• 11/12/2019 9:51 40

Raporo: Amadeni ku bihugu by’Afurika yikubye kabiri mu myaka 2

Raporo nshya ku madeni y’ibihugu bya Afurika, irerekana ko imyenda yo hanze ibihugu by’Afurika bigezeho yikubye inshuro kabiri mu myaka ibiri ishize.

Inguzanyo nyinshi ubu ngo ziri gutangwa n'Ubushinwa
Inguzanyo nyinshi ubu ngo ziri gutangwa n’Ubushinwa

Ikompanyi y’abongereza ishinzwe gucunga imyenda(Jubile dept Campain) yavuze ko igice kinini cy’amadeni ibi bihugu bifite ari ayo byafahe muri Bank y’isi ndetse n’ikigega mpuzamahanga gishinzwe imari.

Ngo hari n’imyenda ibihugu byaka mu bindi bigo byigenga kandi ngo ayo madeni aba ari ku nyungu yo hejuru.

Mu mwaka wa 2015 amadeni yari kuri 5.9% hashingiwe ku misoro ibihugu byinjiza ariko yikubye kabiri mu mwaka wa 2017 agera kuri 11.8%.

20% by’amadeni ibihugu byishi bya Africa bifite biyahabwa n’Ubushinwa kandi 17% by’inyungu  yishyurwa ku madeni ngo ijyanwa n’Ubushinwa.

Ku rundi ruhande, 32 % by’andi madeni ibihugu by’Afurika bifite biyikopesha mu bigo byihariye mu gihe 35% by’andi madeni bifite biyahabwa n’ibigo muzamahanga nka Banki y’isi hashingiwe ku masezerano. Naho 55% bikayikopesha mu bigo mpuzamahanga byigenga.

Iyi raporo ivugako ukwiyongera kw’amadeni ku bihugu by’Afurika kwatangiye mu  2001 bikazamuka cyane mu 2008 bitewe n’impamvu zo kwikopesha ahantu henshi hatandukanye, ibyo byakurikiwe no gutakaza agaciro k’ifaranga n’ibicuruzwa  byo muri Afurika mu 2014 idorali ry’Amerika rirushaho kugira agaciro.

Abashakashatsi bagaragaza ko 20% by’amadeni ibihugu by’Afurika bifitiye Ubushinwa  ni umubare muto ugereranyije n’uwo ibindi bihugu biwufitiye.

Kugeza ubu ngo hari impungenge  ko Ubushinwa buzagumya kuguriza ibihugu by’Afurika kubera ko bikenera amadeni menshi yo kubakisha ibikorwa remezo.

Jubile dept Campain irasaba ko hashyirwaho amategeko yihariye agena uburyo imyenda ikwiye guhabwa ibihugu by’Afurika atabishyize mu kaga.

Muri Gicurasi uyu mwaka ikigega mpuzamahanaga cy’imari FMI cyaburiye Africa ku nguzanyo z’amahanga zimwe na zimwe zitari ngombwa.

Itsinda ry’ikigega mpuzamahanga cy’imari, IMF, nyuma y’icyumweru rigenzura mu Rwanda ryatangaje raporo ivuga ko imyenda y’u Rwanda ikomeje kuzamuka aho yari igeze hafi kuri 45% by’umusaruro mbumbe w’igihugu “GDP” (2016-17).

Iri tsinda ryagaragaje ko inguzanyo u Rwanda rufata mu mahanga zazamutse cyane kuko kuva mu 2010 zavuye hafi kuri 17% bya GDP y’u Rwanda, mu 2016 zikaba zararenze 35%.

Icyo gihe, uwari Minisitiri w’Imari n’igenamigambi Amb. Claver Gatete (ubu ni uw’ibikorwa remezo) yavuze ko imyeenda itera ibibazo iyo igeze hejuru ya 50% by’umusaruro mbumbe w’igihugu, ko igipimo cy’umwenda Leta y’u Rwanda iriho nta mpungenge giteye.

Theogene NDAYISHIMIYE
UM– USEKE.RW

0 Igitekerezo

  • Ikibazo abanyaburayi n’abanyamerika bafite, ntabwo ari umwenda w’ibihugu by’uyu mugabane, kuko ari wo batuzirikishije kuva ibihugu byacu bitangiye kwitwa ko byigenze, bakoresheje World Bank na IMF cyane, ariko n’inguzanyo igihugu ku kindi zikazamo. Ikibazo nuko hari abandi batangiye kutuzirikisha imyenda kimwe nabo, kandi noneho bafite na cash ihagije yo gutanga, mu gihe uburayi na Amerika bugarijwe n’imyenda. Ikibabaje kurusha ibindi, nuko abayobozi ba Afrika ari bo bayihejeje mu myenda y’agatereranzamba, kandi abenshi banasesagura inguzanyo zifatwa. Barangiza ugasanga baratwigisha gukunda igihugu.

