• 29/01/2020 12:08 27

Ngororero: Abafite ubumuga bifatanye n’abarokokeye i Nyange banaremera inshike

Ku itariki ya 16 Mata nibwo Abatutsi bahungiye muri Kiliziya ya Nyange bishwe batuweho  Kiliziya ku itegeko rya Padiri Seromba Athanase.  Abafite ubumuga bifatanyije kwibuka inzirakarengane zahiciwe muri Jenoside yakorewe Abatutsi, amakuru akavuga ko Abatutsi biciwe muri Ngororero basaga ibihumbi 50.

Abagize Inama y’Igihugu y’Abafite Ubumuga bavuga ko i Nyange hari amateka mabi ya Jenoside yakorewe Abatutsi, ariko hakaba n’ameza y’abana b’i Nyange banze kwitandukanye kubera ubwoko

Niyomugabo Romalis Umuyobozi w’Inama y’Igihugu y’abafite ubumuga, yavuze ko igikorwa bakoze ari ngarukamwaka.

Ati “I Nyange hari amateka yihariye kuko Abihayimana bagize uruhare mu gutsemba Abatutsi, ariko hari n’amateka meza twahasanze aho hari abana b’i Nyange banze kwitandukanya kugeza ubwo abacengezi babishe. Ubutwari bwabo buratwigisha nk’abafite ubumuga muri rusange.”

Buri mwaka ngo Inama y’Igihugu y’Abafite Ubumuga yifatanya n’abandi kwibuka Jenoside yakorewe Abatutsi, bagafasha mu guha ibikoresho by’ibanze abasizwe iheruruheru na yo, ndetse bagatanga insimburangingo ku basigiwe ubumuga na Jenoside.

Mayor w’Akerere ka Ngororero, Ndayambaje Godfrey yavuze ko muri Ngororero haguye Abatutsi barenga ibihumbi mirongo itanu (50 000).

Yavuze ko bishimira ko nta ngengabitekerezo yahagaragaye muri iyi minsi ishize hatangiye kwibukwa ku nshuro ya 25 Jenoside yakorewe Abatutsi.

Ati “Buri wese agomba kuba urumuri rw’ubumwe n’ubwiyunge kandi nk’uko tugomba kwibuka mu minsi 100, tuzakomeza guharanira ko Jenoside itazagaragara kubaho.”

Padiri Seromba Athanase wahamijwe n’Urukiko Mpanabyaha rwa Arusha ibyaha bijyanye na Jenoside, yakatiwe imyaka 15 nyuma arajurira muri 2008, Urugereko rw’Ubujurire rusanga uruhare yagize muri Jenoside yakorewe Abatutsi rusumba kure igihano yari yakatiwe mbere, rumuhamya ibyaha ndetse akatirwa igifungo cya Burundu, ubu ari kugikora muri Benin.

Muri uyu muhango hanabayeho gutanga inkunga ku bagizwe inshike na Jenoside yakorewe Abatutsi

NGOBOKA Sylvain
UM– USEKE.RW

Subiza

Your email address will not be published. Required fields are marked *