• 24/01/2020 2:08 17

REG ivuga ko iterwa imbaraga n’ubuhamya bw’abacanaga udutadowa ubu bakoresha imirasire y’izuba

  • Abakoresha amashanyarazi adafatiye ku miyobora migari ubu ni 14%; muri 2024 bakazaba ari 48%

Ubuyobozi bwa Sosiyete y’Igihugu Ishinzwe Ingufu (REG/Rwanda Energy Group) buvuga ko buterwa imbaraga n’ubuhamya bw’abakoresha amashanyarazi aturuka  ku mirasire y’izuba bayarata ibyiza amaze kubagezaho, iyi sosiyete ikora ibishoboka byose ngo aya mashanyarazi akomeze kugera kuri benshi bashoboka.

Guverinoma y’u Rwanda ifite intego ko muri 2024 abaturarwanda bose (100%) bazaba bagerwaho n’amashanyarazi arimo afatiwe ku muyoboro mugari kukigero kingana na 52% naho adafatiye ku muyobora mugari akazaba ari 48%.

Umukozi wa REG ushinzwe ingufu zitanga amashanyarazi adafatiye ku muyobora rusange, James Twesigye avuga ko ikoreshwa ry’aya mashanyarazi ritaramara igihe kinini mu Rwanda ariko ko ubu amaze kugera ku ngo zirenga ibihumbi 300 zingana na 14%.

Izi ngo zikoresha amashanyarazi adafatiye ku miyoboro migari, ziganjemo izikoresha imirasire y’izuba.

Uyu mukozi wa REG avuga ko iyi miryango ivuga imyato ibi bikorwa remezo bikomeje kubahindurira imibereho.

Ati «Abenshi barakubwira bati ‘njyewe nakoreshaga agatadowa, ariko ubu narakaretse, najyaga murikisha igiti ubu nakivuyeho, abana banjye bariga bagatsinda neza mu ishuri’.»

Harerimana Alphonse atuye mu Mudugudu wa Ngarama. Avuga ko aho afatiye umurasire, iwe haba hari umucyo.

Yagize ati “Uyu murasire umfitiye akamaro kenshi. Uretse kunkura mu mwijima, abaturage b’inaha bananzanira telephones zabo nkabashyiriramo umuriro. Abana banjye nabo barorohewe mu myigire yabo kuko n’ijoro basubira mu masomo neza.”

Hakizimana Felesiyani wo mu Karere ka Bugesera ufite inzu yogosheramo abantu bakamuha amafaranga avuga ko aho yaboneye umurasire ubucuruzi bwe abukora neza kuko ngo mbere yakoreshaga batiri yo ku modoka yashiramo umuriro bikamusaba gukora urugendo rw’isaha agiye kongeramo umuriro.

Ati “Umurasire naguze waje mfite imashini ebyiri zogosha, inzu yanjye ifite imiryango ibiri iriho amatara ahantu hose ku buryo nta kibazo nkigira cyo kuba nahura n’umwijima. Mu kazi kanjye ko kogosha nako sinkigahagarika ngo batiri yashizemo umuriro kuko umurasire igihe cyose uba waka.”

James wo muri REG avuga ko abantu bamaze kumva icyanga cyo gukoresha aya mashanyarazi kuko hari abagaruka basaba ko amashanyarazi yabo yongererwa ingufu kugira ngo na bo bayakoreshe ibyisumbuyeho.

Ati «Niba yacanaga amatara na radio noneho akakubwira ati ‘byagenda gute ngo nshyireho televiziyo cyangwa firigo. »

James uvuga ko iki kifuzo kiba gishobora kubahirizwa mu gihe yubahirije ibyo yasabwa, avuga ko ubu buhamya buha imbaraga abashinzwe gukwirakwiza ingufu kugira ngo bakomeze kugira uruhare mu guhindura imibereho y’abaturarwanda.

Ati «Icya mbere bituma twongera imbara kuko umuhigo wo kugera kuri 48% mu myaka ine n’igice isigaye, icya kabiri iyo twumva abaturage bavuga bati ‘ubuzima bwarahindutse, twumva natwe bidushimishije.»

