• 09/12/2019 7:43 43

Ebola ni umwanzi nk’abandi nayo duhora tuyiteguye- Min Gen Albert Murasira

Ubwo yatangizaga inama  mpuzamahanga ihuza ingabo z’u Rwanda n’izo mu bihugu bya Africa na USA izamara iminsi 3 Minisitiri w’ingabo z’u Rwanda Major Gen Albert Murasira yavuze ko iriya nama izaba uburyo bwiza bwo gukomeza gukungurana ibitekerezo n’izindi ngabo mu rwego rwo gukumira ibiza no kugabanya ubukana bw’ingaruka zabyo. Ni  inama ibaye ku nshuro ya karindwi ariko u Rwanda rukaba ruyakiriye bwa mbere.

Minisitiri w’ingabo Major General Albert Murasira ageza ijambo ku bitabiriye inama iri kubera i Kigali

Intego nkuru y’iyi nama ni ukwigira hamwe uko ingabo zo mu bihugu bya Africa zakongera ubumenyi mu kumenya uko Ibiza bitangira n’ibyakorwa kugira ngo ingaruka biteza zigire ubukana buke.

Umuryango uhuza ingabo zo mu bihugu biri buteranire mu Rwanda witwa African Partner Outbreak Response Alliance (APORA, bivuze Ubufatanye bugamije kurwanya ibiza).

Mu kiganiro Maj Gen Murasira yahaye RBA yavuze ko Abanyarwanda badakwiye guterwa impungenge na Ebola nk’icyorezo kuko ngo ingabo z’u Rwanda ziyifata nk’umwanzi nk’abandi.

Ati: “Abanyarwanda batekane rwose. Ebola ni umwanzi nk’abandi nayo duhora tuyiteguye”

Umuvugizi w’ingabo z’u Rwanda Lt.Col Innocent Munyengango yabwiye Umuseke ko RDF yiteguye kwigira ku zindi ngabo ku byerekeye ubumenyi n’ubunararibonye zifite mu gukumira no guhangana n’ingaruka z’ibiza.

Ati: “Ubumenyi tuzunguka buzadufasha mu kazi kacu ko gutabara ahabaye ibiza mu buryo butuma ingaruka zabyo zitangiriza Abanyarwanda cyane, kandi tukazabikora haba mu gihugu cyacu, mu Karere no ku rwego mpuzamahanga aho bizaba ngombwa ko dutanga ubufasha.”

Ingabo ziri bwitabire iyi nama zaturutse muri Algeria, Angola, Benin, Cape Verde, Cameroon, Chad, Cote d’Ivoire, Congo Kinshasa, Gabon, Ghana, Guinea, Kenya, Liberia, Madagascar, Mali, Maroc, Niger, Nigeria, Congo Brazzaville, u Rwanda, Senegal, Sierra Leone, Tanzania, Togo na Leta zunze ubumwe za America.

Dr Diane Gashumba uyoboza Minisiteri y’ubuzima nawe yafashe ijambo
Amb Peter Vroom uhagarariye USA mu Rwanda atanga ikiganiro
Ni inama ihuza abahagarariye ingabo mu bihugu bimwe by’Africa hamwe na USA

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *