• 15/12/2019 12:56 48

REG BBC yakoze imyitozo ya nyuma mbere yo kwerekeza mu Misiri

Kuri uyu wa mbere REG BBC yitegura kuzahagararira u Rwanda mu mikino nyafurika yakinnye umukino wa gicuti n’ikipe y’igihugu nayo irimo kwitegura kuzitabira imikino ya nyuma yo gushaka itike y’igikombe cy’isi. Uyu mukino warangiye REG itsinze ku manota 55-48.

Keneth Gasana nawe azafasha REG BBC mu mikino izabera mu Misiri
Keneth Gasana nawe azafasha REG BBC mu mikino izabera mu Misiri

Ni irushanwa rizabera mu Misiri guhera tariki 8-11 Gashyantare, 2019.  REG BBC yabonye ubutumire nyuma yo kurangiza iri  ku mwanya wa gatatu mu mikino y’akarere ka gatanu yabereye muri Tanzania.

Mu rwego rwo kurushako kwitegura neza ndetse no kubaka ikipe,ubuyobozi bw’iyi kipe bwongeyemo bamwe mu bakinnyi bafite ubunararibonye barimo Manzi Dan na Gasana Keneth basanzwe bakina muri Leta zunze ubumwe za Amerika.

Aba kandi basanzwe bakinira  ikipe  y’u Rwanda.

Bugingo Eric ushinzwe imibereho y’abakinnyi avuga ko bahisemo Dan na Gasana kuko n’ubundi basanzwe bamenyeranye na bamwe mu bakinnyi ba REG.

Ngo bajya  bahurira mu ikipe y’igihugu bityo bikazabafasha mu guhuza umukino.

Bugingo ati: “Twahisemo Dan na Keneth kuko tubona ari abakinnyi b’ikipe y’igihugu bamenyeranye na bamwe mu bakinnyi ba REG BBC kuku bajya bakinana mu ikipe y’igihugu. Bamenyeranye na bagenzi babo nka Shyaka,Kami, Kaje n’abandi.  ibi rero bituma twumva ko guhuza umukino bizoroha kandi ubunararibonye bafite twumva buzatanga umusaruro.”

Umunyamerika Bilal Naim Richardson nawe yaraye ageze Kigali nawe akazajyana n’ikipe ya REG BBC mu Misiri.

Biteganyijwe ko ikipe ya REG BBC ihaguruka kuri uyu wa kabiri saa munani z’igicamunsi.

Ikipe ya REG iri mu itsinda rya gatatu aho iri kumwe na Al Ahly yo mu Misiri, Primeiro de Agosto yo muri Angoala na Ferroviario da Beira yo muri Mozambique.

 Yvonne IRADUKUNDA

UM– USEKE.RW

Subiza

Your email address will not be published. Required fields are marked *