Imirasire y’izuba ikunze gukoreshwa mu bice by’icyaro

 

48% ivuye kuri 14% mu myaka ine n’igice ngo birashoboka cyane…

James Twesigye avuga ko gukwirakwiza amashanyarazi adaturuka ku muyoboro mugari byoroshye kandi bikaba byihuta ku buryo iriya ntego yo kugeza kuri 48% izagerwaho nta shiti.

Ati «Kuko ntibigusaba kujya kwimura abaturage, ntibigusaba gucukura imyobo ngo uratera amapoto ; iyo amafaranga ahari akazi kaba kakozwe.»

Uyu mukozi wa REG uvuga ko ikiba gisabwa ari ukugeza ibikoresho ku babikeneye, avuga ko Leta y’u Rwanda hari amafaranga menshi yashyize muri Banki Ishinzwe gutsura amajyambere [BRD] azanyuzwa mu bigo by’imari bya SACCO akazagurizwa abaturage kugira ngo babashe kugura biriya bikoresho mu buryo buboroheye.

James uvuga kandi ko hari n’andi mafaranga azatangwa na Banki Nyafurika itsura amajyambere (BAD) nayo agenewe ibi bikorwa, atangaza ko REG iri gushishikariza  ibigo  bicuruza serevisi z’amashanyarazi aturuka ku mirasire y’izuba guhamagarira abaturage bakajya muri za SACCO kugira ngo zibagezeho ibikoresho.

Murangira Saveri utuye mu Karere ka Kayonza, amaze igihe ahawe amashanyarazi akomoka ku mirasire y’izuba, ndetse agiye kurangiza kwishyura. Avuga ko nta kibazo, amashanyarazi aturuka ku mirasire y’izuba ari amashanyarazi kimwe n’andi.

Ati “Nari mu icuraburindi, nkirirwa mbunza telephone nshaka aho nyishyirishimo umuriro, ndira ku gatadowa, ariko ubu sinkicana agatadowa, sinkigura buji, sinkigura peteroli, sinkigura amabuye. Niyo bakanze batiri ikazima ari nk’umwana uyicokoje, mba numva mbangamiwe muri njye.”

 

Ntacyo amashanyarazi asanzwe yakora ngo kinanire ay’imirasire…

James Twesigye avuga ko ingufu zituruka ku mirasire y’izuba ziri mu byiciro bitandukanye ku buryo umuntu agura izihaza ibyifuzo bye.

Ati «Niba ari umuntu ukeneye amashanyarazi yo gucana amatara, kuvuza radio; izo ngufu ziba zihari zitanga ibyo ;  niba ukeneye izirenzeho gato zo gucana firigo, television n’ibindi, na zo zirahari zitanga ibyo ; niba ufite uruganda ruto ukeneye amashanyarazi kugira ngo icyuma cyake gikore, nazo zirahari zitanga ibyo.»

Amara impungenge abagikeka ko amashanyarazi adaturuka ku muyoboro rusange adafite ingufu nk’asanzwe, akavuga ko ubu bwoko bwombi butanga ingufu zakoreshwa mu bikorwa binyuranye.

Avuga ko mu bikoresho by’imirasire y’izuba, harimo igice gifata imirasire y’izuba kikayihinduramo amashanyarazi ikindi kikayibika [icyo bita bateri] ku buryo mu gihe hashize iminsi itatu izuba ritava, umuntu ashobora gukomeza gukoresha amashanyarazi.

Ati «Kandi iyo urebye u Rwanda aho ruherereye n’uko rumeze, icyo gihe nticyabaho ko tumara iminsi itatu tutarabona izuba rigereranije.»

REG yakoze ishusho y’uko amashanyarazi azagenda akwirakwizwa mu bice byose by’igihugu kugeza muri 2024, ku buryo ubu uduce tuzagezwamo aturuka ku muyobora mugari n’utuzahabwa aturuka ku miyoboro mito n’ay’imirasire y’izuba turazwi.

Martin NIYONKURU
UMUSEKE.RW

Subiza

Your email address will not be published. Required fields are marked *