    • Analysis yawe niyo kabisa. Usomye izo raporo n’ibyegeranyo bisohorwa n’abayita impuguke kuri Africa, wakwibeshya ko ari impuhwe bafitiye uyu mugabane. Ikibazo bifitiye ni uburyo China iri kubatwara umugati witwa Africa naho iby’imyenda ni ukuyobya uburari.

  • Icya mbere iyo myenda ikora, ni ugufasha abayobozi ba Afrika kubaho bisumbukuruje aho kwizirika umukanda kimwe n’abo bayobora, kandi umuturage ari we uzishyura byose, binyuze mu misoro, mu guta agaciro k’ifaranga, mu gufatira ibikorwa remezo n’umutungo kamere iyo ibihugu byananiwe kwishyura , mu kudutegeka kwibanda ku musaruro woherezwa mu mahanga aho gushyira ingufu mu kongera umusaruro w’ibiribwa mu gihugu. Nicyo kibabaje kurusha ibindi. Naho gufata umwenda ubwabyo si ikibazo iyo ukoreshejwe neza.

  • @Umuseke mwazadufasha kudukorera analysis ijyanye n’ingaruka zagiye ziba ku bihugu, mbese mukatwereka igihe twananiwe kwishyura uburyo turyozwa iyo myenda.thx

  • Nyamara hari ikibazo tutajya tuvugaho! Ese imyenda dufata igirira akamaro twe abanyafurika tuyifata? cyanga se isubira iyo yavuye ku nyungu z’abaayitanga? Baguha umwenda ngo ugure imodoka zabo ariho ubona abaperezida ba Afurika bagira ibimodoka bihenze kandi byinshi maze ukibaza icyo babimaza. Ubwo simvuze kugura indege zihenze kandi ziguruka zigiye iwabo!!! Irebere ukuntu abaperezida ba Afurika bafata indege zabo – niba zinitwa iz’ibihugu byabo – bagiye mu nama muri Amerika cyanga i Parisi! Noneho basigaye bazifata bakajya no mu Bushinwa!!! Byungura nde uretse uwakoze izo ndenge, akabaguriza amafaranga baziguze, akubaka amahoteli bararamo? Ibaze nawe nk’iwacu i Rwanda: Perezida Trump adusuye kangahe ugereranyije n’inshuro perezida wacu yasuye Amerika? Ntabwo nabibaze ariko buri wese yabikorera ubushakashatsi! Nguko kwihesha agaciro mu myenda dufata.

  • Ibihugu by,Afrika bimeze nk,umugabo w,umisinzi,ugenda yikopesha kuri buri kabari no kuri buri butike.
    Bene uwo mugabo ahembwa 100.000F akanywera 80.000F,gutunga abana be b,indahekana akabiharira 20.000F.
    Bene uyu mugabo,birangira ibye nitejwe cyamunara,akagana iy,ubukode no ku kazi bamwirukanye.

    Ndibaza,iyo leta ibaye karyamyenda nk,uwo mugabo (ikarengwa n,imyenda) bigenda gute?!?!
    Ese iratezwa nayo??!! Hhhhhhh

  • Rwose umuntu yabonye umuguriza ubwishyu buhari nta kibazo! Ariko se ayo mafaranga akoreshwa ate? Natangajwe no kumva abantu babaza RDB amafaranga yatanzwe kuri Deal ya Arsenal aho kubibaza abadepite! Jyewe Inama natanga ni uko mbere y’ uko iminshinga minini itangwaho amafaranga izajya ibanza kugenzurwa. Niba bagiye guha amafaranga ba Gacinya ,bakabanza gutanga rapport muri iriya komisiyo ishinzwe kugenzura imikoreshereze y’ umutungo Wa leta! Naho ubundi kwirwa batubwira ngo naka yatawe muri yombi! Twasanze yaranyerejwe miliyari… Ejo ukumva yarekuwe…….izi report ziturya ahantuuuuu..

Subiza

Your email address will not be published. Required fields are marked *