• 29/01/2020 12:02 30

Pamela Munyana ufite inzozi zo gufasha ba rwiyemezamirimo b’abagore kwaguka

Harabura igihe gito ku Isi hakabaho icyumweru cyahariwe ba Rwiyemezamirimo, (Global Entrepreneurship Week), mu Rwanda, Pamela Munyana na bagenzi be barategura gutangiza uburyo buzafasha kuzamura ba rwiyemezamirimo b’abagore, bakubakirwa ubushobozi ndetse 15 bazatoranywa bagahabwa amadolari 5000$ ashobora kugera ku 10 000$ kugira ngo baguke.

Pamela Munyana umuyobozi wa IDEA 4 Africa avuga ko kuba rwiyemezamirimo bisaba kudacika intege

Pamela Munyana ahagarariye IDEA 4 Africa mu Rwanda, avuga ko mu byiciro by’imishinga bafasha bigera ku 8 birimo ijyanye n’ubuhinzi n’ikoranabuhanga n’iby’ubukerarugendo n’ibindi.

Avuga ko muri uru rugendo rwo gufasha abagore kuba ba rwiyemezamirimo, hari abantu bafite ubunararibonye mu byo guhanga imirimo bazababa hafi bakabaha ubumenyi ndetse bagakurikirana mu gihe cy’umwaka iterambere bageraho.

Ati “Uko tubahitamo ni abantu baba bageze ku rwego runaka bakagira inzitizi mu kuba bagera ku isoko haba hano mu Rwanda no ku isoko mpuzamahanga.”

Pamela avuga ko abagore badakwiye gucika intege kuko ngo usanga buri wese utangira kuba rwiyemezamirimo bimugora ariko ngo ibibazo biba byihariye bitewe n’ibyo akora n’aho akorera.

Ati “Ibya rwiyemezamirimo, uratsindwa ugakomeza, kugera ugeze aho ushaka kugera.”

Mu Rwanda, IDEA 4 Africa irategura icyumweru cy’ubukangurambaga bugamije gushishikariza abantu kuba ba rwiyemezamirimo, ibyitwa Global Entrepreneurship Week (GEW). Ku isi hose bikorwa mu bihugu 170 hakaba hari insanganyamatsiko bibandaho.

Ibi bikorwa bitangira tariki 12 Ugushyingo bikamara icyumweru, ariko ku ruhande rw’u Rwanda umuryango IDEA 4 Africa uvuga ko wasabye ko wafungura biriya bikorwa tariki 9 Ugushyingo 2018 kugira ngo utangize gahunda yiswe Pan African Women’s Accelerator (PAWA) ari yo izifashishwa mu gukurikirana iriya mishanga 15 y’abagore bazafashwa kongera ubumenyi mu byo bakora bakanahabwa hagati y’amadolari 5000$ n’ibihumbi 10$ kugira ngo baguke.

Imiryango (Amashyirahamwe cyangwa ibigo) 40 bizitabira kiriya cy’umweru cy’ubukangurambaga hirya no hino aho ikorera mu gihugu. Uretse gutangiza iriya guhanda ya PAWA ari na byo bizafungura icyumweru cya GEW, tariki 9 Ugushyingo, i Kigali, ibindi bikorwa bizabera hirya no hino mu gihugu.

Richard Ngoga, Manager wa IDEA 4 Africa avuga ko abagore bagira uruhare runini muri gahunda zo kwihangira umurimo, bityo ngo uyu mwaka bifuzaga ko ubukangurambaga bwa GEW babufatanya n’ibigo 60 bya ba rwiyemezamirimo mu gihugu ariko ngo babashije kugera kuri biriya 40.

Agira ati “Bitewe n’ibitekerezo bafite byo kwihangira imirimo niho tubafashiriza mu buryo bwo kubashakira ubushobozi mu mikoro, mu bufasha bw’ibitekerezo mu mikorere yabo, niyo mpamvu dufitanye ubufatanye na Africa y’Epfo, ni uburyo bwo kwagura ibyo bakora bikarenga isoko ryo mu Rwanda bikajya no ku rwego rwa Africa.”

Norette Turimuci ukuriye umuryango uharanira impinduka ku mibereho y’abagore mu Rwanda no mu bihugu bya Uganda, Kenya na Tanzania (Resonate), avuga ko  bakorana n’imiryango ifasha kubaka ubushobozi bw’abagore n’urubyiruko cyane mu bijyanye no gutanga ubumenyi mu kuyobora imishinga no kwigirira ikizere mu gushyira mu bikorwa ibyo bakora, ngo ni yo mpamvu bazanagira uruhare muri iki gikorwa.

Ati “Tubona ko abagore bafite ubushobozi buhagije bwo kuba ba rwiyemezamirimo akenshi habura kwigirira ikizere abagore bakumva ko batabishobora, ariko twibaza ko nka Resonate biri mu byo tuzafasha muri iki gikorwa.”

Abagore batanga 30% mu musaruro mbumbe w’igihugu mu Rwanda, gusa benshi muri bo bakora ubucuruzi bwitwa ko butanditse (informal).

Mu Rwanda nibura habarwa imishinga y’ubucuruzi igera ku 142,029 muri yo igera kuri 101,665 ingana na (71.58%) ari iy’abagabo, mu gihe igera kuri 38,017 ingana na (26, 77%) ari iy’abagore naho imishinga igera kuri 2 347 ingana na (1.65%) ntihavugwa igitsina cya beneyo.

Imiryango 40 irimo BaKORA na Nabu izaba ikora ibikorwa binyuranye byo gufasha abagore kuba ba rwiyemezamirimo muri iki cyumweru kiswe GEW

HATANGIMANA Ange Eric
UM– USEKE.RW

0 Igitekerezo

  • Kwihangira umulimo.com

Subiza

Your email address will not be published. Required fields are marked *