• 27/01/2020 1:11 00

Poland: Uwahatanye muri Miss Rda ngo ibyo yakuye mu nama irimo Perezida ni impamba

Umutoni Pascaline Harimana wahatanye mu irushanwa ry’ubwiza, Ubumenyi n’umuco (Miss Rwanda) rya 2016 uherutse kurangiza ikiciro cya kabiri cya kaminuza muri Poland, yanitabiriye inama yari irimo umukuru wa kiriya gihugu, ngo ibyo yungutse muri iriya nama abifata nk’impamba iherekeje ibyo yize mu Ishuri.

Umutoni Pascaline akunze kwitabira inama zikomeye hose ngo ahungukira ubumenyi

Umutoni Pascaline mu mpera z’icyumweru gishize yakoze ibirori byo kurangiza amasomo y’ikiciro cya kabiri cya Kaminuza mu bijyanye n’ububanyi n’amahanga.

Ejo ku wa mbere yitabiriye inama yari iyobowe n’umukuru w’iguhugu cya Poland, Andrej Duda.

Uyu munyarwandakazi uvuga ko ahora aharanira ko igihugu ke gikomeza kugira ishema, avuga ko iriya nama yayitabiriye abanje kubirwanira ishyaka kuko yabyemerewe atabyishyiriye nk’abandi kuko yagaragaje ko abifitiye inyota.

Avuga ko uretse ibiganiro byuzuye amasomo byatangiwe muri iriya nama yigaga ku bumuntu, yanahungukiye umubano n’abantu bafite ibyo bamaze kugeraho ku buryo bashobora kumuyobora inzira imuganisha ku gukabya inzozi ze.

Ati “Hari byinshi nigiye ku bazikoramo kuko benshi bari muri iyi nama babigize umwuga kandi nanjye nifuza kuzabikoramo.”

Umutoni Pascaline uvuga ko igihe cyose ahora ashaka icyatuma igihugu ke gikomeza kumenyekana ku ruhando mpuzamahanga, avuga ko mu biganiro yagiranye n’abitabiriye iriya nama, yaberetse amahirwe ari mu Rwanda.

Ati Aho ngiye hose ba rwiyemezamirimo duhura mbashishikariza gushora imari mu gihugu cyanjye cyangwa kugisura.”

Agira inama urubyiruko ko bagomba guhora banyotewe no kunguka ubumenyi kuko ari bwo musingi wo kwiteza imbere no guteza imbere igihugu cyabo.

Ati “Niba ushaka gutera imbere, kwiga ibintu bitandukanye ugomba gufata amahirwe yose ubonye kandi ugahura n’abantu benshi cyane cyane abari muri field wifuza ubabaze uko babigenza cyangwa ubarebereho.”

Asaba abagifite amahirwe yo kuvoma ubumenyi ko bagomba kwiga ibyo bakunze aho kujya mu byoroshye.

Ati “Kuko igihe ukunze ikintu iyo utsinzwe ejo usubirayo kuko utajya ucika intege mu byo ukunda.”

Umutoni Pascaline Harimana yahatanye muri Miss Rwanda 2016 agera ku kiciro cya nyuma k’iri rushanwa ryegukanywe na Miss Mutesi Jolly.

Umutoni Pascaline na we ajya ayobora ibiganiro mu nama zikomeye

Bonaventure KUBWIMANA
UMUSEKE.RW

Subiza

Your email address will not be published. Required fields are marked *