• 24/01/2020 1:01 06

Ntukwiye kwishingira ibyo uzangiza ngo wibagirwe ubuzima bwawe n’abawe -Amb. Habineza

Mukiganiro Ambasaderi Joseph Habineza wanabaye Minisitiri w’Urubyiruko, Umuco na Sipiro ubu akaba ari we Uhagarariye Sosiyete y’Ubwishingizi ya Radiant, avuga ko benshi mu Banyarwanda bataramenya ibyo ubwishingizi ari cyo, ngo bumva ko bazatanga menshi ku mwaka, bagahitamo kwishingira ibyo bazangiza mu mpanuka bakibagirwa ubuzima bwabo n’urw’ababo. 

Amb. Joseph Habineza uhagarariye Sosiyete y’Ubwishingizi ya Radiant avuga ko kugira umuco wo kwishingira ibyo batunze n’ubuzima bwabo ukwiye kujya mu Banyarwanda

Habineza avuga ko Abanyarwanda bakwiye gukurikiza amategeko, bagatwara ibinyabiziga birimo umubare w’abantu n’ibyintu byagenewe gutwara.

Avugako igihe amategeko yishwe umuntu agakora impanuka yatendetse kandi bagapfa, ngo icyo gihe ubwishingizi bwishyura bose ariko nyiri ikinyabiziga agakurikiranwa na Sosiyete y’ Ubwishingizi (Assurance) akorana na yo.

Amb. Joseph Habineza wamenyekanye cyane nka Joe, avuga ko Abanyarwanda badakunda kwishingira ibyo bafite, usanga umuntu arubaka inzu nta bwishingizi, kuri we no ku bakozi bubaka kandi inzu ishobora kugwa bayubaka ikabahitana cyangwa bagakomereka.

Igisubizo ngo ni ugukomeza kwigisha abantu ibijyanye no kwishingira ko atari ukubona amafaranga gusa ahubwo bakamenya ibibazo bishingira.

Hari abumva ngo batanze amafaranga 100 000 ku mwaka yo kwishingira ikintu runaka bakumva ko ari amafaranga menshi ariko Amb. Habineza avuga ko iyo bakoze impanuka bakagobokwa ari bwo bamenya agaciro bifite.

Habineza avuga ko buri kinyabiga gikora impanuka, ku buryo buri wese akwiye kumva ko ari inshingano kwishyurira ubwishingizi abakigendamo ngo abenshi babugura banga gufatwa na Polisi, ngo uwabareka bakwigendera.

Ati “Benshi bazi ko imodoka itajya mu muhanda idafite ubwishingizi kubera ko Polisi yabafata, ariko uwavuga ngo bage bigendera gutyo wasanga benshi badafashe ubwishingizi kandi imodoka, igare, n’ipikipiki byose bigira impanuka.”

Avuga ko abantu badakwiye gutekereza gusa ibyo bangije mu mpanuka ko ari byo bazishyurira ubwishingizi, ngo nubwo ubwishingizi bwa Omnium (bwishyura byose) bufite igiciro gisa n’ikiri hejuru, ngo abantu bakwiye kujya bibuka kwishingira ubuzima bwabo n’ubw’ababo batwara mu binyabiziga byabo.

Habineza ati “Ntitugomba guhora iteka dutekereza ibyo twaryozwa gusa…Ushobora gufata ubwishingizi bwitwa contre-tiers, ukishingira ubuzima bwawe, kuko urafata umugore n’abana ukabashyira mu modoka ariko ukibagirwa kwishingira ubuzima bwawe n’ubw’abana bawe.”

Avuga ko benshi bibuka ko ubwishingizi bubaho impanuka yabaye kandi icyo gihe kubahiriza amategeko ngo ntibiba bigishobotse.

Mu Rwanda, Amb. Joseph Habineza avuga ko iby’ubwishingizi biri hasi cyane mu mitwe y’abantu no kubugura kuko ngo biri munsi ya 1,7% impamvu ngo ni uko abantu muri rusange batumva ibya Assurance icyo ari cyo, ikosa ngo ni uko bitasobanuwe ngo abantu babyumve kuva mu bihe byahise.

Kuri Radiant ikuriwe na Amb.Joseph Habineza ngo bahisemo gukorana n’abantu bose.

Jean Paul NKUNDINEZA
UMUSEKE.RW

5 Ibitekerezo

  • Umunsi umukene yagiriye impanuka kunzu y’umukire, nyirinzu agahanwa by’intangarugero nibwo assurance (ubwisungane ) yakwitabirwa. Na assurance ntizishyura nkuko umuntu yabikekaga.

  • Mwenewabo rugenera yamuvanye mu bushomeri

    • Murenzi we hari ikibazo ubifiteho? Nangwa nawe abinyujije muri business ye ku giti cye abandi babinyuza mubuyobozi bw’igihugu barangiza ngo mujye kwihangira imilimo.

  • Alimentation na supageti (kwihangira umurimo)abivuyemo,asubiye ku gashahara! Kenshi mwigisha kwihangira umuriomo nyamara mwe mutabishoboye cyangwa mubitinya!

  • Ikibazo cya assurance iyo iva ikagera, iyo bigeze aho umuntu agomba kwishyurwa hashakishwa impamvu zose zituma atishyurwa. Iyo ugize impanuka bakumvisha uburyo ari wowe munyamakosa bityo ntiwishyurwe. .

Subiza

Your email address will not be published. Required fields are marked *