• 19/01/2020 8:13 07

Nta uzaduhindurira Africa. Ni twe bireba – Kagame i Davos

Mu kiganiro ku ‘ijambo rya Africa mu ruhando rw’isi’ cyatanzwe mu nama mpuzamahanga ya World Economic Forum iri kubera Davos mu Busuwisi, Perezida Paul Kagame yavuze ko iki kiganiro kiziye igihe kuko ibihe bitigeze biha umwanyaAfrica ngo igire ijambo ryayo mu ruhando rw’isi.

Muri iki kiganiro, hari kandi na Perezida Cyril Ramaphosa wa Africa y'Epfo
Muri iki kiganiro, hari kandi na Perezida Cyril Ramaphosa wa Africa y’Epfo

Yavuze ko mu gihe kinini cyane gishize Africa yarekeye inshingano zayo abandi ndetse bamwe muri bo bakabyungukiramo.

Ati “Ariko ubu ibibazo bigendanye n’abimukira, umutekano, ihindagurikira ry’ikirere n’ibindi bigaragaza ko nta muntu ucyungukira mu ntege nke za Africa. 

Ahubwo buri wese yakungukira muri Africa ikomeye, yunze ubumwe. Nicyo Africa ishaka kungukira mu bufatanye bwungura n’Ubushinwa, Uburayi n’abandi.”

Perezida Kagame yavuze ko nta muntu uzahindura Africa nziza abikorera Abanyafurika. Ati “Ni twe bireba”.

Yavuze ko ubushake n’ibikorwa binyuranye bigamije iyo nzira nk’umushinga w’isoko rimwe rusange rya Africa, ndetse ko mu nama itaha y’Umuryango w’Ubumwe bwa Africa bateganya kuganira ku buryo hakorwa indangamuntu imwe y’ikoranabuhanga muri Africa yo ku rwego rugezweho.

Intego ngo ni ugutuma Abanyafurika bose bungukira mu bikorwa bishingiye ku bumenyi n’ubukungu.

Ati “Kuri Africa, icyangombwa cyane ni ugufata iya mbere mu kubaka umwanyaAfrica wacu ku ruhando rw’isi.”

Gusa Perezida Kagame avuga ko bitoroshye kugera ku bwumvikane bumwe bw’ibihugu birenga 50 n’imiryango ihuza ibihugu inyuranye.

Ariko ati “Birashoboka. Ubufatanye mpuzamahanga ni ngombwa.”

Perezida Kagame na Cyril Ramaphosa i Davos
Perezida Kagame na Cyril Ramaphosa i Davos
Nyuma yakoze ikiganiro ari kumwe na Jack Ma
Nyuma yakoze ikiganiro ari kumwe na Jack Ma

Photos/Flickr/PaulKagame

UM– USEKE.RW

10 Ibitekerezo

  • Nimushaka kumenya umuyobozi wo muri Afrika ba Mpatsibihugu bafata nk’urengera inyungu zabo, mujye mureba abatumirwa mu nama y’i Davos .

    • Ibyabaye ejobundi muli Kongo byerekanye “intege nke” Afrika ifite.Ntako ba Lumumba,Nyerere,N’krumah na Mandela batagije ngo habe Revolution ariko byaranze.Kugeza naho bananirwa kubaka inzu nziza bakoreramo,China ikaba ariyo ibikora.The Future of Africa is in hands of Europeans,Americans and China.Murumva namwe aho tujya.Ntabwo ari heza na gato.

      • Kagame yabivugiye Addis Abeba, ubwo umunyamakuru yari amubajije, kubijyanye n’inzu AU ikoreramo yubatswe na China. Yavuze ko byarikuba byiza iyo iyo nzu iza kuba yiyubakiwe n’Abanyafurika ubwabo. Nyamara usanga bamwe mu banyafurika barwanya ko Afurika yigenga cyane mu by’ubukungu nkaho bamwe barwanya amavugurwa ya AU ayobowe na Kagame, kandi agamije kwishakamo ibisubizo. Kwigenga mu bukungu no muri Politique ntabwo ari mu magambo gusa, ahubwo ni uko ubayeho. Natanga urugero ku Burundi, aho birirwa mu mihanda bamagana European Union, ngo bashaka kwigenga, wareba ku rundi ruhande, ugasanga Presidence y’igihugu, barimo kuyubakirwa na China.Ubwo umugabo yakwigenga gute, kandi urugo rwe arwubakirwa n’abandi.

