• 12/12/2019 4:34 54

One Hundred Women, muri Bugesera umugore umwe mu Kagari yahawe Frw 100 000

Ni igikorwa cyo kuremera nibura umugore umwe mu Kagari agahabwa amafaranga y’u Rwanda ibihumbi 100 kugira ngo abikoreshe yiteze imbere bikozwe n’abanyamuryango ba RPF-Inkotanyi. Mu Karere ka Bugesera uyu muhigo bawugezeho, Umuyobozi wako asanga nibitanga umusaruro byazagera no mu zindi nzego.

Richard Mutabazi ni Chairman wa RPF Inkotanyi ku rwego rw’Akarere ka Bugesera avuga ko kuremera abatishoboye bizakomeza

Ku wa gatandatu w’icyumweru gishize, muri aka Karere habayeho gutora abayobozi buzuza inzego z’Umuryango RPF-Inkotanyi ku rwego rw’Akarere basimbura abagiriwe ikizere bakajya ku rwego rw’Intara. Byanajyanye no kwerekana ku mugaragaro abagore 72 bahawe inkunga y’amafaranga y’u Rwanda ibihumbi 100 binyuze mu mushinga One Hundred Women watangijwe ku rwego rw’igihugu n’Urugaga rw’abagore muri RPF-Inkotanyi.

Richard Mutabazi Mayor wa Bugesera kuri iki gikorwa cyo kuremera abagore yavuze ko babahaye n’abantu bo kubafasha (mentors) kugira ngo babigire imishinga itazahomba kandi ngo babasaba gukomeza kubakurikirana kugira ngo imishinga yabo izabafashe kuzamuka batere imbere.

Ati “Iki ni igikorwa kigitangira, cyatekerejwe n’abanyamuryango ba RPF –Inkotanyi mu rugaga rw’abagore ku rwego rw’igihugu, bizaterwa n’uko tukitwaramo tubonye ari kiza twakomeza kugikora, kandi turabyizeye, mu bahawe inkunga 72 turizera ko hari abazagira umumaro bakajya mu murongo wo gufasha abandi, twavuga ngo ntikibe icy’abagore kuko ari bo bagitekereje, kijye no mu rubyiruko batoranye abafashwa, n’abandi batoranye twikusanye.”

Duhujimana Claudine wo mu Mudugudu wa Muyoboro mu Kagari ka Nemba mu Murenge wa Rweru ari mu bagore 72 bahawe Frw 100 000. Afite imyaka 38 afite abana batandatu, nyuma yo kuyabona muri Werurwe 2019 ngo hari intambwe yateye.

Ati “Nkimara kuyabona ibyo nakoraga nabivuyemo, nacuruzaga imbuto ubu nshuruza amatungo mu isoko mbere nari narabuze ubushobozi ngo mpindure ibyo nakoraga.”

Amafaranga yayabonye tariki 14 Werurwe 2019, ariko Umuyobozi w’Akarere ka Bugesera avuga ko abanyuma mu bagenewe iriya nkunga amafaranga yabagezeho muri Kamena 2019.

Duhujimana Claudene wo muri Rweru avuga ko amafaranga yahawe yatangiye kumufasha guhindura ubuzima

Mu myanya itandukanye yatorewe, irimo uwa Komiseri ushinzwe imibereho myiza muri Komite nyobozi ya RPF-Inkotanyi ku rwego rw’Akarere hatowe Imanishimwe Yvette, Komiseri w’imibereho myiza mu Rugaga rw’Abagore, Uwantege Fortunee ni we watowe, banatoye Visi Perezida w’Urugaga rw’Urubyiruko ku rwego rw’Akarere, aba Umutoni Jean Claude na Mwambarangwe Belyse watowe nka Komiseri w’Imibereho myiza mu Rugaga rw’Urubyiruko.

Umutoni Jean Claude w’imyaka 25 watowe nka Visi Perezida w’Urugaga rw’Urubyiruko yari asanzwe ahagarariye urubyiruko mu Murenge akomokamo wa Musenyi, nibwo akirangiza Kaminuza mu ishami ry’Imari, avuga ko ashyize imbere imyidagaduro no gufasha urubyiruko kujya inama zo guhanga imirimo mishya.

Ati “Tugomba kuba abantu bahanga udushya, tukareba n’abandi imihigo myiza bagezeho tukabigiraho, nzaba mpari ngo ntange ibitekerezo.”

Umuyobozi w’Akarere ka Bugesera avuga ko nyuma yo kugenda buzuza inzego za RPF-Inkotanyi ku rwego rw’Akarere, bizasiga icyuho mu zindi Komite ku rwego rw’Umurenge no hasi agasaba ko byihutishwa kugira ngo abagiye bazamuka basimbuzwe kuri buri rwego.

Iyi gahunda yo gutanga amafaranga y’u Rwanda ibihumbi 100 kuri buri mugore watoranyijwe muri buri kagari mu tugera kuri 72 tugize Akarere ka Bugesera ngo ntabwo uwayahabwaga byasabaga ko aba ari umunyamuryango wa RPF-Inkotanyi.

Umutoni Jean Claude watowe nka Visi Perezida w’Urugaga rw’Urubyiruko rwa RPF-Inkotanyi ku rwego rw’Akarere
Muri Komite nyobozi ya RPF-Inkotanyi ku rwego rw’Akarere hatowe Imanishimwe Yvette nka Komiseri w’Imibereho myiza

HATANGIMANA Ange Eric
UMUSEKE.RW

2 Ibitekerezo

  • Ntabwo kujugunyira abantu amafaranga ari byo bizagabanya ubukene muri iki gihugu. MTN ntiyatanze miliyoni nkeya, uzababaze aho yaciye. Abantu bahabwa imirimo, bakayakorera. Ya mirimo yakozwe ikazamura muri rusange aho ikorerwa inatanga imisoro mu isanduku ya Leta.

  • Jye niba numvise neza iki igikorwa cyabaye murwego rwo gufasha aba babyeyi kwigira, cyane ko ngo hari nabatanga ubuhamya ko ayo mafaranga hari icyo amaze kubamarira, kuki twakumva ko ari ukuyajugunya kandi yaratangiye no kubyazwa umusaruro? Hari abantu benshi bashoboye gukora ariko badafite igishoro. Congs kandi courage kuri bugesera yarebereye abo bagore kandi ikagira uruhare mukubazamura. Abo babyeyi nabo baremewe batekereze cyane imishinga irahari iciriritse kandi iri profitable nabo bazaremere n’abandi. Chairman wa bugesera arasobanutse.

Subiza

Your email address will not be published. Required fields are marked *