• 15/12/2019 6:04 53

PeaceCup: As Kigali gutombora Rayon Sports “ni amahirwe akomeye”

Umunyamabanga Mukuru wa As Kigali aravuga ko nyuma y’ibyavuye muri tombola y’uko amakipe azahura mu mikino y’igikombe cy’Amahoro bigiye ahagaragara, ngo ikipe ye ari amahirwe yagize akomeye kuba yatomboye Rayon Sports bazahura ku mukino wa mbere.

As Kigali ngo amahirwe yo gusohokera u Rwanda iyategereje ku gutsinda Rayon Sports

Komezusenge Danny Umunyamabanga Mukuru wa As Kigali yabwiye Umuseke ko bakiriye neza inkuru yo kuzahura na Rayon Sports kuko ngo bamaze gutakaza amahirwe yo gutwara Igikombe cya Shampiyona ubu imbaraga zose bazerekeje kuri iri rushanwa ry’Igikombe cy’Amahoro.

Ati “Amahirwe dufite ni aya, mu ntego zacu muri uyu mwaka ni ugukina amarushanwa nyafurika, gutombola Rayon Sports ntabwo byaduhungabanyije ahubwo ni byiza. Tuzakina imikino ibiri turifuza gutsinda ubanza tugategereza uzakurikiraho, tukagera muri kimwe cy’umunani nubwo na Rayon Sports atari ikipe y’akana ariko abakinnyi bacu bari bazi ko igikombe dusigaranye ari icy’Amahoro.”

Yavuze ko iki gikombe bifuza kugitwara 100% agasaba abafana kuba inyuma y’iyi kipe kuko ngo As Kigali ikinyotewe nyuma yo kugitwara inshuro eshatu igasubiza agaciro abakunzi bayo.

Igikombe bagiheruka muri 2013, naho mu mwaka ushize yavuyemo muri kimwe cy’umunani itsinzwe na Mukura Victory Sports.

Mukura VS ifite iki gikombe yo yatomboye Unity Sports Club yo mu kiciro cya kabiri.

Mu kiganiro Nayandi Abraham Visi Perezida wa Mukura yahaye Umuseke yavuze ko batari basanzwe bazi iriya kipe batomboye, gusa ngo bamenye amakuru ko ikorera imyitozo i Mageragere.

Abraham yavuze ko igikombe cy’Amahoro bifuza kongera kugitwara.

Ati “Turabanza dukuremo Unity SC dukomeze tujye mu yindi tombola turebe izindi tuzahura na zo.”

Mukura VS iki gikombe igifite inshuro imwe ikaba yaragitwaye umwaka ushize.

CIP Maurice Karangwa Umuvugizi wa Police FC yavuze ko gutombora Gicumbi FC babyakiriwe neza kuko bamenyereye iri rushanwa.

Ati “Gicumbi Fc ni ikipe ikomeye ariko Police FC izagerageza kuyitsinda, intego Police FC yihaye ni ukugera ku mukino wa nyuma cyangwa gutwara igikombe cy’Amahohoro.”

Police FC yatwaye igikombe cy’Amahoro itozwa na Cassa Mbungu Andre usigaye utoza Leopard FC yo muri Kenya.

Uko ikipe zizahura tariki 4 Kamena 2019

Hope FC vs Gasogi United
As Kigali vs Rayon Sports
Mukura VS Unity Sports Club
Sunrise FC vs Espoir FC

Uko ikipe zizahura tariki 5 Kamena 2019

Gicumbi FC vs Police FC
Vision FC vs Bugesera FC
APRFC vs Rwamagana City FC
Etoile de l’Est vs Kiyovu Sports
Marines FC vs Etincelles FC

Rayon Sports itegereje umukino wa Kirehe ikamenya niba izatwara igikombe cya Shampiyona 2019 niramuka iwutsinze, ni imwe mu makipe ahagaze neza mu Rwanda
Police FC na yo ngo iki gikombe iragikeneye kandi yabishyize mu mihigo yayo

Jean Paul Nkundineza
Umuseke.rw

1 Igitekerezo

  • Ururimi ni inyama yigenga koko! Ngo ni amahirwe guhera kuri Rayon Sports? Mbega umugabo w’umubeshyi ruharwa!!! Ubwo se abatomboye za Unity Club izo bo bavuga iki? Cyangwa APR FC?

    Noneho akanongeraho ngo arahamagarira abafana kuba inyuma y’ikipe! Abahe bafana se? Ni akumiro gusa…

Subiza

Your email address will not be published. Required fields are marked *