        • Natwe hano i Kigali Abshinwa barimo kutwubakira ibiro bya Primature, nibo bubatse iriya nzu Louise Mushikiwabo yakoreragamo (MINAFFET), ni nabo kandi bujuje iriya nzu izakoreramo Ministeri nyinshi; ayo mazu yoooose ni intwererano baduhaye ! Sasa wowe, jya kurisha uvane ubujiji aha, iki ni kinyamakuru cy’abantu bafite umutwe apana idegede.

        • abarundi nabahanga bazi aho ikibazo kiva. abashinwa na eu/usa baratandukanye cyane.abashinwa ntibivanga mumiyoborere y’ibindi bihugu nta basis bagira riryla no hino kw’isi,nta ntambara bajya bashoza mubindi bihugu(nkuko usa/eu babikoze murwanda),nta na “allies” bagira kandi bubaha ubwigenge bwa buri guhugu.
          bitandukanye na “west” bashaka hegemony no kugira buri gihugu n’ababituye laquet zabo(imperialism cyangwase mpastibihugu).
          gushyira ubushinwa na west mugatebo kamwe(cyereka niba ufite icyo ugamije), sibyo kuko politique yizi antity 2 zombi itandukanye 100%(ariko ndemeranya nawe ko “abantu” bakagombye kumenya gukora byose badacyeneye abanyamahanga).

    • Davos hatumirwayo umugabo ufite icyo avuga. Kandi kuba HE Kagame, avuga ko Africa izazamurwa n’abanyafrica, ntiyavuze ko hatazabaho gukorana n’Abanyaburayi, Abanyamerica, Asiya n’abandi. Nta gihugu cyatera imbere kidakoranye n’abafite ubushobozi. Kuko niyo wagira amabuye y’agaciro n’aya Congo, ukagira icyayi, ikawa n’ibindi, ntibihagije ngo dutere imbere tudakoranye n’abafite amafaranga, ndetse banashore amafaranga. Kwiyubakira Africa ntibivuze ko tutakorana n’abandi cyangwa ngo twungurane ibitekerezo, cyane ko bo bateye imbere yacu.

  • Mu bikorwa se ko mbona abanyamahanga twita abashoramari dusa n’aho ari bo turambirijeho ngo dutere imbere, kimwe n’inguzanyo za biriya bigo bya Bretton Woods? Ko mbona kaminuza yacu ya Leta iyobowe n’umunyamerika? Ko ujya mu bishanga bya Nyabarongo ugasangamo Madhvani? Mu bikorwa remezo ntutere intambwe ebyiri udahuye n’umushinwa? Nkabona PAC (Presidential Advisory Council) yiganjemo abanyamahanga? Jye birancanze pe!!

  • None ko abana bacu b’indongozi bazanaba abayobozi b’ejo hazaza baminuriza muri Amerika n’Uburayi cyane cyane, bagaruka batekereza nk’Abanyafrika, cyangwa kimwe n’ababarera iyongiyo i Bwotamasimbi? Iyo tugize Imana bakagaruka!!!!

  • H E ati:” Nta uzaduhindurira Africa. Ni twe bireba”. Nibyo kabisa nitwe bireba nubwo twe tutabireba! Ba nyakubahwa baba bazi kwivugira neza gusa. Twe bireba turi gukora iki buriya ngo tuzamurane muri iyi Africa yacu ra? Nitwe dufite za businnes nyinshi hanze ya Africa, nitwe twirirwa turasana, twicana hagati yacu, nitwe twananiwe guhangira imirimo urubyiruko none rwashiriye muri Mediterane ngo ruri kugana Iburayi gushaka imibereho myiza, nitwe twica uwariwewese udatekereza nkatwe, nitwe twibera muri paradiso kandi abo dushinzwe kuzamura bwaki ibamereye faux! Nibyo rwose ibyo HE avuga ndabishyigikiye. Dukomeze twihindurire Africa yacu indiri y’ibibazo

  • iki kigo cy’ubujura WEF,AU,UN(na doctrine zabyo),… nibyo bitera ibibazo,ntabisubizo byabavamo.
    abantu bacyeneye ubwijyenjye no kuva mubukoloni.

Subiza

Your email address will not be published. Required fields are marked *