• 13/12/2019 10:09 14

RAB ivuga ko kwiga kuri Dosiye z’abakozi byatindije umushahara w’ukwezi kwa 7

Abakozi bagera kuri 200 b’ikigo k’igihugu gishinzwe iterambere ry’Ubuhinzi n’Ubworozi (RAB) bavuga ko baheruka guhembwa muri Kamena 2019, none ukwezi kwa munani kukaba kugezemo hagati, RAB yo ivuga ko abatinze guhembwa ari abagengwa n’amasezerano yongerwa buri mwaka, kandi ngo umushahara batabonye ni uw’ukwezi kwa 7 gusa.

Bamwe mu bakozi ba RAB bavuga ko bagiye kumara amezi agera kuri atatu batarahembwa

Bariya bakozi bagengwa n’amasezerano bo bavuga ko abandi bakozi barenga 400 bakorera RAB barimo n’abayobozi bakuru bo bahembwa ku gihe, kuko buri taliki 26 baba babonye imishahara yabo.

Umwe muri bo yabwiye Umuseke ko amakuru afite ari uko nta kibazo k’ingengo y’imari RAB ifite ku buryo babura umushahara w’ukwezi kwa 7, kuko amafaranga ngo arahari ahubwo ushinzwe imirimo rusange y’ikigo (Corporate Division Manager) ngo abigendamo biguru ntege.

Ngo Minisiteri y’Imari n’Igenamigambi yahaye RAB amafaranga yose ikeneye kugira ngo ihembe abakozi.

Uwo mukozi wa RAB utashatse ko amazina ye atangazwa agira ati “Ibi bituma hari bamwe muri twe batanga umusaruro muke. Umukozi utitabwaho na we ntakora neza.”

Ngo ni ikibazo kimaze iminsi kandi kibagiraho ingaruka zirimo kudashobora kwishyurira abana amashuri neza, guhabwa ibihano n’ibigo by’imari ku bafite inguzanyo n’ibirarane mu kuzishyura, gushwana no guterwa ikizere n’abo bakodeshaho inzu, n’aho bikopeshaho mu bice batuyemo n’ibindi.

Basaba inzego nkuru z’igihugu gutangira kureba iby’iki kibazo n’ibindi bikirimo kandi badashidikanya ko bigira ingaruka ku mikorere myiza n’umusaruro by’iki kigo RAB gishinzwe guteza imbere urwego Abanyarwanda benshi bashingiyeho ubuzima bwabo rw’ubuhinzi n’ubworozi.

Pauline Mushimiyimana ushinzwe imirimo rusange muri RAB (Corporate Division Manager) yabwiye Umuseke ko nta muntu ufitiwe ibirarane wigeze abegera ngo bananirwe kumukemurira ikibazo. Avuga ko nta mukozi wa RAB ufitiwe ibirarane.

Ati: “Nta birarane by’aba contractuals dufite. Watubwirira uwumva tumufitiye ikirarane wese akazatwegera tukareba, hanyuma twasanga hari ikibazo k’ikirarane tuzamwishyura.”

Dr Patrick Karangwa Umuyobozi Mukuru wa RAB, twigeze ku muhamagara avuga ko ari mu nama, aho ayiviriyemo yabwiye Umuseke ko bariya bakozi bafite amasezerano y’umwaka yongerwa uko urangiye basanzwe bahembwa ku gihe, gusa ngo kuba umushahara w’ukwezi kwa 7 batarawubona byatewe no kwiga kuri dosiye zabo zo kubongerera amasezerano, ariko abizeza ko vuba uzaba wabagezeho.

Ati “Ukuri ni uko abakozi bafite amasezerano y’umwaka batarahembwa ukwezi kumwe kwa 7, ubu turi tariki 16 z’ukwezi kwa 8 uko ntiwavuga ko kwabaye ikibazo kuko igihe cyo kuguhembera ntikiragera, ukwezi kwa gatandatu baraguhembewe. Bavuze ko batarahembwa amezi atatu wakumva ko ari ikibazo kititabwaho, kuko ukwezi kwa munani na ko wagira ngo nta kizere bafite ko bazaguhembwa.”

Dr Karangwa avuga ko ari bwo bwa mbere ikibazo nka kiriya kibaye kuko ngo abakozi ba RAB basanzwe bahembwa ku gihe, ngo ikibazo cyabaye ni uko umwaka w’ingengo y’imari urangira tariki 30 Kamena, ukwezi kwa 7 kukaba ukw’ingengo y’imwari nshya, kandi ngo bariya bakozi habanza kuerebwa dosiye zabo kuko ngo buri mwaka si itegeko ko amasezerano yari afite yongerwa.

Ati “Hari akazi ko kugenzura ko bujuje ibisabwa, kandi nabwo tubanza gusaba Minisiteri y’Abakozi ba Leta kugira ngo abo bantu bagume ku rutonde rw’abahembwa, icyo ni cyo kibazo cyabaye kuko hari umwanya ucamo mu rwego rw’ubuyobozi, ariko n’ubwo bimeze gutyo imishahara y’ukwezi kwa 7 yabo yamaze gukorwa ubu yageze muri Minisiteri y’Imari n’Igenamigambi igihe icyo ari cyo cyose bayibona.”

Yavuze ko bariya bakozi bahembwaga ku gihe ndetse mbere y’abasanzwe bafite amasezerano y’igihe kirekire.

Jean Pierre NIZEYIMANA
UMUSEKE.RW

7 Ibitekerezo

  • RAB igerageze ijye ihembera abayikoreye ku gihe,kuko umudiho uva mu itako.

  • KANDI UBUKUNGU BUDASIBA KUZAMUKA MURABESHYA

  • Bazabanze bajye kurandura bya biti bahaye abaturage ngo bahinge bababeshya ngo ni soya.Ahubwo bagombye gufungwa bose.

  • Binyibukije akantu ntazibagirwa mu buzima; hari ahantu nigeze gukora (SORAS), dukorera ku mihigo, bukeye DG ategeka ko no muri Finance bagomba gukorera ku mihigo! Kuva ubwo hari itariki ntarengwa imishahara yagombaga kuba yageze ku babishinzwe ngo bayisinye, yarenga abayikora bakabiryozwa! Byatumye mu myaka itari micye nahakoze duhembwa bitarenze le 25.

  • Iki kibazo no muri WASAC ltd kirahari nyamara umuyobozi ntasiba gutanga ibiganiro mu binyamakuru bitandukanye agaragaza ko ikigo kiyobowe neza

  • Harya za soya mwatanze zitera mwazikuye he RAB abakozi bayo bibera muri misiyo gusaaaa abaturage babona imodoka zanditseho ngo RAB ariko ngo ntibajya babona abazirimo ngayo nguko

    • Ibyo nta gihamya wabibonera rwose gabanya ishyari. Wababona ute utageze mu mibande bakoreramo? Dore season yatangiye umanuke ugere mu bishanga nutababona ubone uvuge ibyo.

Subiza

Your email address will not be published. Required fields are marked *