• 16/12/2019 2:56 03

PM Ngirente yibukije Urubyiruko kwitabira umurimo urubyarira inyungu

Minisitiri w’Intebe, Dr Edouard Ngirente yibukije urubyiruko amahirwe Leta yarushyiriyeho, arusaha kuyabyaza umusaruro rwitabira umurimo ushobora kurubyarira inyungu bakabasha kwiteza imbere no guteza imbere igihugu cyabo.

Min Ngirente yasabye urubyiruko kwitabira umurimo warubyarira inyungu

Yabivugiye mu birori byo kwizihiza Umuganura wabereye mu karere ka Nyanza, yibutsa urubyiruko ko ari rwo mizero y’ejo hazaza h’igihugu.

Yagarutse ku mahirwe urubyiruko rwashyiriweho na Leta arimo gahunda yo guteza imbere imyuga n’ubumenyi ngiro, n’ikigega BDF gitanga inguzanyo ku rubyiruko rwifuza kwihangira imirimo.

Avuga ko aya mahirwe yose bakwiye kuyabyaza umusaruro bakayakoresha mu kwihangira imirimo yaruteza imbere.

Ati “Urubyiruko rukwiye kwitabira umurimo ubabyarira inyungu kuko bizabafasha kwiteza imbere duteza imbere n’igihugu cyacu muri rusange.”

Dr Ngirente yagarutse ku gisobanuro cy’Umuganura, avuga ko ari umwanya mwiza wo kwishimira ibyagezweho mu ngeri zitandukanye.

Yagaragaje ko mu buhinzi umusaruro wiyongereyeho kubera imbaraga zashyizwe mu guhuza ubutaka buhingwaho ibihingwa bikunze kwera mu Rwanda nk’ibigori, umuceri, ibirayi n’imyumbati.

Yavuze kandi ko imbuto nyinshi zisigaye zituburirwa mu Rwanda bityo zikagera ku bazikeneye vuba kandi zihendutse, hakaba hanakomeje gahunda yo gucukura imirwanyasuri n’amaterase y’indinganire.

Yahaye ikizere abahinzi n’aborozi ko ibiciro byo mu bucuruzi bw’ibikomoka kuri iyi mirimo gikwiye gushingira ku mbaraga bakoresha kugira ngo igishoro cyabo gihuzwe n’inyungu bakwiye kubona.

Ku nzitizi zikunze kugarukwaho na bamwe bifuza kwinjira mu bucuruzi, Minisitiri Ngirente yavuze ko Leta iri gukuraho imbogamizi zose ziri mu bucuruzi mu rwego rwo koroshya urujya n’uruza rw’ibicuruzwa.

Mu guteza imbere gahunda y’ibikorerwa mu Rwanda, Dr Ngirente yavuze ko hari politiki yo kubaka ibyanya byahariwe inganda mu turere twose tw’igihugu.

Umwihariko w’Umuganura w’uyu mwaka ni ukwishimira ibyagezweho atari mu buhinzi gusa ahubwo no mu zindi nzego zirimo Ubuzima, uburezi, ikoranabuhanga, ibikorwa remezo n’ubucuruzi.

Mu bikorwa remezo, Min Ngirente yavuze ko ubu amashanyarazi amaze kugera ku mubare munini w’abaturarwanda, hakaba hari no kubakwa no gusana imihanda mu turere tunyuranye.

Ati “Ibi byose biragagaza umusaruro ushimishije tuganura uyu munsi.”

Gusa yavuze ko umwanya nk’uyu ukwiye gufasha abantu gusubiza amaso inyuma no kwisuzuma kugira ngo hafatwe ingamba zo kunoza ibitagenda neza binozwe bityo binace inzira yo kugera ku abanyarwanda bifuza mu gihe kiri imbere.

Ati “Ni muri urwo rwego mbashishikariza kwita ku murimo unoze ndetse no kuwukorana umwete n’umurava.”

Muri uyu muganura ufite insanganyamatsiko igira iti ‘Umuganura, Isooko y’ubumwe n’ishingiro ryo kwigira’ hanabayeho igikorwa cyo kuganuza abaturage barimo n’aborojwe inka abandi bahabwa imyaka na bagenzi babo.

Ababyeyi bazanye ibiseke byo kuganuza bagenzi babo

 

Abaturage ngo ibyo kuganura ni byinshi…

Mukagatare Athanasie waje muri ibi birori avuga ko uyu muganura ubaye nyuma y’igihe gito bizihije isaburu y’imyaka 25 u Rwanda rumaze rwibohoye ari n’umwanya mwiza wo gushimira ibyo bamaze kugeraho mu mibereho myiza.

Ati «Ubu twavuye mu bwigunge, nta muntu ukirembera mu rugo, dusigaye tumenya ibibera ahandi kandi tunabyibonera. »

Undi muturage utuye mu Mudugudu wa Gahanga mu Kagari ka Rwesero mu Murenge wa Busasamana avuga ko aho igihugu kigeze hashimishije.

Ati «Hari ibyo maze kwigezaho biturutse kuri gahunda Leta igenda itugezaho zirimo amashanyarazi ndetse n’ibindi bikorwa remezo. »

Avuga ko nk’abaturage bafite umukoro wo guhora bazirikana aho bavuye kugira ngo bashobore kugera ku byo bifuza kugeraho.

Ati “Twavuye kure gusa aho tujya ni ho heza.”

Ibikorwa byo kwizihiza Umuganura birakomeje kuko bigomba kuba no mu mashuri ndetse no mu Banyarwanda batuye hanze.

Ni umunsi witabiriwe n’ingeri zinyuranye
Umuhanzi Jules Sentore yabataramiye

Dieudonnée NSHIMIYIMANA
UMUSEKE.RW

Subiza

Your email address will not be published. Required fields are marked *