerezo

  • Iby’ama cooperatives ni danger!
    (mbona ipfundo aho riri aruko abanyamuryango bazo batajya bamenya uko umutungo uhagaze umunsi ku munsi. Iyiba Banks zashyiragaho uburyo, mu gihe hagiye cg havuye amafranga kuri konti ya cooperative, abanyamuryango bose bagahita babimenyeshwa, for ex biciye muri SMS. Byatuma nibura habaho gukorera mu mucyo)

  • Nuko mutazi ibibera muri Rutsiro aho abakozi b’akarere bategetswe kujya muri koperative” COTOPROCO” ubu bakaba batazi irengero ryayo! Uzi gusezera muri koperative utakiri no mubakozi b’akarere imyaka igashira ari 2 utarasubizwa! Naho dukeneye ko RIB ihagera tukarenganurwa.

Subiza

Your email address will not be published. Required fields are marked *