• 08/12/2019 8:28 13

Nyagatare: Ikimoteri kiri mu mugi wa Rukomo giteje impungenge

Abatuye mu mujyi wa Rukomo umurenge wa Rukomo mu karere ka Nyagatare barinubira umunuko w’umwanda uri mu kimpoteri kinini kiri iruhande rwawo. Bifuza ko kivanwa aho kiri kigashyirwa kure y’umugi kuko kibangamye.

Ikimpoteri kiri hagati mu mirima ikikije umujyi wa Rukomo

Iki kimpoteri kiri nko muri metero zitarenze 100 uvuye ku nzu ya nyuma muri uyu mujyi. Uretse kuba kiri hafi y’umujyi ni ikimpotera bigaragara ko cyuzuye imyanda.

Hari abana birirwa bashakisha ibyuma, amacupa y’ubwoko butandukanye n’ibindi biba byajugunywe hano bitabora, ku buryo hari impungenge ko bashobora kubikurizamo uburwayi.

Umwe mu baturiye uyu mujyi witwa Ndahunga Alex ati “Sinzi iyo babijyana, amacupa ugasanga yabatemaguye bashobora no gukuramo indwara muri uwo mwanda.”

Mugisha ati “Kiriya kimpoteri kirabangamye cyane. Iyo umuyaga uhinduye ikerekezo ujya kumva ukumva umunuko ukwiriye umujyi wose. Usanga amashashi n’indi myanda byuzuye mu mirima yacu wajya guhinga amacupa akagutema,…harabangamye cyane rwose.”

Abaturage bo muri aka gace basaba ubuyobozi bw’Akarere n’ubw’Intara y’Uburasirazuba kureba uko kiriya kimpoteri cyakwimurirwa ahandi hitaruye.

Andrew Ndamage umuyobozi w’uyu murenge wa Rukomo yabwiye Umuseke ko iki kimpoteri bagishyize hano by’agateganyo akizeza abaturage ko umwaka utaha uzajya kurangira abaturage babonye ikimpoteri gishya kandi kitaruye umujyi.

Ati “Uyu ni umujyi uvutse vuba.  Igishushanyo mbonera cyawo ntikiraboneka niyo mpamvu twabaye twifashishije hariya ariko muri gahunda turateganya ko twazashaka ubutaka hirya y’umujyi aho twakimurira. Natwe turabibona ko bibangamye ariko ni uburyo bugendanye n’amikoro, ntabwo bishobora kurenza umwaka utaha tutarabona ahandi tukimurira.”

Uyu mugi wa Rukomo uri mu gice cy’icyaro mu karere ka Nyagatare ariko bigaragara ko uri gukura cyane.  Utuwe n’abacuruzi benshi bakunda gucuruza  imyaka irimo ibigori n’ibishyimbo.

Umujyi w’Umurenge wa Rukomo urimo uratera imbere wihuse
Barifuza ko iki kimpoteri kivanwa mu nkengero z’umujyi
Abana bakirirwamo bashaka amacupa
Abatuye Rukomo barasaba bakomeje ko iki kimpoteri cyava iruhande rw’umujyi wabo kuko kibahumanya
Gitifu Ndamage ati: ” Kizimurwa bitarenze 2020″

Elia BYUKUSENGE

UMUSEKE.RW/Nyagatare

1 Igitekerezo

  • Ariko se kweli mwebwe muzi ubusobanuro bwa Umujyi cg?

Subiza

Your email address will not be published. Required fields are marked *